ރ. ފައިނުން 30 ގޯއްޗަށް ކުރިމަތިލުމަށް އެ ރަށު ކައުންސިލުން އިޢުލާންކޮށްފިއެވެ.
ފައިނު ކައުންސިލުން ވިދާޅުވީ، ދިރިއުޅުމަށްޓަކައި އެރަށުން ގޯތި ބޭނުންވާ ފަރާތްތަކަށް އެކަމަށް އެދި ފުރުޞަތު ހުޅުވާލާފައިވާއިރު، މި ބުރުގައި ދޫކުރާ ގޯތިތަކުގެ ބޮޑުމިނުގައި 3000 އަކަފޫޓު ހުންނާނެކަމަށެވެ. އަދި މި ގޯތިތައް ދޫކުރާނީ އެކައުންސިލުން ފާސްކޮށްފައިވާ "ރ. ފައިނުން ދިރިއުޅުމަށް ބަންޑާރަ ގޯތި ދޫކުރުމުގެ އުޞޫލު"އާއި އެއްގޮތްވާގޮތުގެ މަތިންކަމަށެވެ.
މި އުޞޫލުގައިވާގޮތުން ގޯއްޗަށް އެދި ކުރިމަތިލާ ފަރާތްތަކުގެ ހުންނަންޖެހޭ ޝަރުތުތަކުގެ ތެރޭގައި ދިވެހި ރައްޔިތެއްކަމުގައިވުމާއި، 18 އަހަރުން މަތީގެ މީހެއްކަމުގައިވުމާއި، ބަންޑާރަ ގޯއްޗެއް ނުވަތަ އަމިއްލަ ގޯއްޗެއް އެމީހެއްގެ ނަމުގައި ރަޖިސްޓްރީވެފައި ނެތުން ހިމެނެއެވެ. އަދި ގޯއްޗަށް ކުރިމަތިލާ ފަރާތަކީ އަމިއްލަ ނުވަތަ ބަންޑާރަ ގޯއްޗެއްގައިވާ ނުއުފުލޭ މުދަލުން ލިބިގެން އެފަދަ ގޯއްޗަކުން 600 އަކަފޫޓަށްވުރެ ބޮޑު ބިމެއް ލިބިފައިވާ ފަރާތަކަށް ވެގެން ނުވާނެއެވެ.
މީގެ އިތުރުން ސަރުކާރުން ހަދާފައިވާ ފްލެތެއް ނުވަތަ އެއްމެދު އިމާރާތެއްގެ ފްލެޓެއް އެމީހެއްގެ ނަމުގައި ރަޖިސްޓްރީވެފައި ނެތުމާއި، މިފަދަ ތަނެއް އަމިއްލަ ނަމުގައި އޮވެ، ތަން ދޫކޮށްލާ ނުވަތަ ވިއްކާލާފައިވާތާ 2 އަހަރު ދުވަހަށްވުރެ ގިނަ ދުވަސްވެފައިވުންވެސް ޝަރުތުތަކުގެ ތެރޭގައި ހިމެނެއެވެ.
ގޯތި ދޫކުރުމުގައި ޕޮއިންޓް ދެވޭނެ އުޞޫލާއި މިންގަނޑުތަކާއި، އެންމެ އެކަށީގެންވާ މީހެއް ނުވަތަ ބައެއް ކަނޑައެޅުމުގައި ރިޢާޔަތްކުރާނެ ކަންކަންވެސް މި އުޞޫލުގައި ހިމަނާފައިވެއެވެ.
މިކަމާގުޅޭގޮތުން ޕީ.އެސް.އެމް ނިއުސްއަށް މަޢުލޫމާތުދެއްވަމުން ފައިނު ކައުންސިލްގެ ރައީސް މޫސާ އުމަރު މަނިކު ވިދާޅުވީ، ރަށުން ގޯތި ދޫކުރުމަށް ބިން ކަނޑައަޅާފައިވަނީ ރަށުގެ ހުޅަނގުކޮޅުން އަލަށް މީހުން އާބާދުކުރެވޭ ސަރަޙައްދުންކަމަށެވެ. އަދި މިފަހަރު ހުޅުވާލި މި ފުރުޞަތުގެ ދަށުން، ލިބޭ އެޕްލިކޭޝަން ފޯމުތައް އިވެލުއޭޓްކުރުމަށްފަހު އުއްމީދަކީ މިއަހަރުގެ ޑިސެމްބަރުމަހުގެ ތެރޭގައި މި 30 ގޯތި ލިބޭ ފަރާތްތަކަށް، ބިން ދޫކުރުންކަމަށެވެ.
ގޯއްޗަށް އެދޭ ފަރާތްތަކަށް، އެކަމަށް އެދި ކުރިމަތިލުމަށް ފައިނު ކައުންސިލުން ހުޅުވާލާފައިވަނީ މިމަހުގެ 23 ގެ ނިޔަލަށެވެ. ގޯއްޗަށް އެދޭ ފޯމް ފުރިހަމަކޮށް ކައުންސިލް އިދާރާއަށް ނުވަތަ ކައުންސިލުގެ އީމެއިލް މެދުވެރިކޮށް ހުށަހެޅޭނެކަމަށް ކައުންސިލުން ވިދާޅުވެއެވެ.
ފައިނުން އެންމެފަހުން ގޯތި ދޫކޮށްފައިވަނީ 2017 ވަނަ އަހަރުގެ ތެރޭގައެވެ. އެފަހަރު ކައުންސިލުން ދޫކޮށްފައިވަނީ 28 ގޯއްޗެކެވެ. ގާތްގަނޑަކަށް 58 ހެކްޓަރުގެ މި ރަށުގައި 500 އަށްވުރެ ގިނަ މީހުން ދިރިއުޅެމުންދާއިރު، ރަށުގައި މީހުން ދިރިއުޅޭ 73 ގޯއްޗެއް އެބަހުއްޓެވެ.