ތިލަފުއްޓަށް ގެންދާ ކުނި ވަކިކުރުމަށްޓަކައި ކުނި ވަކިކުރާ މެޝިނެއް ބެހެއްޓުމަށް އެންވަޔަރަންމަންޓް މިނިސްޓްރީއާއި ވެމްކޯއާއި ޕާލޭގެ މެދުގައި އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން ތިލަފުށީގައި ބަހައްޓާ މި މެޝިނަކީ ރާއްޖޭގައި ފުރަތަމަފަހަރަށް ބަހައްޓާ މިފަދަ މެޝިނެވެ.
މި އެއްބަސްވުމުގެ ދަށުން މި މެޝިން ޑިޒައިންކޮށް އިންސްޓޯލް ކުރުމުގެ މަސައްކަތްތައް ކުރާނީ ޕާލޭއިންނެވެ. ވެމްކޯއިން ވިދާޅުވީ ކުނި ވަކިކުރަން ގެންނަ މި މެޝިނަކީ އެއްވެފައި ހުންނަ ކުނިތަކުގެ ތެރެއިން ދަނގަޑުގެ ބާވަތްތަކާއި ޕްލާސްޓިކާއި އެހެނިހެން ކުނިތައް އޮޓޯއިން ވަކިކޮށްދިނުމުގެ ޤާބިލްކަން ލިބިފައިވާ މެޝިނެއްކަމަށެވެ.
The Ministry of Environment, Climate Change, and Technology, @WAMCOmv, and @parleymv today signed a joint MoU to design and install a waste sorting line at the Thilafushi Regional Resource Waste Management Facility. pic.twitter.com/r9ZEGeMrgH
— Min. of Environment, Climate Change and Technology (@MoEnvmv) October 10, 2022
ރާއްޖޭގައި ރައްކާތެރި ގޮތުގައި ކުނި މެނޭޖް ކުރުމަށް ކުރަމުން އަންނަ މަސައްކަތުގެ ދަށުން މިހާރު ތިލަފުއްޓަށް ގެންދަނީ އެކި ބާވަތުގެ ކުނިތައް ވަކި ކުރުމަށްފަހުގައެވެ. އަދި އެ މަސައްކަތް މިވަގުތު ވެމްކޯގެ މުވައްޒަފުން ކުރަމުން އަންނަނީ އަތުންނެވެ. ނަމަވެސް މި މެޝިނާއެކު މިކަމަށް ހައްލެއް ލިބި ތިލަފުށީގައި ބަހައްޓާ ކުނިން ހަކަތަ އުފައްދާ މަޝްރޫޢުއަށްވެސް ފަސޭހަ ވެގެންދާނެކަމަށް ވެމްކޯއިން ވިދާޅުވެއެވެ.
ރާއްޖޭގައި ކުނިން ހަކަތަ އުފެއްދުމުގެ މަޝްރޫޢުގެ ދަށުން ޤާއިމްކުރާ ކުނިން ހަކަތަ އުފައްދާ ޕްލާންޓަކީ ދުވާލަކު 500 ޓަނުގެ ކުނި މެނޭޖްކުރެވޭވަރުގެ ޕްލާންޓެކެވެ. މިޕްލާންޓްގެ ސަބަބުން ކުނި މެނޭޖްކުރުމަށް ބޭނުންވާ ޖާގަ ކުޑަވެ، ވައި ތަޣައްޔަރުވުން ކުޑަކޮށް، އިޔާދަކުރަނިވި ހަކަތަ އުފެއްދުމަށް ބޮޑު ފަސޭހައެއް ވެގެންދާނެއެވެ.
ސަރުކާރުން އަންނަނީ ތިލަފުށީގެ އިތުރަށް ރީޖަނަލް ވޭސްޓް ސެންޓަރުތައް ޤާއިމްކޮށް އެތަންތަނުން ކުނި މެނޭޖްކުރުމުގެ މަސައްކަތްތައްވެސް ކުރައްވަމުންނެވެ. އަދި ރަށުފެންވަރުގައި ރައްކާތެރި ގޮތުގައި ކުނި ވަކިކޮށް މެނޭޖް ކުރުމުގެ މަސައްކަތްތައްވެސް އަންނަނީ ކުރަމުންނެވެ.