ގދ. ތިނަދޫގައި 200 ހައުސިން ޔުނިޓް އެޅުމުގެ މަސައްކަތް ކުރުމަށް ބަޔަކާ ހަވާލުކޮށްފިއެވެ. މި މަސައްކަތް ހަވާލުކޮށްފައިވަނީ ސިއެރާ ކޮންސްޓްރަކްޝަން އާއި ސްޓަރ ކޮންސްޓްރަކްޝަންގެ ޖޮއިންޓް ވެންޗަރ އާއެވެ.
އާބާދީގައި 7500އަށް ވުރެ ގިނަ މީހުން ދިރިއުޅޭ ތިނަދޫއަށް ދިމާވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަމުގެ މައްސަލައެވެ. އެހެންކަމުން 200 ހައުސިން ޔުނިޓާއެކު ތިނަދޫގެ ބޯީހިޔާވަހިކަމށް ކޮންމެވެސް ވަރެއްގެ ހައްލެއް ލިބޭނެކަމަށް އެރަށު ކައުންސިލުން ވިދާޅުވެއެވެ.
ޕްލޭނިން މިނިސްޓްރީގައި މިއަދު އޮތް ރަސްމިއްޔާތެއްގައި މި މަސްކަތުގެ އެއްބަސްވުމުގައި ޕްލޭނިން މިނިސްޓްރީގެ ފަރާތުން އެއްބަސްވުމުގައި ސޮއި ކުރެއްވީ ޑިރެކްޓަރ ޖެނަރަލް އަހްމަދު ވިޝާން ނަސީމުއެވެ. ސިއެރާގެ ފަރާތުން ސޮއި ކުރެއްވީ އެމްއެޗްޕީ ޕްރަސާދު އެރަތުނާއެވެ.
ސިއެރާ އިން އަމިއްލައަށް ހައުސިން ޔުނިޓްތައް ޑިޒައިންކޮށް އަދި އިމާރާތް ކުރާ ގޮތަށް ހަވާލުކޮށްފައިވާ މިމަޝްރޫއު 540 ދުވަހުގެ ތެރޭގައި ނިންމަންޖެހެއެވެ. މިއަހަރުގެ ދައުލަތުގެ ޕީއެސްއައިޕީ ބަޖެޓުގެ ތެރެއިން ކުރިއަށްގެންދާ މި މަޝްރޫޢުއަށް 253.99 މިލިޔަން ރުފިޔާ ޚަރަދުވާކަމަށް ޕްލޭނިން މިނިސްޓްރީން ވިދަޅުވެއެވެ.
ތިނަދޫގައި އަޅާ ކޮންމެ ހައުސިން ޔުނިޓެއްގައި 700 އަކަފޫޓް ހުންނާނެއެވެ. ޕްލޭނިން މިނިސްޓްރީން ވިދާޅުވީ ތިނަދޫގައި އަޅާ ކޮންމެ ހައުސިން ޔުނިޓެއްގައި ތިން ކޮޓަރިއާއި ތިން ފާހާނާއާއި ސިޓިންރޫމް ހުންނާނެކަމަށެވެ. އަދި ބަދިގެ، ކާގެ، ލޯންޑަރީ އަދި ސްޓޯ ރޫމެއް ވެސް ކޮންމެ އެޕާޓްމެންޓެއްގައި ހުންނާނެކަމަށް މިނިސްޓްރީން ވިދާޅުވިއެވެ.
މީގެއިތުރުން ހައުސިން ޔުނިޓްތަކުގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއް ގާއިމުކުރުމަށްޓަކައި ޔުނިޓްތައް ވަށައިގެން އަލި ކުރެވޭނެ ކަމަށާއި، މުނިފޫހިފިލުވާލުމަށް ޕާކަކާއި އަދި ވެހިކަލް ޕާކް ކުރުމަށްވެސް ހާއްސަ ތަނެއް ތަރައްޤީކުރުމަށް ވަނީ ކަނޑައަޅާފައެވެ.
ސަރުކާރުން އަންނަނީ ރާއްޖޭގެ އެކި ކަންކޮޅުތަކުގައި ބޯހިޔާވަހިކަމުގެ މައްސަލަ ހައްލުކުރުމަށް ހައުސިންގ ޔުނިޓްތައް އެޅުމުގެ މަސައްކަތްކުރަމުންނެވެ. އެގޮތުން ދާދިފަހުންވެސް ވަނީ ގިނަ ރަށްތަކެއްގައި ހައުސިން ޔުނިޓް އަޅާދޭނެ ބަޔަކު ހޯދަން އިއުލާންކޮށްފައެވެ.
ހައުސިން ޔުނިޓް އެޅުމަށް ނިންމާފައިވާ ރަށްތައް
* ށ.ކޮމަންޑޫ 30 ހައުސިން ޔުނިޓް،
* ޅ.ކުރެންދޫ 50 ހައުސިން ޔުނިޓް
* ހއ.ދިއްދޫ 75 ހައުސިން ޔުނިޓް
* ހދ.ކުޅުދުއްފުށީގައި 400 ހައުސިންގ ޔުނިޓް
* ލ.ގަމުގައި 100 ރޯހައުސް،
* ށ.މިލަންދޫގައި 50 ހައުސިންގ ޔުނިޓް،
* ގއ.ވިލިނގިލީގައި 50 ހައުސިންގ ޔުނިޓް
* ނ.ހޮޅުދޫގައި 30 ހައުސިންގ ޔުނިޓް،
* ޅ.ހިންނަވަރުގައި 100 ހައުސިން ޔުނިޓް
* ނ.މަނަދޫގައި 40 ހައުސިން ޔުނިޓް
މި ރަށްތަކުގެ ތެރެއިން ބައެއް ރަށްރަށުގައި ހައުސިން މަޝްރޫޢުތައް ކުރިއަށް ގެންދިޔުމަށް މިހާރު ވަނީ ހަވާލުކޮށްފައެވެ. އަދި ބައެއް ރަށްތަކުގައި މިހާރު އެކަމުގެ ޢަމަލީ މަސައްކަތްތައް ވަނީ ފަށާފައެވެ.
ބޯހިޔާވަހިކަމުގެ ދަތިކަން ހުރި ރަށްތަކާއި، އަދި ބިމުގެ ޖާގަ ދަތިވެ ގެވަޅު ދިނުމަށް ދަތިވެފައިވާ ރަށްތަކުގައި ސަރުކާރުގެ އެހީގައި ހައުސިންގ މަޝްރޫޢުތައް އަންނަނީ ކުރިއަށްގެންދަމުންނެވެ. މިއަހަރުގެ ތެރޭގައި 2000 އަށްވުރެ ގިނަ ހައުސިންގ ޔުނިޓުގެ މަސައްކަތް ނިމޭނެކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ވަނީ ހާމަކުރައްވާފައެވެ.
ކޮންޓްރެކްޓަރ ފައިނޭންސް އުސޫލުން މިވަގުތު 1687 ހައުސިންގ މަޝްރޫޢުގެ މަސައްކަތް ކުރިއަށްދާކަމަށް ހައުސިންގ މިނިސްޓްރީން ވިދާޅުވެއެވެ.