ވިއްސާރައިގެ ސަބަބުން ލިބިދާނެ ގެއްލުމަކުން ރައްކާތެރިވުމަށް ދުރާލާ ފިޔަވަޅު އެޅުމަށް އިލްތިމާސްކޮށްފި
ވިއްސާރައިގެ ސަބަބުން މުދަލާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލާ ފިޔަވަޅު އެޅުމަށް ނޭޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން އިލްތިމާސްކޮށްފިއެވެ.
އެން.ޑީ.އެމް.އޭއިން މިކަމަށް އިލްތިމާސްކުރައްވާފައިވަނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށްއޮތް 5 ދުވަހު ރާއްޖޭގެ ބޮޑުބަޔަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާއިން ވިދާޅުވެފައިވަނިކޮށެވެ. ވިއްސާރައިގެ ސަބަބުން މުދަލާ ގެދޮރަށް ލިބިދާނެ ގެއްލުމަކުން ރައްކާތެރިވުމުގެގޮތުން ދުރާލާ ފިޔަވަޅު އެޅުން މުހިއްމުކަމަށް އެން.ޑީ.އެމް.އޭއިން ވިދާޅުވެއެވެ.
އެގޮތުން ވާރޭވެހި ފެންބޮޑުވެދާނެކަމަށް ތައްޔާރުވުމަށާއި، ގެއަށް ފެން ނުވަންނާނެ ހެން ރައްކާތެރިކަމުގެ ފިޔަވަޅު އެޅުމަށް އެ އޮތޯރިޓީން ވަނީ އިލްތިމާސްކުރައްވާފައެވެ. އަދި ގޭތެރޭގައި ފެންބޮޑުވެއްޖެ ހިނދެއްގައި ގެއްލުންވެދާނެ މުދާ ފެން ނުޖެހޭ ފަދަ އުސްތަންތަނަށް ބަދަލުކުރުމަށާއި އުސް ތަންތަނަށް ބަދަލުނުކުރެވޭ ތަކެތި ފެނުގެ އަސަރު ނުފޯރާނެ ތަނަކަށް ބަދަލުކުރުމަށް އެން.ޑީ.އެމް.އޭއިން އިލްތިމާސްކުރެއެވެ.
މީގެ އިތުރުން ގަދަ ވައިގެ ސަބަބުން އެއްލާލަފާނެ ތަކެތި ބަނދެ ރައްކާތެރިކުރުމަށާއި، ކަރަންޓުން ބޭނުންކުރާ ތަކެތި، ބޭނުންކުރުމަށްފަހު ނިއްވާލާފައި ބެހެއްޓުމަށްވެސް އެ އޮތޯރިޓީން ވަނީ ނަސޭޙަތްތެރިވެފައެވެ. ހަމައެހެންމެ ކަނޑުދަތުރުކުރާ ފަރާތްތަކުން މޫސުމަށް ބަލައިގެން ދަތުރުކުރުމަށާއި، ދަތުރަށް ނުކުންނައިރު ސަލާމަތީ ކަންކަމާއި މުއާސަލާތީ ނިޒާމު ފުރިހަމަކަން ޔަޤީންކުރުމަށްވެސް އެން.ޑީ.އެމް.އޭއިން ވިދާޅުވެއެވެ.
މޫސުމާބެހޭ ގައުމީ އިދާރާއިން ވިދާޅުވެފައިވަނީ، ރާއްޖެ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށް އޮތް 5 ދުވަހު ހާއްސަކޮށް އުތުރާއި މެދު ރާއްޖެ ތެރޭގައި ވައިގަދަވުމާއެކު ކަނޑުތައް ވަރަށް ބޮޑަށް ގަދަވާނެކަމަށް ލަފާކުރެވޭ ކަމަށެވެ. އެހެންކަމުން ކަނޑު ދަތުރުފަތުރުކުރާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ..
ކުރިއަށް އޮތް 5 ދުވަހު ރާއްޖޭގެ ބައެއް ސަރަހައްދުތަކުގައި ކަނޑުތައް ވަރަށް ގަދަވާނެކަމަށް ލަފާކޮށްފައިވާއިރު، ރާއްޖޭގެ ބައެއް ސަރަހައްދުތަކަށް ވަނީ ވޭތުވެދިޔަ ގަޑިއިރުތަކުގެ ތެރޭގައި މޫސުން ގޯސްވާނެކަމަށް ލަފާކޮށް ޔެލޯ އެލާޓްވެސް ނެރެފައެވެ.
މޫސުމާބެހޭ ޤައުމީ އިދާރާގެ ވޭތުވެދިޔަ 24 ގަޑިއިރުގެ ރިކޯޑްތައް ދައްކާގޮތުން އެންމެ ގިނައިން ވާރޭވެހުނުކަމަށް ރިކޯޑްކުރެވިފައިވަނީ ހދ.ހަނިމާދޫއަށެވެ. އެރަށަށް 17.4 މިލިމީޓަރުގެ ވާރޭވެހިފައިވެއެވެ.