ޙިމާޔަތްކޮށްފައިވާ ދޫނި ހިފައި، ހައްޔަރުކޮށް އަދި ގޯނާކުރާ ފަރާތްތަކާއިމެދު
ފިޔަވަޅު އަޅާނެކަމަށް އެންވަޔަރްމަންޓަލް ޕްރޮޓެކްޝަން އެޖެންސީ، އީ.ޕީ.އޭ އިން
ވިދާޅުވެއްޖެއެވެ.
އީ.ޕީ.އޭ އިން
ނެރުއްވާފައިވާ ނޫސްބަޔާނެއްގައި ވިދާޅުވީ، މިދުވަސްވަރަކީ އެހެނިހެން
އަހަރުތަކެކޭ އެއްފަދައިން ދުނިޔޭގެ އެކިކަންކޮޅުތަކުން ވަރަށް ގިނަ ބާވަތެއްގެ
ދޫނި ރާއްޖެއަށް ހިޖުރަކުރަމުންދާ ދުވަސްވަރުކަމަށެވެ. އަދި މިގޮތަށް ހިޖުރަކުރާ
ދޫނިތަކަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއިބެހޭ ޤާނޫނުގެ
ދަށުން ހަދާފައިވާ، "ދިވެހިރާއްޖެއަށް ހިޖުރަކުރާ ދޫނި ހިފައި،
ގެންގުޅުމާއިބެހޭ ޤަވާޢިދު"ގެ ދަށުން ޙިމާޔަތްކޮށްފައިވާ ދޫނިތަކެއްކަމަށެވެ.
އެހެންނަމަވެސް ކޮންމެ އަހަރަކު މިދުވަސްވަރު ވަރަށް ގިނަ ފަރާތްތަކުން މިފަދަ
ދޫނި ހިފައި، ހައްޔަރުކޮށް ގޯނާކުރަމުންދާތީ އެކަމާއި ކަންބޮޑުވާކަމަށް
ވިދާޅުވެފައިވެއެވެ.
އެހެންކަމުން
މިގޮތަށް ޙިމާޔަތްކުރެވިފައިވާ ދޫނި ހިފައި، ހައްޔަރުކޮށް އަދި ގޯނާކުރާ
ފަރާތްތަކާމެދު ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއިބެހޭ
ޤާނޫނުގެ ދަށުން ހަދާފައިވާ "ތިމާވެށްޓަށް ދޭ ގެއްލުންތަކަށް ޖޫރިމަނާ
ކަނޑައެޅުމާއި ބަދަލު ހޯދުމުގެ ޤަވާޢިދު" އާއި ދިވެހިރާއްޖެއަށް ހިޖުރަކުރާ
ދޫނި ހިފައި ގެންގުޅުމާއި ބެހޭ ޤަވާޢިދުގެ ދަށުން ބޮޑެތި ޢަދަދުތަކުން
ޖޫރިމަނާކުރެވޭނެކަމަށެވެ. މިޤަވާޢިދުގެ ދަށުން މިފަދަ ޢަމަލުކުރާ ފަރާތްތައް 501 ރުފިޔާ
އާއި 50،000 ރުފިޔާއާއި ދެމެދުގެ އަދަދަކުން ޖޫރިމަނާ ކުރެެވޭނެއެވެ. އަދި އެކަންތައް
ތަކުރާކުރާ ކޮންމެ ފަހަރަކު، އެންމެ ފަހުން ޖޫރިމަނާ ކުރި ޢަދަދަށް އެއްހާސް
ރުފިޔާ ޖޫރިމަނާގެގޮތުގައި އިތުރުކުރެވޭނެކަމަށްވެސް މިޤަވާޢިދުގައި ބުނެއެވެ.