ފުވައްމުލައް ސިޓީގެ އެތެރޭގެ މަގުތައް ހެދުމުގެ މަޝްރޫޢުގެ މަސައްކަތުގެ ބޮޑުބައި މިހާރު ނިމިފައިވާކަމަށް މި މަސައްކަތުގެ ކޮންޓްރެކްޓަރ، އެމް.ޓީ.ސީ.ސީން ވިދާޅުވެއްޖެއެވެ.
ފުވައްލުމައް ސިޓީގެ އެތެރޭގެ މަގުތައް، ތާރުއަޅައިގެން ޒަމާނީ ފެންވަރަށް ތަރައްޤީކުރުމުގެ މަސައްކަތް އެމްޓީސީސީއާ ޙަވާލުކޮށް ޢަމަލީ މަސައްކަތްފެށީ 2020 ވަނަ އަހަރުގެ ފަހުކޮޅުއެވެ. މި މަޝްރޫޢުގައި ހިމެނެނީ ރަށުގެ 31 މަގު ތާރު އަޅައިގެން ޒަމާނީ ފެންވަރަށް ތަރައްޤީކުރުމުގެ މަސައްކަތެވެ. އެއީ 95،239 އަކަމީޓަރުގެ ސަރަޙައްދެވެ. މި މަސައްކަތުގައި ތާރުއެޅުމުގެކުރިން ކުރާ ޕޭމަންޓާއި އަދި ޖަންކްޝަންތަކުގެ ގިނަ މަސައްކަތްތަކެއްވަނީ ނިންމާފައެވެ.
ނަމަވެސް މަގުތަކުގައި ތާރު އެޅުމުގެ މަސައްކަތް ނުފެށި ލަސްވީ ބޭނުންވާ ސާމާނު ލިބުމުގައި ލަސްތަކެއް ހުރުމުންކަމަށް އެމް.ޓީ.ސީ.ސީންވަނީ ވިދާޅުވެފައެވެ. މި މަސައްކަތް ނުނިމި ލަސްވުމުގެ ކަންބޮޑުވުން ރަށުގެ ރައްޔިތުންވެސް ދަނީ ފާޅުކުރަމުންނެވެ. މި މަސައްކަތް އަވަސްކުރުމުގެގޮތުން ތާރުއެޅުމަށް ބޭނުންވާ އިތުރު ސާމާނު މިދިޔަ އޭޕްރީލްމަހު އެމް.ޓީ.ސީ.ސީން ވަނީ ފުވައްމުލަކަށް ގެންގޮސްފައެވެ.
މި މަޝްރޫޢުގެ މަސައްކަތް މިހާރު ކުރިއަށްގޮސްފައިވާ ހިސާބާގުޅޭގޮތުން އެމް.ޓީ.ސީ.ސީން ވިދާޅުވީ، މުޅި މަޝްރޫޢުގެ ގާތްގަނޑަކަށް %72 މަސައްކަތް ފުރިހަމަކުރެވިފައިވާކަމަށެވެ. އަދި ފެންހިންދާ ނިޒާމު ޤާއިމުކުރުމުގެ މަސައްކަތް މިހާރު ކުރަމުންދާކަމަށް އެކުންފުނިން ވިދާޅުވެއެވެ.
ފެން ބޮޑުވުމުގެ މައްސަލައަކީ ފުވައްމުލަކަށް ދިމާވެފައި އޮތް ބޮޑު މައްސަލައެވެ. އެސިޓީގެ މަގުތަކުގެ ފަސްގަނޑު ހަރުވުމާއި ވިއްސާރަވާ ދުވަސްވަރު ފެން ނުހިނދި މަގުތައް ޗަކަވާ މައްސަލަ ފުވައްމުލައް ސިޓީއަށް ވަރަށްބޮޑަށް ކުރިމަތިވެއެވެ. އެސިޓީގެ އެތެރޭގެ މަގުތައް ހެދުމުގައި ބަލާފައިވަނީ ރަށުގައި ޢާއްމުކޮށް ބޭނުންކުރާ މުހިންމު ބޮޑެތި މަގުތަކަށް އިސްކަން ދިނުމުގެ ތަރުތީބެކެވެ. އެގޮތުން ހޮސްޕިޓަލާއި، ސްކޫލާއި އަދި ސަރުކާރުގެ އިދާރާތަކުގެ ޚިދުމަތް ހޯދާ ފަރާތްތަކަށް ފަސޭހައިން އެތަންތަނަށް ދެވޭނެ މަގުތަކަށް ހިމެނެއެވެ.
މި މަޝްރޫޢުގެ ދަށުން، 122,659 އަކަމީޓަރުގެ ސަރަޙައްދެއްގައި ސަބްބޭސް އެޅުމާއި، 95،239 އަކަމީޓަރުގެ ސަރަހައްދެއްގައި ތާރު އެޅުމާއި، 27،450 އަކަމީޓަރުގެ ފުޓްޕާތް ހެދުމާއި، މަގުމަތީ ނިޝާން ހަރުކުރުމާއި، މަގުބައްތި ހަރުކުރުމާއި، 19،940 މީޓަރުގެ ފެންހިންދާ ނިޒާމެއް ޤާއިމުކުރުމުގެ މަސައްކަތް ހިމެނެއެވެ. މި މަޝްރޫޢަކީ 331.05 މިލިއަން ރުފިޔާގެ މަޝްރޫޢެކެވެ.
ފުވައްމުލައް ސިޓީގެ މަގު ހެދުމުގައި އެންމެ ފުރަތަމަ ކުރިއަށްގެންދިޔައީ ރަށުގައި ވަށައިގެން އޮންނަ ވަށަމަގުގައި ތާރު އަޅައިގެން ތަރައްޤީކުރުމުގެ މަސައްކަތެވެ. 2016 ވަނަ އަހަރު ފެށި މަސައްކަތް ހުއްޓިފައިވަނިކޮށް، 2019 ވަނަ އަހަރު އެމް.ޓީސީ.ސީއާ ހަވާލުކޮށް މިހާރުވަނީ މަސައްކަތް މުޅިން ނިންމާލާފައެވެ.