ފަރެސްމާތޮޑާއާއި އެއަރޕޯޓް ގުޅާލައި ކޯސްވޭގެ މަސައްކަތް އެމްޓީސީސީން ފަށައިފިއެވެ. އެއަރޕޯޓުގެ މަސައްކަތާއި ކޯޒްވޭގެ މަސައްކަތަކީ ވަކިން ޙަވާލުކޮށްފައިވާ ދެ މަޝްރޫޢެވެ. ފަރެސްމާތޮޑާ އެއަރޕޯޓްގެ ޢަމަލީ މަސައްކަތް ޖުލައި މަހު ނިންމަން އެމްޓީސީސީން އަންނަނީ މަސައްކަތް ކުރަމުންނެވެ.
ފަރެސްމާތޮޑާ އެއަރޕޯޓްގެ ޢަމަލީ މަސައްކަތް ފެށީ ނިމުނު އަހަރު ކުރީކޮޅުއެވެ. މަޝްރުޢުގެ ބޮޑެތި ހުރިހާ މަސައްކަތްތައް މިހާރުވަނީ ނިމުމަކާ ގާތްވެފައެވެ. އެގޮތުން އެއަރޕޯޓްގެ ރަންވޭގައި ތާރު އެޅުމުގެ މަސައްކަތުން ފެށިގެން އެއަރޕޯޓްގެ ޓަރމިނަލްގެ ގިނަ މަސައްކަތްތައްވެސް މިހާރު ވަނީ ނިމިފައެވެ.
ރަންވޭގެ ތާރުއެޅުމުގެ މަސައްކަތްތައް މި ޖޫން މަސް ތެރޭގައި މުޅިން ނިންމާނެކަމަށް އެމްޓީސީސީން ވިދާޅުވެއެވެ. ފަރެސްމާތޮޑާއާއި އެއަރޕޯޓް ގުޅާލާ ކޯޒްވޭގެ މަސައްކަތްވެސް ހަވާލުކޮށްފައިވަނީ އެމްޓީސީސީއާއެވެ. ރަށާއި އެއަރޕޯޓާއި ދެމެދު ގާތްގަނޑަކަށް 800މީޓަރު ހުންނާނެއެވެ. އެމްޓީސީސީން މިހާރު މިވަނީ ކޯޒްވޭގެ ޢަމަލީ މަސައްކަތްތައް ފަށާފައެވެ. ކޯޒްވޭ ހެދުމަށް 19200 އަކަމީޓަރުގެ ސަރަޙައްދެއް ހިއްކާނެއެވެ. އަދި ހިއްކާ ސަރަޙައްދު ޙިމާޔަތްކުރުމަށް 120 މީޓަރުގެ ރިވެޓްމަންޓް ޖެހުމަށްވެސް ވަނީ ހަމަޖެހިފައެވެ.
މަޝްރޫޢުގައި ކޯޒަވޭ ތަރައްޤީކުރާނީ އެއަރޕޯޓްގެ މައި މަގުތަކާވެސް ގުޅޭގޮތަށެވެ. އަދި ކޯޒަވޭގެ ދަށުން އޮއެ ދެމޭގޮތަށެވެ. އެމްޓީސީސީން މީގެކުރިން ވިދާޅުވެފައިވަނީ ކޯޒްވޭގެ މަސައްކަތްތައް މުޅިން ނިންމުމަށް ގާތްގަނޑަކަށް 7 މަސްދުވަހުގެ މުއްދަތެއް ހޭދަވާނެކަމަށެވެ.
އެމްޓީސީސީން ޢަމާޒު ހިފާފައިވަނީ އެއަރޕޯޓްގެ ޢަމަލީ މަސައްކަތްތައް މުޅިން ނިންމާ، ޖުލައި މަސް ތެރޭގައި ސަރުކާރާއި އެއަރޕޯޓް ހަވާލުކުރުމަށެވެ.
އެއަރޕޯޓް ތަރައްޤީކުރަނީ އެތެރޭގެ އުދުހުންތަކަށް ޚާއްސަކޮށްގެންނެވެ. ރަންވޭއަކީ 1200 މީޓަރުގެ ދިގު ރަންވޭއެކެވެ. ފަރެސްމާތޮޑާ އެއަރޕޯޓްގެ ޓަރމިނަލްވެސް ތަރައްޤީކުރަނީ ތަފާތު ސްޓްރަކްޗަރއަކަށެވެ. މިއީ ޕްރީ ފެބްރިކޭޓެޑް އިމާރާތަކެވެ.
މި ޕްރޮޖެކްޓަކީ ސަރުކާރުން 144.8 މިލިއަން ޚަރަދުކޮށްގެން ކުރިއަށްގެންދާ މަޝްރޫޢެކެވެ.