ބާވެ ހަލާކުވެފައިވާ މުސްޙަފުތައް އެއްކުރުމުގެ ހަރަކާތެއް އައްޑޫގައި ކުރިއަށްގެންދިޔުމަށް އެ އަތޮޅުގެ އަމިއްލަ ޖަމްޢިއްޔާއަކުން ނިންމައިފިއެވެ.އައްޑޫ ސިޓީގެ ހިތަދޫ ނޫރުލް ޖަމްޢިއްޔާއިން ބުނީ، ﷲގެ ފޮތަށް މާތްކޮށް ހިތުމުގެ މަޝްރޫޢުގެ ނަމުގައި ކުރިއަށްގެންދާ މަޝްރޫޢުގެ ދަށުން ބާ މުސްހަފްތައް ބަލައިގަތުމުގެ މަސައްކަތް މިއަދު ހަވީރާއި ރޭގަނޑު ހިތަދޫ ބޮޑުމަގުގައި ކުރިއަށްގެންދާނެކަމަށެވެ. އެގޮތުން ހިތަދޫ ބޮޑުމަގުގައި މިކަމަށް ޚާއްސަކޮށްގެން މޭޒެއް ބަހައްޓައިގެން މަޢުލޫމާތު ދިނުމާއި މުސްޙަފުތައް ޖަމާކުރުމުގެ ކަންކަން ކުރިޔަށްދާނެ ކަމަށް އެ ޖަމްޢިއްޔާއިން ބުނެއެވެ.މިމަޝްރޫޢު މިއަދު ހިތަދޫގައި ފެށުމަށްފަހު ކުރިޔަށް އޮތްތާންގައި އައްޑޫގެ އެހެން އަވަށްތަކުގައިވެސް ކުރިއަށްގެންދަން ނިންމާފައިވާކަމަށްވެސް އެޖަމްޢިއްޔާއިން ބުނެއެވެ.ބާވެފައިވާ މުސްހަފުތައް އެއްކުރުމުގެ މަޝްރޫޢު ކުރިއަށްގެންދަން ނިންމީ، ބައެއް މީހުން މުސްހަފުތަކަށް ދޭންޖެހޭ ޤަދަރާއި އިޙްތިރާމް ކުޑަވާގޮތަށް އެކި ތަންތަނަށް މުސްޙަފުތައް އުކާލާފައި ހުންނަކަމަށް ފާހަގަކުރެވޭތީ، ރަގަޅުގޮތުގައި މުސްޙަފުތައް ނައްތާލަން ބާރުއެޅުމުގެ ގޮތުންކަމަށް ނޫރުލް ޖަމްޢިއްޔާއިން މަޢުލޫމާތުދެއެވެ.