ސަރުކާރުން ކިތަންމެ ބޭނުންވާ ކަމަށްވިޔަސް އަދި ރައީސްގެ ވަޢުދުފުޅަކަށް ވީނަމަވެސް، އެއްވެސް މަޝްރޫޢުއެއްގެ މަސައްކަތް މިސަރުކާރުން ފަށާނީ އެކަމަށް ބޭނުންވާ ފައިސާއާއި، އެކަމުގެ ދިރާސާތައް ފައިނަލް ކުރުމަށްފަހުކަމަށް ޕްލޭނިން މިނިސްޓަރ އަސްލަމް ވިދާޅުވެއްޖެއެވެ. މީގެކުރީގެ ބައެއް ސަރުކާރުތަކުން ވަނީ ބަޖެޓާއި ޕްލޭން ފައިނަލް ނުވަނީ ބައެއް މަޝްރުޢުތައް ނަމެެއްގައި ފަށާފައެވެ. އޭގެ ސަބަބުން މަޝްރޫޢުތައް ކުރިއަށް ނުގޮސް އެތައް މައްސަލަތަކެއް ވަނީ ކުރިމަތިވެފައެވެ.
މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމްވަނީ، ތ.ވޭމަންޑުއާއި ކިބިދޫގެ ކޯސްވޭގެ މަސައްކަތް ނުފެށި ލަސްވަމުންދާތީ އެކަމާއި ގުޅޭގޮތުން ސުވާލުކުރުމަށް މަޖިލީހަށް ހާޒިރުކޮށްފައެވެ.
ތ.ވޭމަންޑުއާއި ކިނބިދޫގެ ކޯޒްވޭއަކުން ގުޅާލުމުގެ މަސައްކަތް، މިދިޔަ އަހަރު އަދި މިއަހަރުގެ ބަޖެޓުގައިވެސް ހިމަނާފައިވެއެވެ. ދެ ރަށް ގުޅާލުމަށް 3 ކިލޯމީޓަރުގެ ކޮޒްވޭއެއް ހަދަން ޖެހެއެވެ. ނަމަވެސް މަސައްކަތަށް ބަޖެޓުގައި ކަނޑައަޅާފައިވަނީ 1މިލިއަން ރުފިޔާގެ ބަޖެޓެކެވެ.
މަޖިލީހުގައި ވާހަކަދައްކަވަމުން މިނިސްޓަރ އަސްލަމް ވިދާޅުވީ ޕްރޮޖެކްޓްގެ މަސައްކަތްތައް ކުރިއަށް ގެންދެވޭނެ ގޮތްތައް ބަލަމުންދާކަމަށެވެ. އެގޮތުން އެންމެ ބޮޑު މައްސަލައެއްގެ ގޮތުގައި ފާހަގަކުރެވުނީ، ދެ ރަށުގެ ދެމެދުގައި އޮތް "އެލާ"ކިޔާ ފަޅުރަށް ރިސޯޓެއް ހެދުމަށް ދޫކޮށްފައި އޮތުމުންކަމަށެވެ. ނަމަވެސް ޓުއަރިޒަމް މިނިސްޓްރީއާއެކު މަޝްވަރާކޮށް، މިހާރު އެ ރަށުގައި ރިޒޯޓް ތަރައްޤީނުކުރާގޮތަށް ރަށް ނަގާފައިވާކަމަށެވެ.
އަދި ޕްރޮޖެކްޓް ފެށުމަށް ޚަރަދުވާނެ މިންވަރު އަންދާޒާކުރާ ސަރވޭތައްވެސް ހަދާފައިވާކަމަށެވެ. މިނިސްޓަރ ވިދާޅުވީ މި ޕްރޮޖެކްޓަށް 522 މިލިއަން ރުފިޔާ ޚަރަދުވާނެކަމަށް ޕްލިމިނަރީ އެސެސްމަންޓުން ދައްކާފައިވާކަމަށެވެ. އެއީ ކޯޒަވޭގެ މީޓަރަކަށް 174ހާސް ރުފިޔާއެވެ. ނަމަވެސް ފައިސާގެ ކަންކަން އަދި ހަމަޖެހިފައި ނުވާތީ، ޢަމަލީ މަސައްކަތް ފެށޭނެ ތާރީޚެއް އަދި ބުންނަން ނޭންގޭކަމަށެވެ. ނަމަވެސް މި ޕްރޮޖެކްޓް ހުއްޓާނުލާ، ކުރިއަށްގެންދާނެ ކަމުގެ ޔަގީންކަން މިނިސްޓަރ ވަނީ ދީފައެވެ.
"ޕްރޮޖެކްޓް ހުއްޓާލާކަށް ނޫޅެން. "އެލާ" އަނބުރާ ހޯދުމާއި އަދި އެސެސްމަންޓްތައްވެސް މި ހެދީ، ރައީސްގެ ވަޢުދާ އެއްގޮތަށް މަސައްކަތް ކުރިއަށްގެންދިއުމަށް." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ވަޢުދުގެ ގޮތުގައި ވަރަށް ގިނަ މަޝްރޫޢުތައް ހިމަނާފައިވާކަމަށެވެ. އަދި ސަރުކާރުން މަސައްކަތް ކުރަމުންދަނީ މި މަޝްރޫޢުތައް ރައީސްގެ ވަޢުދާއި އެއްގޮތަށް ކުރިއަށްގެންދިއުމަށްކަމަށެވެ. ނަމަވެސް މިކަންކަމަކީ ވަރަށް ގިނަ ޓެކްނިކަލް މަސައްކަތްތަކާއި، ބަޖެޓު ހަމަޖެއްސުމަށް ގިނަ މަސައްކަތްތަކެއް ކުރަންޖެހޭ ކަންކަން ކަމަށް މިނިސްޓަރ ވިދާޅުވިއެވެ. ވަޢުދެއްކަމުގައި ވީނަމަވެސް، ބަޖެޓު ހަމަ ނުޖެހި މަސައްކަތްތައް ނުފަށާނެކަމަށް އަސްލަމްވަނީ ވިދާޅުވެފައެވެ.