އދ.ދަނގެއްޗާބެހޭގޮތުން މުޅި ރާއްޖެއަށް މަޝްހޫރު ފޯކްލޯރެއް އޮވެއެވެ. އެއީ އެރަށށު މީހުން ހަނދު ރުނބަޔަކަށް ލީވާހަކައެވެ. އަދި ރުނބަޔަކަށް ލައިގެން ހަނދު ރާއްޖޭގެ ރަސްގެފާނަށް ވެދުމަށްއެރުވި ވާހަކައެެވެ.
މިކަމަކީ ދަނގެތީ މީހުންކުރި ސޭކުކަމެއް ކަމަށް މީހުންދެކެއެވެ. އެހެނީ އެމީހުން ކުރިކަަމަކީ ފެންއަޅާފައި ހުރި ރުނބައެއްގެ ފެންގަނޑުގެ ތެރެއިން ހަނދުގެ ހިޔަނި ފެނުމުން އެއީ ހަނދު ރުނބާގައި އޮތްކަމަށް ޤަބޫލުކުރީކަމަށް ކިޔައިއުޅެއެވެ. އަދި އެހަނދުގެ އަނގަ ދޮތިގަނޑަކުން ބަންދުކޮށް އައްސައިގެން ރުނޞާ ތަންޑިޔާ ލައިގެން މާލެއަށް ދަތުރުކުރީކަމަށާ، އަދި ރަސްގެފާނަށް ހަނދު ރުނބަޔާއެކު ވެދުމަށް އެރުވީކަމަށް ފޯކްލޯރުގައި ކިޔައި އުޅެއެވެ. އޭގެ ބަދަލުގައި ރަސްގެފާނު ދަނގެތީ މީހުންނަށް ވަރަށްގިނަ ހަދިޔާއާއި ޢިނާޔަތްތައް ދަނގެއްޗާއި އެރަށުގެ ރައްޔިތުންނަށް ދެއްވިކަމަށްވެއެވެ.
މިޙާދިސާއާ ގުޅުވައިގެން އަދިއަދަށްވެސް ބައެއް މީހުން ދަނގެތީ މީހުންނަށް ހަޖޫޖަހައި އެއީ ސޭކުކަމެއްކަމަށް ބުނެއުޅެއެވެ. އެހެންނަމަވެސް ދަނގެތީ މީހުން ދެކެނީ އެއީ ފޯކުލޯރަކަސް މޮޅުކަމެއްކަމަށެވެ. އެކަމުގެ ސަބަބުން ދަނގެއްޗަށް ރަދުންގެ ހަދިޔާއައި އެތައް ކުރިއެރުމެއް އައުމަކީ އެމީހުނަށް ކުރެވުނު މޮޅުކަމަކުން ލިބުނު ބޮޑު ފައިދާއެއްކަމަށް އެމީހުން މިއަދުވެސް ޤަބޫލުކުރެއެވެ.
ކޮންމެއަކަސް ފޯކުލޯރެއްގެ ތެރެއިން އައިސްފައިވާ ހަނދު ރުނބަޔަށް ލީ ޙާދިސާ މިއަދުވަނީ ދަނގެތީގެ މުހިންމު ރަމްޒަކަށް ވެފައެވެ. އެއީ ރަށުގެ ފަޚުރެއްކަމުގައި ރައްޔިތުން ދެކެއެވެ. ނތީޖާއެއްގެ ގޮތުން ދަނގެއްޗަށް ފައިބާއިރު މިހާރު އެރަށުގެ ބަނދަރު މަތީގައިވެސް ހަނދު ލީ ރުނބާ ރަމްޒުކޮށްދޭ ބޮޑު މޮނިއުމެންޓެއްވެސް ހަދާފައި ހުރެއެވެ. މިކަން ވެފައިވަނީ ދިވެހިންގެ ތާރީޚީ މުހިންމު ޙާދިސާއަކަށެވެ. ދަނގެތީގެ ރައްޔިތުން ބޭނުންވަނީ ދަނގެތީގެ މި ތާރީޚާއި ތަރިކަ ދިރުވާށެވެ. މި ވާހަކައަކީ އަބަދަށް ދެމިހުންނާނެ، ވާހަކައެއްގެގޮތުގައި ދަމަހައްޓާށެވެ.
ދަނގެތީ ރައްޔިތުންގެ ހިތްތަކުގައި ދިވެހި ތާރީޚާއި ސަޤާފަތަށް، އިހުގެ އާދަކާދައާއި އާސާރުތަކަށް އޮތް ލޯބި އެރަށަށް ޒިޔާރަތްކުރާ މީހުންނަށް ފެންނާނެހެން ހުރުމަކީ އެމީހުން ބޭނުންވާ ކަމެކެވެ. މިކަމަށްޓަކައި މީގެ 25 އަހަރު ކުރިން އެމީހުން ޚާއްސަ މަސައްކަތެއް ފެށިއެވެ. އެއީ ރާއްޖޭގެ ފުރަތަމަ ކަލްޗަރަލް ސެންޓަރެވެ. ދަނގެެތީގައި މިސެންޓަރު ހަދާފައިވަނީ 6 ގެއެއް ހިމެނޭހެންނެވެ. މިއިން ކޮންމެ ގެއަކުން ފެންނަން ހުރީ އޭރު ދިވެހިން ކޮށް އުޅުނު އިހުގެ މަސައްކަތް ތަކާއި، ދިވެހިންގެ އާދަކާދަތަކެވެ. މިސެންޓަރު ހިންގި އަހަރުތަކުގައި އެއީ ރާއްޖޭގެ އެހެން އަތޮޅުތަކުގެ މީހުންނާއި ފަތުރުވެރިންގެ ބޮޑު މަޤުބޫލުކަމެއް ލިބުނު ސެންޓަރެކެވެ. ރާއްޖޭގެ އެކި ކަންކޮޅުތަކުން އެތަން ބަލާލަން ދަނގެއްޗަށް ޒިޔާރަތްކުރެއެވެ.
ނަމަވެސް ފަހުން ހިނގި އަލިފާނުގެ ޙާދިސާއެއްގައި މި ސެންޓަރު މުޅިން އަނދައިގެން ދިޔައެވެ. އޭގެ ފަހުން ރަށުގެ ރައްޔިތުންގެ އިސްނެގުމަށް ކުޑަގޮތަކަށް މިފަދަ މަސައްކަތްތަކެއް ކުރިއެވެ. ނަމަވެސް އެކަންވެސް ވަކި ހިސާބަކުން ހުއްޓުނީއެވެ.
ދަނގެތީގެ ކައުންސިލުން އަނެއްކާވެސް މިވަނީ ރަށުގެ ރައްޔިތުންގެ މި ހުވަފެނގައި ކުލަޖެއްސުމަށް ނުކުމެފައެވެ. ދަނގެތިން ބޭނުންވަނީ، ދިވެހިންގެ ސަޤާފަތް ދިރުވާ އާލާކުރުމުގައި ނަމޫނާ ރަށަކަށް ވާށެވެ.
"ހައި އިމްޕެކްޓް ކޮމިއުނިޓީ" މަޝްރޫޢުތަކަށް ޢަމާޒުކޮށް އިންޑިއާ ސަރުކާރުން ދިން ހިލޭ އެހީގައި، ދަނގެތީގައި ކަލްޗަރަލް ސެންޓަރެއް ޤާއިމުކުރުމަށް 8 މިލިއަން ރުފިޔާގެ އެހީގެ އެއްބަސްވުމުގައި ވަނީ ސޮއިކޮށްފައެވެ. މިއީ ރާއްޖޭގެ ސަޤާފީ ކަންކަން ކުރިއެރުވުމަށް ދިން ހިލޭ އެހީއެކެވެ. މި އެހީ ދަނގެތިން ހޯދާފައިވަނީ، ކައުންސިލުން މިކަމަށް އެދި ހުށައެޅި ޕްރޮޕޯސަލަކުން ހޮވިގެންނެވެ.
ދަނގެތީ ކައުންސިލުން މިހާރު ކުރަމުންދަނީ ކަލްޗަރަލް ސެންޓަރުގެ ފައިނަލް ކުރެހުންތައް ތައްޔާރުކުރުމުގެ މަސައްކަތެކެވެ. މިއީ 1 އަހަރުގެ މަޝްރޫޢުއެވެ.
ކަލްޗަރަލް ސެންޓަރު ތަރައްޤީކުރުމަށް ރަށުން ފަންސަވީސް ހާސް އަކަފޫޓުގެ ބިމެއްވަނީ ކަނޑައަޅާފައެވެ. ދަނގެތީ ކައުންސިލުން މަޢުލޫމާތުދެއްވިގޮތުގައި މި މަސައްކަތް ވެގެންދާނީ މުޅި ރާއްޖޭގެ ތާރީޚާއި ސަޤާފަތް ދައްކުވައިދޭ ސެންޓަރެއް ހެދުމުގެ މަސައްކަށެވެ.
މިފަރު ސެންޓަރު ތަރައްޤީކުރާއިރު، ރާއްޖޭގެ ތާރީޚީ ބިނާތަކުގެ ނަމޫނާ މޮޑެލްތަކާއި މޮނިއުމަންޓްތައްވެސް ހުންނާނެއެވެ. އެގޮތުން ހުކުރު މިސްކިތާއި މެދު ޒިޔާރަތްފަދަ ބިނާތަކުގެ ރަމްޒުތައް ހުންނާނެއެވެ. އަދި ދިވެހިން މަސްވެރިކަން ކުރި އިހުގެ ގޮތްތަކާއި، ކަނބުރުވެރިކަމާއި ރޯނު ވެށުމާއި އޭރުގެ ދިރިއުޅުން ދައްކުވައިދޭ ކަންތައްތައްވެސް ހުންނާނެއެވެ. މީގެއިތުރުން ސަޤާފީ ދިވެހި އުފެއްދުންތައް ވިއްކާ ފިހާރައެއްވެސް ހެދުމަށްވަނީ ހަމަޖެހިފައެވެ.
ދަނގެތީ ކައުންސިލުން ވިދާޅުވީ މިތަނުގައި ގެސްޓުންނަށް ޚާއްސަކޮށްގެން 3 ކޮޓަރީގެ އެކަމަޑޭޝަން ބްލޮކެއްވެސް ހިމެނުމަށް މަސައްކަތް ކުރަމުންދާކަމަށެވެ. އަދި އޮފީހަކާއި ފާޚާނާ ބަރިއަކާއި، މަޑުކޮށްލައިގެން ތިބޭނެ ސަރަޙައްދެއް އޮންނާނެކަމަށެވެ.
އަދި ރަށުގެ ރައްޔިތުން ބައިވެރިކޮށްގެން، ސަޤާފީ އެކިއެކި ޝޯވްތަކާއި، ދިވެހިންގެ މަސައްކަތްތެރިކަން ދައްކުވައިދޭ ފެސްޓިވަލްތައްވެސް މިތަނުގައި ކުރިއަށްގެންދާގޮތަށް ކޮންސެޕްޓް ރާވާފައިވާކަމަށް ކައުންސިލުން ވިދާޅުވެއެވެ. މި މަސައްކަތުގައި ދަނގެތީގެ ގޮނޑުދޮށުގައި، ފަތުރުވެރިންނަށް ބޭނުންކުރެވޭގޮތަށް ދިވެހިން އިހު ބޭނުންކުރި އެކި ކަހަލަ ދޯނިފަހަރުގެ މޮޑެލްތައްވެސް ހެދުމަށް ހަމަޖެހިފައިވެއެވެ.
މިފަހަރު ދަނގެތީގައި ތަރައްޤީކުރާ ކަލްޗަރަލް ސެންޓުގެ އެންމެ ބޮޑު ޢަމާޒަކީ ކަލްޗަރަލް ޓުއަރިޒަމެވެ. މިކަމުން ރަށަށް ޢާމްދަނީއެއް ވެއްދުމެވެ.
ދަނގެތީގައި މިވަގުތުވެސް 16 ގެސްޓް ހައުސް ހިންގަމުން އާދެއެވެ. އެއީ 200އަށްވުރެ ގިނަ އެނދެވެ. ރަށުގެ އަމާޒަކީ ކުރިއަށް އޮތް 3 އަހަރުދުވަހުގެތެރޭ މި ޢަދަދު 700 އެނދަށް އިތުރުކުރުމެވެ.
ރަށުގައި ރަޖިސްޓްރީވެފައިވާ އާބާދީއަކީ 1136 މީހުންނެވެ. ނަމަވެސް ދިރިއުޅޭ އާބާދީ 1900އިން މައްޗަށް އަރައެވެ. ކަލްޗަރަލް ސެންޓަރު ވެގެންދާނީ ރަށަށް އާމްދަނީ ހޯދޭނެ މުހިންމު ވަސީލަތަކަށެވެ. ވަޒީފާގެ ފުރުޞަތުތައް ފަހިވާނެ މަގަކަށެވެ. ރާއްޖޭގެ ސަޤާފަތް ދިރުވާ އާލާކުރުމަށްވެސް ކުރެވޭ ވަރަށް މުހިންމު މަސައްކަތަކަށެވެ.