ގއ. ގެމަނަފުށީ ކައުންސިލުން އިސްނަންގަވައިގެން އެރަށުގެ ދެކުނުފަރާތުގައި ހެއްދެވުމަށް ހަމަޖެހިފައިވާ ފުޓުބޯޅަދަނޑު ތަރައްޤީކުރުމުގެ މަސައްކަތް އެމްޓީސީސީއާ ޙަވާލުކުރައްވައިފިއެވެ.މި އެއްބަސްވުމުގެ ދަށުން ފުޓުބޯޅަދަނޑު ހެދުމަށް ހަމަޖެހިފައިވާ ސަރަޙައްދު ސާފުކުރުމާއި ފަސްގަނޑު އެއްވަރުކުރުމުގެ މަސައްކަތް އެމްޓީސީސީން ކުރާނެކަމަށް އެކުންފުނިން ބުނެއެވެ.އެމްޓީސީސީގެ ސީއީއޯ އަބްދުލްރައްޒާޤް ވިދާޅުވީ، ގެމަނަފުށީދާއިރާގެ ހުރިހާ ރަށެއްގައިވެސް އެކުންފުނީގެ ސީއެސްއާރު ބަޖެޓްގެ ތެރެއިން މަސައްކަތްތައް ކުރަމުންގެންދާ ކަމަށެވެ. އަދި ގެމަނަފުށީގައި އެކުންފުނިން މިހާރު ކުރިއަށް ގެންދަވާ މަސައްކަތްތައް ނިންމާއިރު ދަނޑުގެ މަސައްކަތްވެސް ނިމޭނެކަން ސީއީއޯ ވިދާޅުވިއެވެ.މިއަދުގެ ރަސްމިއްޔާތުގައި ގެމަނަފުށީދާއިރާގެ މަޖިލީސް މެމްބަރު ޖަމީލް އުޘްމާން ވިދާޅުވީ އެދާއިރާގެ ޒުވާނުންނާއި ރައްރަށުގެ ތަރައްޤީއަށް ޚާއްޞަ އިސްކަމެއް ސަރުކާރުން ދެއްވާކަން ފާހަގަކުރެއްވޭކަމަށެވެ.ގއ. ގެމަނަފުށީ ކައުންސިލުން އިސްނަންގަވައިގެން އެރަށުގައި ހެއްދެވުމަށް ހަމަޖެހިފައިވާ ފުޓުބޯޅަދަނޑު ތަރައްޤީކުރުމުގެ މަސައްކަތް އެމްޓީސީސީއާ ޙަވާލުކުރުމުގެ އެއްބަސްވުމުގައި ސޮއިކުރެއްވީ ސީއީއޯ އިބްރާހިމް އަބްދުލްރައްޒާޤާއި ގެމަނަފުށީ ކައުންސިލްގެ ރައީސް އަބްދުﷲ ޝިޔާނެވެ.