މުލަކަތޮޅަކީ ރާއްޖޭގައި މިވަގުތު އެއަރޕޯޓެއް ނެތް މަދު އަތޮޅުތަކުގެ ތެރޭގައި ހިމެނޭ އަތޮޅެކެވެ. މި އަތޮޅުގައި މީހުން ދިރިއުޅޭ 8 ރަށް އޮންނައިރު، އަތޮޅުގައި އެއަރޕޯޓެއް ތަރައްޤީވެގެންދިއުމަކީ މީގެ ގާތްގަނޑަކަށް 30 އަހަރު ކުރިއްސުރެ އަތޮޅުގެ ރައްޔިތުން ކުރަމުންދިޔަ އުންމީދެކެވެ. މިހާރު މިވަނީ މިކަމުގައި ހަޤީޤީ ކުލަ ޖެހެން ފަށާފައެވެ.
މިކަން ހަޤީޤަތަކަށް ހެދުމަށްޓަކާ މި ސަރުކާރުން ވަނީ މުލީގައި އެއަރޕޯޓެއް ތަރައްޤީކުރުމަށް ނިންމައި އެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، (އެމް.ޓީ.ސީ.ސީ)އާ ޙަވާލުކުރައްވާފައެވެ. މި މަޝްރޫޢުގެ އެއްބަސްވުމުގައި ޕްލޭނިންގ މިނިސްޓްރީން އެމް.ޓީ.ސީ.ސީއާއެކު ސޮއިކުރައްވާފައިވަނީ 28 ފެބްރުއަރީ 2021 ގައެވެ. މުލަކަތޮޅުގައި ތަރައްޤީކުރާ ފުރަތަމަ އެއަރޕޯޓުގެ މަސައްކަތް ފެށުމަށްޓަކައި ވާންޖެހޭ އެންމެފަހުގެ ތައްޔާރީތައް އެމް.ޓީ.ސީ.ސީން މިވަނީ މިހާރު ވާން ފަށާފައެވެ.
އެގޮތުން އެއަރޕޯޓަށް ބޭނުންވާ ބިން ހިއްކުމުގެ މަސައްކަތް ފެށުމަށް އަޅަންޖެހޭ ބަންޑް ވޯލް އެޅުމުގެ މަސައްކަތް އެމް.ޓީ.ސީ.ސީން ދަނީ ކުރަމުންނެވެ. އަދި ޓަރމިނަލް އިމާރާތުގެ ފައުންޑޭޝަންގެ މަސައްކަތްތައްވެސް ވަނީ ފަށާފައެވެ. މިއާއެކު މުލަކަތޮޅުގެ ރައްޔިތުން ދެކެމުންދިޔަ ޒަމާންވީ ހުވަފެނުގައި ހަޤީޤީކުލަ ޖެހެމުންދާ މަންޒަރު މުލިން މިވަނީ ފެންނަން ފަށާފައެވެ.
މ. މުލި އެއަރޕޯޓް ތަރައްޤީ ކުރުމުގެ މަޝްރޫޢުގެ ދަށުން، ބިން ހިއްކުމުގެ މަސައްކަތް ފެށުމުގެ ކުރިން އަޅަންޖެހޭ ބަންޑް ވޯލް އެޅުމުގެ މަސައްކަތް މިހާރު ދަނީ ކުރިއަށް. އަދި ޓަރމިނަލް ބިލްޑިންގ ގެ ފައުންޑޭޝަން ގެ މަސައްކަތްތައް ވެސް ދަނީ ކުރެވެމުން. #MTCCProjects #RayyithungeKunfuni pic.twitter.com/ZOU5I4U9VH
— MTCC Plc (@MTCCPlc) April 23, 2022
ޕީ.އެސް.އެމް ނިއުސްއަށް މަޢުލޫމާތުދެއްވަމުން މުލީ ކައުންސިލުގެ ރައީސް ޝަމްޢޫން ރަމީޒް ވިދާޅުވީ، މުލީ އެއަރޕޯޓް މަޝްރޫޢަކީ އެރަށުގެ އިތުރުން މުޅި އެއަތޮޅުގެވެސް އިޤްތިޞާދީ އަދި އުމްރާނީ ތަރައްޤީއާއި ގުޅިފައިވާ އުންމީދީ މަޝްރޫޢެއްކަމަށެވެ. އަދި މިއަދު އެ މަޝްރޫޢުގައި ހަޤީޤީ ކުލަ ޖެހެމުންދާކަމީ މުޅި އަތޮޅަށްވެސް ލިބިގެންދާ ވަރަށް ބޮޑު ހިތްހަމަޖެހުމެއްކަމަށެވެ. އެގޮތުން މި މަޝްރޫޢުގެ ސަބަބުން އެ ރަށާއި އަތޮޅުގެ ޒުވާނުންނަށް ވަޒީފާގެ އިތުރު ފުރުޞަތުތަކެއް ލިބިގެންދާނެކަމަށާއި، ދަތުރުފަތުރުގެ ކަންކަން މިހާރަށްވުރެ ފަސޭހަވެގެންދާނެކަމަށް ޝަމްޢޫން ވިދާޅުވިއެވެ.
"ވަރަށް ބޮޑު މޫވްމަންޓެއް އަންނާނެކަމަށް ބެލެވޭ މިއަތޮޅުގައިވެސް ރިސޯޓުތައް ހުރުމާއެއްކޮށް. ބަލި މީހުންނަށް ކަނޑުގަދައިރު ދަތުރުކުރުމުގައި ހުރި ދަތިތަކަށްވެސް ލުޔެއް ލިބޭނެ. ވަޒީފާގެ ފުރުޞަތުތައް ރަށުގައި އުފެދި ޒުވާނުންނަށް އެ ހިތްހަމަޖެހުން ލިބޭނެ. މިއީ ރަށުގައި ލޯކަލް ޓޫރިޒަމް ފުޅާކުރުމަށްވެސް ލިބޭ ފަހި ފުރުޞަތެއް" ޝަމޫން ވިދާޅުވިއެވެ.
މުލީގައި އެއަރޕޯޓް ތަރައްޤީކުރުމަށް ހަމަޖެހިފައިވަނީ ރަށުގެ އިރުދެކުނު ފަރާތުން ހިއްކާފައިވާ 40 ހެކްޓަރުގެ ބިމުގައެވެ. މިއީ 2018 ވަނަ އަހަރު ހިއްކި ސަރަޙައްދެކެވެ. އެހެންނަމަވެސް އެއަރޕޯޓް ތަރައްޤީކުރުމަށް އިތުރަށް ބިން ބޭނުންވާތީ، އިތުރު 14 ހެކްޓަރު ހިއްކުމަށް ވަނީ ހަމަޖެހިފައެވެ.
މި މަޝްރޫޢުގެ ދަށުން މުލީ އެއަރޕޯޓުގައި 1200 ދިގު، 30 ފޫޓު ފުޅާ ރަންވޭއެއް ތަރައްޤީކުރުމާއި، ޓެކްސީވޭއާއި އޭޕްރެން ތަރައްޤީކުރުމަށް ވަނީ ހަމަޖެހިފައެވެ. އަދި އަލަށް ހިއްކާ ސަރަޙައްދުގެ ގޮނޑުދޮށް ޙިމާޔަތްކުރުމަށްޓަކާ 1812 މީޓަރުގެ ބޮޑުހިލައިގެ ރިވެޓްމަންޓް ޖެހުންވެސް ހިމެނެއެވެ. އެމް.ޓީ.ސީ.ސީން ވިދާޅުވެފައިވަނީ އެ ކުންފުނީގެ އަމާޒަކީ މުލީ އެއަރޕޯޓުގެ ޢަމަލީ މަސައްކަތް ފަށާތާ، އެއްއަހަރުގެ ތެރޭ މަސައްކަތް އެއްކޮށް ނިންމާ ސަރުކާރާއި ޙަވާލުކުރުން ކަމަށެވެ.
މި މަޝްރޫޢަށް 221 މިލިއަނަށްވުރެ ގިނަ ރުފިޔާ ހޭދަކުރެއެވެ.