މާތް ﷲގެ ރުއްސެވުމާއި ފުއްސެވުން ބޭނުންވާނަމަ އެކަލާނގެ އަންގަވާފައިވާ މަގުގައި ސާބިތުވެ ދެމިތިބުމުގެ ތަޢުފީޤުދެއްވުމަށް ވީހާވެސް ގިނައިން އެކަލާނގެ ހަޟްރަތުގައި ދެންނެވުމަށް އައްޝައިޚް އިބްރާހީމް މެންކް ވިދާޅުވެއްޖެއެވެ.
ރޭ ހުޅުމާލެ ޣާޒީ ސްކޫލުގައި "ސީކިން ސޮލޭސް" ނުވަތަ "ހިތްހަމަ ޖެހުން ހޯދުން" މި މަޢުޟޫއަށް ކުރިއަށްގެންދިޔަ ދީނީ ދަރުސްގައި ވާހަކަފުޅު ދައްކަވަމުން ޝައިޚް އިބްރާހީމް މެންކް ވިދާޅުވީ ދުނިޔޭގެ މި ދިރިއުޅުމަކީ ތާއަބަދަށް އުފާވެރިކަން އެއިން ލިބިދޭ ދިރިއުޅުމެއް ނޫންކަމަށާއި ކިތަންމެ އުފަލުގައި އުޅުނުނަމަވެސް މި ދުނިޔޭގެ ވަގުތީ ޙަޔާތުން އެ އުފާވެރިކަމަށް ނިމުން އަންނަ ވަގުތު އައިސް ޖެހޭކަމަށެވެ. އަދި ދުނިޔޭގެ ޒީނަޔްތެރިކަމުގައި އަވަދިނެތި މާތްﷲ ހަނދުމަނެތިކޮށް އުޅެމުންދަނިކޮށް މަރުއައިސް ތިމާއާއި ބައްދަލުކުރާކަމަށް ވިދާޅުވިއެވެ.
ޝައިޚް އިބްރާހީމް މެންކް ދަރުސްގައިވަނީ އުނދަގޫ ދަތިކަމުގައި އިންސާނާ ޢަމަލުތައް ބަހައްޓާނެ ގޮތްތަކަށް ބައްލަވާލައްވާފައެވެ. އިންސާނުންގެ ދިރިއުޅުމުގެ އެކިކަންކަމުން މިސާލުދައްކަވަމުން އެކަންކަމުންވެސް ދޭހަ ކޮށްދެނީ އާޚިރަތަށް ތައްޔާރުވާންޖެހޭކަން ކަމަށާއި މިދުނިޔޭގައި ޔަޤީންވާ ހަމައެކަނި ކަމަކީ މަރުކަމަށް ވިދާޅުވެ، އެންމެ ކާމިޔާބު މީހާއަކީ ދެދުނިޔޭގެ ބާއްޖަވެރިކަން ހޯދަން ގަދަ އަޅާ މަސައްކަތްކުރާ މީހާކަމަށްވެސް ވިދާޅުވިއެވެ.
މިދުނިޔެއިން ކިތަންމެ މުދަލެއް، ލައްޒަތެއް ލިބުނުކަމުގައިވިޔަސް، އިންސާނާއަށް ހިތްހަމަޖެހުން ނުލިބޭކަން މިސާލާއިއެކު ބަޔާންކުރައްވަމުން މި ދުނިޔެއަކީ އުމުރަށް އުފަލާއި މަޖަލުގައި އުޅެވޭނެތަނެއް ނޫންކަމަށް ޝައިޚް ވިދާޅުވިއެވެ.
އިންސާނުންނަކީ ވަކި މުއްދަތެއް ހަޔާތުގައި ލިޔެވި ދުނިޔެއަށް ފޮނުވިފައިވާ ބައެއްކަމަށާއި އަދި އެ ވަގުތު ހަމަވުމުން ހުރިހާ އިންސާނުންވެސް ﷲ ސުބްހާނަޙޫ ވަތަޢާލާގެ ހަޟްރަތަށް ދާންޖެހޭކަން ޝައިޚް އިބްރާހީމް މެންކް ހަނދާންކޮށްދެއްވިއެވެ. އަދި އިންސާނާ ދުނިޔެއަށް އައިސް އޭނާގެ ހިތުގައިވާ ޖާގައަށް ދުނިޔެއިން މުދަލާއި ހިތްހަމަޖެހުން ޖަމާކުރާކަމަށާއި އެހެންނަމަވެސް އެ ޖާގަ ފުރާލަންވީ ﷲ ސުބްޙާނަހޫ ވަތަޢާލާ ހަނދުމަކުރުމުގައިކަމަށާއި އެހެނީ އެ ހުސްކަން ފިލުވާލެވޭނީ ހަމައެކަނި މާތްﷲއަށް ކަމަށް ވާތީކަން ބަޔާންކުރެއްވިއެވެ.
މީހުންގެ ރުހުން ހޯދަން މަސައްކަތްކުރާއިރު ހަނދުމަކުރަންވީ ދުނިޔޭގައި ހޭދަކުރާ ކޮންމެ ދުވަހަކީ ﷲގެ ހަޟްރަތަށް ރުޖޫޢަވާންޖެހޭ ދުވަސް ގާތްވެގެން އަންނަ އައުމެއްކަމަށްވެސް ޝައިޚް ވިދާޅުވިއެވެ. އެހެންކަމުން އިންސާނާގެ ހުރިހާ ސުވާލެއްގެ ޖަވާބު ވަނީ ކީރިތި ޤުރުއާނުގައި، ނަމާދުގައި އަދި ދުޢާގައިކަމާއި އިންސާނާގެ ދަރަޖަ އުފުއްލެވޭނީ އިންސާނާ ދުނިޔޭގައި ހޯދާ މަތިވެރިކަމަށް ބިނާކޮށް ނޫންކަމަށްވެސް ވިދާޅުވިއެވެ.
އިންސާނާ މަގުފުރެއްދުމަށް ކެނޑިނޭޅި ޝައިޠާނާ މަސައްކަތް ކުރާނެކަން ފާހަގަކުރައްވާ މި ދުނިޔޭގައި ކެތްތެރިވި މީހުންނަށް އާޚިރަތުގައި ހުރި އުފާވެރިކަމުގެ ވާހަކަތައްވެސް މިރޭގެ ދަރުސްގައި ޝައިޚް އިބްރާހީމް މެންކް ވަނީ އޮޅުންފިލުއްވައިދެއްވާފައެވެ.
މިނިސްޓްރީ އޮފް އިސްލާމިކް އެފެއާޒާއި މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމެންޓާއި ގުޅިގެން ބޭއްވި މި ދަރުސް ނިންމާލަމުން، އަލް އަޞްރުން ވަނީ މިނިސްޓްރީ އޮފް އިސްލާމިކް އެފެއާޒުގެ އިސްލާމިކް ލައިބްރަރީއަށް ކުޑަކުދިންނާ ގުޅޭ ދީނީ ފޮތްތަކެއް ހަދިޔާކުރައްވާފައެވެ.