ދުނިޔޭގައި އެންމެ ފުޅާ ދާއިރާއެއްގައި ރީޓެއިލް ވިޔަފާރިކުރާ އެމެރިކާގެ ވޯލްމާޓުގެ ފިހާރަތަކުން ސިނގިރޭޓް ވިއްކުން ހުއްޓާލުމުގެ މަސައްކަތް ފަށައިފިއެވެ.
ހަބަރުތައް ބުނާގޮތުން ވޯލްމާޓުން ވަނީ އެ ކުންފުނީގެ ބައެއް ފިހާރަތަކުން މިހާރުވެސް ސިނގިރޭޓް ވިއްކުން ހުއްޓާލާފައެވެ.
އެމެރިކާއާއި ދުނިޔޭގެ އެކި ކަންކޮޅުތަކުގައި ރީޓެއިލް ވިޔަފާރިކުރާ ވޯލްމާޓުން ސިނގިރޭޓް ވިއްކުން ހުއްޓާލުމުގެ މަސައްކަތް ފަށާފައި މިވަނީ، ދުންފަތާއި ދެކޮޅަށް ފިޔަވަޅު އެޅުމަށް އެ ކުންފުންޏަށް އެކި ފަރާތްތަކުން ބާރު އަޅާތާ އެތައް ދުވަހެއް ފަހުންނެވެ.
ހަބަރުތައް ބުނާގޮތުން އެމެރިކާގެ ކެލިފޯނިއާ، ފްލޮރިޑާ، އާކަނަންސް އަދި ނިއުމެކްސިކޯގައި ހުރި ވޯލްމާޓުގެ ފިހާރަތަކުން ވަނީ ސިނގިރޭޓް ވިއްކުން މިހާރުވެސް ހުއްޓާލާފައެވެ. އަދި ސިނގިރޭޓްތައް ހުރި ހަރުތަކުގައި މިހާރު ހުރީ ކާބޯތަކެތީގެ އެހެން ބާވަތްތައްކަމަށްވެސް ހަބަރުތައް ބުނެއެވެ.
މީގެކުރިންވެސް ވޯލްމާޓުން ވަނީ ދުންފަތާއި ދެކޮޅަށް ފިޔަވަޅުތަކެއް އަޅާފައެވެ. އެގޮތުން އެމެރިކާގައި އެކަނިވެސް ވޯލްމާޓުގެ 5000 ފިހާރަ ހުންނައިރު 2019 ވަނަ އަހަރު ވޯލްމާޓުން ވަނީ އުމުރުން 21 އަހަރުން ދަށުގެ ކުދިންނަށް ސިނގިރޭޓް ވިއްކުން މަނާކޮށް، އީ ސިނގިރޭޓް ވިއްކުން ހުއްޓާލާފައެވެ. އަދި ވޯލްމާޓުގެ ދަށުން ހިންގާ އެހެން ވިޔަފާރިއެއްކަމަށްވާ ސޭމްސް ކްލަބުންވެސް ވަނީ އެކުންފުނީގެ ގިނަ ފިހާރަތަކުން ސިނގިރޭޓް ވިއްކުން ހުއްޓާލާފައެވެ.
ސިނގިރޭޓް ވިއްކުން ހުއްޓާލީ ކިތަށް ފިހާރައިންކަން ވޯލްމާޓުން ހާމަކޮށްފައެއް ނުވެއެވެ. އެކުންފުނިން ބުނީ ދުންފަތާއި ގުޅޭގޮތުން ގެންގުޅޭ ސްޓްރެޓަޖީގެ ދަށުން އެޅި ފިޔަވަޅެއްކަމަށެވެ.
ދުންފަތާއި ދެކޮޅަށް ދުނިޔޭގައި ބޮޑެތި ކެމްޕެއިންތައް ހިންގަމުންދާއިރު އެމެރިކާގެ އިތުރުން ދުނިޔޭގެ އެހެން ބައެއް ޤައުމުތަކުގައިވެސް ދަނީ ދުންފަތް ވިއްކުން ހުއްޓާލަމުންނެވެ. ނުވަތަ ކޮންޓްރޯލްކުރަމުންނެވެ. އަދި ދުންފަތުން ނަގާ ޓެކްސްވެސް ބައެއް ޤައުމުތަކުގައި ދަނީ ބޮޑުކުރަމުންނެވެ.