ހުޅުމާލޭގެ ދެވަނަ ފިޔަވަހީގައި 2 ޕްރީ ސްކޫލް ތަރައްޤީކުރުމަށް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން އެސްޖޭ ކޮންސްޓްރަކްޝަންއާ ހަވާލުކޮށްފިއެވެ.
ހުލުމާލޭގެ ދެވަނަ ފިޔަވަހީގައި މީހުން ދިރިއުޅެން ފެށީ 2020 ވަނަ އަހަރުގެ ފަހުކޮޅެވެ. ނަމަވެސް އެއީ ހުޅުމާލެ ފޭސް އެކަކާއި ކައިރި ސަރަޙައްދުގައި، ވަރަށް މަދު އާއިލާއެކެވެ.
ހިޔާ ހައުސިންގ މަޝްރޫޢުއާއެކު ހުޅުމާލޭގެ ދެވަނަ ފިޔަވައްސަށް ބޮޑު އާބާދީއެއް އެއްފަހަރާ ބަދަލުވެފައިވަނީ މިދިޔަ އަހަރުގެ ފަހުކޮޅުއެވެ. 6720 ހައުސިންގ ޔުނިޓަށް ޖުމްލަ 40،000އާ ގާތްކުރާ އާބާދީއެއް ބަދަލުވާނެކަމަށް ލަފާކުރެއެވެ. މިހާތަނަށް އައިއިރުވެސް 1200 ހައުސިންގ ޔުނިޓަށް އާއިލާތަކުންވަނީ ދިރިއުޅުން ބަދަލުކޮށްފައެވެ.
ނަމަވެސް ހިޔާ ފްލެޓަށް ބޮޑު އާބާދީއެއް ބަދަލުވީއިރުވެސް، އެތަނުގައި އަސާސީ ޚިދުމަތްތައް ހުރީ ޤާއިމުނުވެއެވެ. އެންމެ މުހިންމު އެއްކަމަކީ އެތަނުގައި ތަޢުލީމުދޭ އެއްވެސް މަރުކަޒެއް ނެތުމެވެ. ހިޔާގައި ދިރިއުޅޭ ކުދިން ތަޢުލީމް ޙާސިލްކުރުމަށް އަދިވެސް ދާންޖެހެނީ ދިގު ދަތުރެއްކޮށް މާލެއަށް ނޫނީ ހުޅުމާލޭގައި ހުރި އެކިއެކި ސްކޫލްތަކަށެވެ. މިކަން ވެފައިވަނީ ދަރިވަރުންނަށްވެސް އަދި ބެލެނިވެރިންނަށްވެސް ބޮޑު ތަކުލީފަކަށެވެ.
We have signed a contract with @sjgroup_mv for the construction of Pre-schools in Hulhumalé.
— HDC (@hdcmaldives) March 2, 2022
The project consists of two pre-schools at the Hiya Housing area with a project duration of 6 months.#MageyHiya pic.twitter.com/dKEk0FhtOL
ނަމަވެސް ހުޅުމާލޭ ދެވަނަ ފިޔައްސައް ބޭނުންވާ މިފަދަ އަސާސީ ގިނަ ޚިދުމަތްތަކެއް ޤާއިމުކުރުމުގެ މަސައްކަތްތައް މިހާރުދަނީ ކޮންޓްރެކްޓަރުންނާއި ހަވާލުކުރަމުންނެވެ.
އެގޮތުން ދެވަނަ ފިޔަވަހީގައި ސްކޫލެއް އެޅުމަށް ފުރަތަމަ ބަޔަކާއި ހަވާލުކުރީ މިދިޔަ އަހަރުގެ ޖޫން މަހުއެވެ. އެޑިއުކޭޝަން މިނިސްޓްރީއިން ހާވަކޮށްފައިވާގޮތުގައި ދެވަނަ ފިޔަވަހީގައި ތަރައްޤީކުރާ ސްކޫލްތައްވާނީ 1000-1200އާއި ދެމެދުގެ ޖާގައިގެ ސްކޫލްތަކަށެވެ. މި ސްކޫލްގެ މަސައްކަތް ނިންމުމަށް ހަވާލުކޮށްފައިވަނީ 18މަސް ދުވަހުންނެވެ.
މީގެ އިތުރުން މިހާރު މިވަނީ ހުޅުމާލޭގެ ދެވަނަ ފިޔަވަހީގައި ހިޔާ ސަރަޙައްދުގައި ޕްރީ ސްކޫލް އެޅުމަށްވެސް ކުންފުންޏަކާއި ހަވާލުކޮށްފައެވެ. އެސްޖޭ ކޮންސްޓަރަކްޝަންއާއި ހަވާލުކޮށްފައިވަނީ ހުޅުމާލޭގެ ދެވަނަ ފިޔަވަހީގައި 2 ޕްރީ ސްކޫލް ތަރައްޤީކުރުމަށެވެ. މި މަސައްކަތް ހަވާލުކުރީ އޮގަސްޓް މަހުގެ ނިޔަލަށް މަސައްކަތްތައް ނިންމުމަށެވެ. ތަޢުލީމީ ނިޒާމަށް ގެނެސްފައިވާ ބަދަލާއެކު މިހާރު ދިރާސީ އާ އަހަރު ފެށެނީވެސް އަހަރުގެ މެދުތެރެއިން އޮގަސްޓްމަހުން ފެށިގެންނެވެ.
އެޑިއުކޭޝަން މިނިސްޓްރީން މީގެކުރިން ވިދާޅުވެފައިވަނީ ހުޅުމާލޭގެ ދެވަނަ ފިޔަވަހީގައި ޢިމާރާތް ކުރުމަށް ހަމަޖެހިފައިވަނީ 4 ސްކޫލް ކަމަށެވެ. މީގެތެރެއިން 3 ސްކޫލަކީ ކޮންޓްރެކްޓަރ ފައިނޭންސް، ޑިޒައިން އެންޑް ބިލްޑް އުސޫލުން ހަދާ ސްކޫލްތަކެވެ. އަނެއް ސްކޫލަކީ ބޭރު ފަރާތަކުން ތަރައްޤީކުރާ އިންޓަރނޭޝަނަލް ސްކޫލެކެވެ.
މި ހުރިހާ ސްކޫލްތަކަކީވެސް 6 ބުރީގެ ޢިމާރާތްތައްކަމަށެވެ. މިއިން ކޮންމެ ސްކޫލެއްގައި ގްރޭޑް 1އިން 10އަށް ކިޔަވައިދިނުމަށްވަނީ ހަމަޖެހިފައެވެ.