ކުންފުންޏާބެހޭ އައު ޤާނޫނެއް އެކުލަވާލުމަށް ބޭނުންވާ ބިލު ރައްޔިތުންގެ މަޖިލީހަށް ހުށަހެޅުމަށް ރައީސް އޮފީހަށް ފޮނުވާފައިވާކަމަށް ބަންޑާރަ ނާއިބުގެ އޮފީހުން ވިދާޅުވެއްޖެއެވެ.
ބަންޑާރަ ނާއިބުގެ އޮފީހުން ވިދާޅުވީ، ކުންފުނިތަކާ ބެހޭ އައު ބިލަކީ، ކުންފުނި އުފައްދައި ރަޖިސްޓަރީކުރުމާއި ހިންގުމާއި އުވާލުމާއި އެނޫންވެސް ކަމާބެހޭ ކަންކަމުގައި ޢަމަލުކުރަމުންދާ އުޞޫލުތައް ހަރުދަނާކޮށް އައު ޤާނޫނީ އޮނިގަނޑެއް ތަޢާރުފުކުރުމަށްޓަކައި އެކުލަވާލާ ޤާނޫނެއްކަމަށެވެ.
މިހާރު ޢަމަލުކުރަމުން އަންނަ ކުންފުންޏާބެހޭ ޤާނޫނަކީ މީގެ ފަންސަވީހަކަށް އަހަރުކުރިން އެކުލަވާލައި އަމަލުކުރަމުން އަންނަ ޤާނޫނެކެވެ. އިކޮނޮމިކް މިނިސްޓްރީން ވިދާޅުވެފައިވަނީ ވޭތުވެދިޔަ 25 އަހަރު ދުވަހުގެ ތެރޭގައި ތަރައްޤީވެފައިވާ ޤައުމުތަކުންވެސް އެ ޤައުމުތަކުގެ ކުންފުނީގެ ޤާނޫނީ ނިޒާމަށް ޒަމާނީ ބޮޑެތި ބަދަލުތަކެއް ގެނެސް، އިންވެސްޓްމަންޓަށް ފަހި، ދެފުށް ފެންނަ މިންގަނޑުތައް ޚިޔާރުކޮށްފައިވާކަމަށެވެ. އެހެންކަމުން ރާއްޖޭގައިވެސް ކުންފުންޏާބެހޭ ޤާނޫނަށް ޒަމާނީ ބަދަލުތަކެއް ގެންނަންޖެހޭކަމަށް އެ މިނިސްޓްރީން ވިދާޅުވެފައިވެއެވެ.
ކުންފުންޏާބެހޭ ބިލުގެ އެންމެ މުހިއްމު މަޤްޞަދަކީ، އިޤްތިސާދީ އަދި އިޖްތިމާއީ ނަފާ ހޯދުމަށްޓަކައި، އިޤްތިޞާދީ އުފެއްދުންތެރިކަމުގެ ބޭނުންތަކަށް ރައުސުލްމާލު އިންވެސްޓްކޮށް، އިޤްތިސާދީ އަދި ވިޔަފާރީގެ ރިސްކު ނަގައި، ޤައުމުގެ އިޤްތިސާދުގައި ވިޔަފާރިތައް ޙަރަކާތްތެރިވުމަށް ފަހި ފުރުޞަތުތަކެއް ހޯދައިދިނުމެވެ. އަދި، ތަރައްޤީވެފައިވާ މުޖުތަމަޢުތަކުގައި ޢަމަލުކުރަމުންދާ ޤާނޫނީ އުޞޫލުތަކާ އެއްހަމައެއްގައި ދިވެހިރާއްޖޭގައިވެސް ވިޔަފާރި ޝަޚްސެއްގެ ގޮތުގައި ކުންފުނި އުފައްދައި، ކުންފުނި ރަޖިސްޓަރީ ކުރުމާއި، ކުންފުނި ހިންގުމާއި، ކުންފުނި އުވާލުމުގެ ހަމަތަކާއި އެކަންކަމުގައި ޢަމަލުކުރެވޭނެ އުސޫލުތަކާއި އިޖުރާއަތްތައް ކަނޑައެޅުންކަމަށް އިކޮނޮމިކް މިނިސްޓްރީން ވިދާޅުވެއެވެ.
މިހާރު ޢަމަލުކުރަމުންދާ ޤާނޫނު އުވާލައި، އައު އޮނިގަނޑެއް ތަޢާރަފުކުރުމުގައި، މައިގަނޑު 5 ދާއިރާއަކުން އިޞްލާޙުތައް ގެނައުމަށް ރިޢާޔަތްކޮށްފައިވާނެކަމަށް އިކޮނޮމިކް މިނިސްޓްރީން ވިދަޅުވެފައިވެއެވެ. އެއީވަރލްޑް ބޭންކުގެ ޑުއިން ބިޒްނަސް އިންޑެކްސްގައި، ވިޔަފާރިތަކަށް ފަހި މާޙައުލެއް އޮތް ޤައުމުތަކުގެ ރޭންކިންގގައި ކުރިއެރުމަށް ރާއްޖެއަށް އޮތް ހުރަސްތައް ނައްތާލުމާއި، ކުންފުނި އުފެއްދުމާއި، ހިންގުމާއި، އުވާލުމުގެ ކަންކަމުގައި، މިހާރު ދިމާވާ ދަތިތަކަށް ޙައްލުތަކެއް ހޯދުމުގެ އިތުރުން އިންވެސްޓްމަންޓް ކުން ފުނި އުފެއްދުމަށް އެކަށީގެންވާ ބާވަތެއްގެ ގޮތުގައި ޕަބްލިކް ކުންފުނިތަކުގެ ޤާނޫނީ ނިޒާމު ބަދަލުކުރުމެވެ.
މީގެ އިތުރުން ކުންފުނީގެ ޤާނޫނީ ނިޒާމު، ޒަމާނާއެއްގޮތަށް ތަރައްޤީކޮށް، ޒަމާނީ ޤާނޫނީ މަފްޙޫމްތަކާއި އުސޫލުތައް ޤާނޫނަށް ގެނައުމާއި، އިލެކްޓްރޯނިކް ޒަރީޢާއިއިން ޚިދުމަތަށް އެދި ޚިދުމަތް ލިބިގަތުމުގައި އިތުބާރު ދެމެހެއްޓޭނެ ފަދަ އިންޤިލާބީ ބަދަލުތަކެއް ގެނައުމުގައިވެސް އައު ޤާނޫނުގައި ރިޔާއަތްކުރާނެކަމަށް އިކޮނޮމިކް މިނިސްޓްރީން ވިދާޅުވެފައިވެއެވެ.
އިކޮނޮމިކް މިނިސްޓްރީން ވިދާޅުވެފައިވަނީ ކުންފުންޏާއި ބެހޭ އައު ޤާނޫނު ވެގެންދާނީ ދިވެހިރާއްޖޭގެ ވިޔަފާރީގެ މާޙައުލަށް އިންޤިލާބީ ބަދަލެއް ގެނެސް އިންވެސްޓަރުންގެ ޝައުޤުވެރިކަން ހޯދައި, ދެމެހެއްޓުމަށް އެޅޭ އެންމެ މުހިންމު ބިންގަލަކަށްކަމަށެވެ.