މިމަހުގެ ތެރޭގައި އައްޑޫ ސިޓީގައި ކުރިއަށްގެންދާ އޮޕަރޭޝަންތަކުގައިވެސް "ބޮޑީވޯން" ކެމެރާ ބޭނުންކުރުމަށް މަސައްކަތްކުރަމުންދާކަމަށް ފުލުހުން ވިދާޅުވެއްޖެއެވެ.
މާލެ ސަރަޙައްދުގައި ކުރިއަށްގެންދާ ފުލުހުންގެ އޮޕަރޭޝަންތަކުގައި "ބޮޑީ ވޯން ކެމެރާ" ބޭނުންކުރަން ފަށާފައިވަނީ މިދިޔަ އާދިއްތަދުވަހެވެ. އަދި މާލެ ފިޔަވާ އަތޮޅުތަކުގައި އެންމެ ފުރަތަމަ ބޭނުން ކުރާނީ އައްޑޫ ސިޓީގައެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްވަމަުން ޗީފް އިންސްޕެކްޓަރ އޮފް ޕޮލިސް އަމީން އަބްދުލް ޤައްޔޫމް ވިދާޅުވީ މި ކެމެރާތައް ފުރަތަމަ ބޭނުންކުރަން ނިންމާފައިވަނީ މާލެއާއި، ހުޅުމާލެއާއި، ވިލިމާލޭގައި ކުރިއަށްގެންދާ އޮޕްރޭޝަންތަކުގައި ކަމަށެވެ. އަދި އެއަށްފަހު އައްޑޫސިޓީގައި ބޭނުންކުރުމަށް ނިންމާފައިވާކަމަށް އޭނާ ވިދާޅުވިއެވެ. އެގޮތުން މިހާރު ލިބިފައިވާ 200 ކެމެރާގެ ތެރެއިން 32 ކެމެރާ ބޭނުންކުރާނީ އައްޑޫ ސިޓީގައިކަމަށް އޭނާ ވިދާޅުވިއެވެ.
"ކެމެރާތައް ހަވާލުކުރާނީ ފަހަރަކު ޕޯސްޓްއަކަށް ދޭންޖެހޭ ޓްރެއިނިންތައް ދިނުމަށްފަހުގައި. ފުރަތަމަ މިދެނީ ވަކި ވަކި އޮފިސަރުންނަށް. ނަމަވެސް އުއްމީދަކީ ހުރިހާ އޮފިސަރުންވެސް ޕެޓްރޯލް ކުރުމުގައި ކެމެރާތައް ބޭނުން ކުރުން." ޗީފް އިންސްޕެކްޓަރ އޮފް ޕޮލިސް އަމީން އަބްދުލް ޤައްޔޫމް ވިދާޅުވިއެވެ.
ފުލުހުން ވިދާޅުވީ މި ކެމެރާތަކުގައި ރެކޯޑް ކުރެވޭ ވީޑިއޯތައްވެސް ރައްކާކުރުމަށް ވަކި އުޞޫލްތަކެއް އެކުލަވާލާފައިވާކަމަށެވެ. މިގޮތުން ވީޑިއޯތައް ރައްކާކޮށްފައި ބެހެއްޓުމުގެ މުއްދަތު ކަނޑައަޅާފައިވަނީ އެ މައްސަލައިގެ ކުޑަބޮޑުމިނަށް ބެލުމަށްފަހުގައިކަމަށްވެސް ފުލުހުން ވިދާޅުވެއެވެ. އެގޮތުން ޖިނާޢީ ބޮޑެތި މައްސަލަތަކާ ގުޅޭ ވީޑިއޯތައް 5 އަހަރުވަންދެން ބަހައްޓަން ވަނީ ނިންމާފައެވެ. އަދި އެއީ އެވިޑެންސްގެ ގޮތުގައި ބޭނުން ކުރާ ވީޑިއޯތައްކަމަށް ފުލުހުން ވިދާޅުވެއެވެ. އަދި މަގުމަތީގައި ހިނގާ ކުދި އެކްސިޑެންޓްތަކުގެ ވީޑިއޯތައް 1 އަހަރުދުވަހަށް ބެހެއްޓުމާއި އަދި 48 ގަޑިއިރުތެރޭގައި ޑިލީޓްކުރެވޭ ވީޑިއޯވެސް ހުންނާނެކަމަށް ފުލުހުން ވިދާޅުވެއެވެ.
ބޮޑީ ވޯން ކެމެރާއަކީ، ޑިއުޓީގައި ތިބޭ ފުލުުހުންގެ ޔުނީފޯމްގައި ހަރުކޮށް ވީޑިއޯއާއި އަޑު ރިކޯޑްކުރެވޭ ކެމެރާއެކެވެ. ރާއްޖޭގައި ފުލުހުންގެ ޚިދުމަތުގައި ބޮޑީ ވޯން ކެމެރާ ބޭނުންކުރަން ފަށާފައި މިވަނީ މުޅިން އަލަށެވެ. މިޚިދުމަތް ފެށުމާއެކު 200 ކެމެރާ ވަނީ ބޭނުންކުރަން ފަށާފައެވެ. މިއީ އެކްޒޮން ބްރޭޑްގެ ކެމެރާ ތަކެވެ.
މި ޚިދުމަތާއެކު ފުލުހުން އޮޕަރޭޝަންތައް ކުރިއަށްދާ ވަގުތު ފުލުހުންގެ ހެޑްކުއާޓާޒްގައި ތިބޭ އޮފިސަރުންނަށް މަންޒަރުތައް ވަގުތުން ބަލާލެވޭނެއެވެ. ބޮޑީ ވޯން ކެމެރާ ބޭނުންކުރަން ފަށާފައިވަނީ ޒަމާނީ ޓެކްނޮލޮޖީގެ އެހީގައި ފުލުހުންގެ ޚިދުމަތްތައް އިތުރަށް ތަރައްޤީކުރުމަށެވެ. މިއީ ފުލުހުންގެ ސްޓްރެޓީޖިކް އެކްޝަން ޕްލޭންގައި ހިމެނޭ 6 ދާއިރާގެ ތެރެއިން، ސްޓްރެޓިޖިކް އޮގަނައިޒޭޝަން ރިފޯމް އެންޑް ޓްރާންސްފޯމްގެ ތެރެއިން ފުލުހުން ފެށި މަސައްކަތެކެވެ.