ވޭތުވެދިޔަ 3 އަހަރުދުވަހުގެ ތެރޭގައި 13284 ދަރިވަރަކަށް ހިލޭ ޑިގްރީއަށް ކިޔެވުމުގެ ފުރުޞަތު ސަރުކާރުން ދީފިއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވެރިކަމާއި ހަވާލުވެވަޑައިގެން، 2019 ވަނަ އަަހަރުގެ ފެބްރުއަރީމަހުގެ 14 ވަނަ ދުވަހު މި ފުރުޞަތު ހުޅުވާލިއިރު މިހާރު މިވަނީ ރާއްޖޭގައި ހިލޭ ޑިގްރީއަށް ކިޔަވައިދޭން ފެށިތާ ތިން އަހަރު ފުރިފައެވެ.
މިނިސްޓްރީ އޮފް ހަޔަރ އެޑިއުކޭޝަންގެ ތަފާސް ހިސާބުތަކުން ދައްކާގޮތުގައި ވޭތުވެދިޔަ ތިން އަހަރު ތެރޭގައި 13284 ދަރިވަރުން ސަރުކާރުން ތައާރަފްކުރި ހިލޭ ޑިގްރީއަށް ފުރުސަތު ވަނީ ދީފައެވެ.
ހިލޭ ޑިގްރީއަށް ކިޔަވައިދޭން ފެށިތާ ތިން އަހަރުވުމާއި ގުޅިގެން މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން ވިދާޅުވީ ހިލޭ ޑިގްރީން އެމަނިކުފާނު ދެކެވަޑައިގަންނަވަން ބޭނުންވެލައްވާ ލަނޑުދަނޑިއަކީ އިލްމީ ޖީލެއް ބިނާވެގެން ދިއުން ކަމަށެވެ. އަދި އިލްމީ މީހުންނަށް ކުރާ އިހުތިރާމު މުޖުތަމައުއުން އިތުރުވެގެން ދިއުމާއި ކަންކަމުގައި ބަސް ކިޔޭ މީހުންނަކީ ތައުލީމީ ހުނަރުވެރި ތަޖުރިބާ ހުރި ފަރާތްތަކަށް ވެގެން ދިއުން ކަމަށް ވިދާޅުވި އެވެ.
މިނިސްޓަރ ވިދާޅުވީ އެމަނިކުފާނު ބޭނުންވަނީ ވީހާވެސް ގިނަ ބަޔަކަށް މަތީ ތައުލީމުގެ ފުރުސަތު ފަހިވެފައި އޮތުން ކަމަށެވެ. އަދި ކޯވިޑް-19 ގެ ސަބަބުން ދިމާވި މާލީ ދުވަސްވަރު ވެސް ތައުލީމު އުނގެނުމުގެ ފުރުސަތު އޮތް ކަމަށާއި އެކަމުގެ ސަބަބުން އިޖުތިމާއީ ގިނަ މައްސަލަތަކަށް ހައްލު ލިބިގެން ދިޔަ ކަމަށް ވިދާޅުވިއެވެ.
"ކޯވިޑް-19ގެ ސަބަބުން ދިމާވި މާލީ ދަތި ދުވަސްވަރު ވެސް މަތީ ތައުލީމުގެ ފުރުސަތު ފުޅާވެފައި އޮތް. އެކަމުން އިޖުތިމާއީ މައްސަލަތަކުން ޒުވާނުން ސަލާމަތްވި" މިނިސްޓަރ ވިދާޅުވިއެވެ.
ހިލޭ ޑިގްރީގެ ޕްރޮގްރާމުގެ ދަށުން 2127 ދަރިވަރުން މިހާރު ވެސް ވަނީ ޑިގްރީ ފުރިހަމަކޮށްފައެވެ. އަދި މިހާތަނަށް 13284 ދަރިވަރަކަށް އެ ފުރުޞަތު ދީފައިވާއިރު އޭގެ ތެރޭގައި 2019 ވަނަ އަހަރު 4804 ދަރިވަރަކަށް ހިލޭ ޑިގްރީއަށް ކިޔެވުމަށްޓަކައި ފުރުޞަތު ދީފައިވެއެވެ. އަދި 2020 ވަނަ އަހަރު 4818 ދަރިވަރަކަށާއި 2021 ވަނަ އަހަރުގައި 3301 ދަރިވަރަކަށް ވަނީ އެ ފުރުޞަތު ފަހިކޮށްދީފައެވެ. މީގެ އިތުރުން މިއަހަރުގެ މިހާތަނަށް 361 ދަރިވަރަކަށް ހިލޭ ޑިގްރީއަށް ކިޔެވުމުގެ ފުރުޞަތު ސަރުކާރުން ވަނީ ފަހިކޮށްދެއްވާފައެވެ.
މިއަހަރުގެ ރިޔާސީ ބަޔާނުގައި ރައީސް ވިދާޅުވީ މި ފުރުޞަތުތައް ފަހިކުރަމުން ގޮސް 2023ގެ ނިޔަލަށް 5000 އަށްވުރެ ގިނަ ކުދިން ހިލޭ ޑިގްރީ ހަދައިގެން، ޤައުމު ބިނާކުރުމަށް ނުކުންނާނެކަމަށެވެ. އަދި އެއަށްފަހު، ކޮންމެ އަހަރަކު މަދުވެގެން 2000 ކުދިން ޑިގްރީ ހަދައިގެން ޤައުމީ ޚިދުމަތަށް ނުކުންނާނެކަން ރައީސް ވިދާޅުވިއެވެ.
ހިލޭ ޑިގްރީއަށް ކިޔެވުމުގެ ފުރުސަތުގެ އިތުރުން، ސަރުކާރުން ދަނީ މަތީ ތައުލީމު ހާސިލުކުރަން ލޯނުވެސް ހަމަޖައްސައިދެއްވަމުނެވެ. މިގޮތުން މިއަހަރުވެސް ވަނީ ލޯނުގެ 720 ފުރުޞަތަކަށް އެދުމުގެ ފުރުޞަތު ހުޅުވާލާފައެވެ.