ހދ.ކުޅުދުއްފުށީ އެއަރޕޯޓް ސަރަޙައްދާއި ނ.ކުޑަފަރީ ގޮޑުދޮށް ޙިމާޔަތްކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާ ޙަވާލުކޮށްފިއެވެ.
މިކަމުގެ އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ޝާނާ ފާރޫޤެވެ. އަދި އެމްޓީސިސީގެ ފަރާތުން ސޮއިކުރެއްވީ ސީއީއޯ އާދަމް އާޒިމެވެ. ހދ.ކުޅުދުއްފުށީގެ އެއަރޕޯޓް ތަރައްޤީކުރުމަށް އެރަށުގެ ކުޅި ހިމެނޭހެން 15 ހެކްޓަރުގެ ބިންވަނީ ހިއްކާފައެވެ. މީގެތެރެއިން 6 ހެކްޓަރު ހިއްކާފައިވަނީ ރަށުގެ ފަޅުތެރެއިންނެވެ.
އެ ސަރަޙައްދު ޙިމާޔަތްކުރުމަށް ފުރަތަމަ ޖަހާފައިވަނީ 590 މީޓަރުގެ ދިގު، 1.6 މީޓަރުގެ އުސް ބޮޑުހިލައިގެ ތޮއްޓެކެވެ. ނަމަވެސް ވިއްސާރަވެ މޫސުންގޯސްވުމުގެ ސަބަބުން، މީގެކުރިންގެ މި ތޮއްޓަށް ބޮޑެތި ގެއްލުންތައް ވެފައިވެއެވެ. އެގޮތުން 300 މީޓަރުގެ ބޮޑު ސަރަޙައްދަކަށް މީގެކުރިން ގެއްލުން ވެފައިވެއެވެ.
މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން އެމްޓީސީސީއާ ހަވާލުކޮށްފައިވަނީ މިހާރު އޮތް 590 މީޓަރުގެ ބޮޑު ހިލައިގެ ރިވެޓްމަންޓް މަރާމާތުކޮށް އުސްކުރުމުގެ މަސައްކަތެވެ. އަދި 292 މީޓަރުގެ ބޮޑު ހިލައިގެ ރިވެޓްމަންޓެއް އިތުރުކުރުމަށެވެ. އަދި 30 މީޓަރުގެ ބޮޑުހިލައިގެ ގްރޮއިންސް ޖެހުން ހިމެނެއެވެ.
މި މަޝްރޫޢު ޙަވާލުކޮށްފައިވަނި 42.3 މިލިއަން ރުފިޔާއަށް، 6 މަސްދުވަހުން ނިންމަގޮތަށެވެ.
އެމްޓީސީސީއާ ދެން ހަވާލުކޮށްފައިވަނީ ނ.ކުޑަފަރީގެ ގޮނޑުދޮށް ޙިމާޔަތްކުރުމުގެ މަސައްކަތް ކުރިއަށް ގެންދިއުމަށެވެ. ކުޑަފަރީގައި ބައެއް ސަރަޙައްދުތައް ގިރައި މުދަލަށް ގެއްލުންވާ ހިސާބަށް ގިރާފައިވެއެވެ. ކުޑަފަރިއަކީ ގެސްޓްހައުސްގެ ވިޔަފާރިވެސް ކުރާ ރަށަކަށްވުމާއެކު، ގޮނޑުދޮށް ޙިމާޔަތް ކުރުން އެރަށަށް ވެފައިވަނީ ވަރަށް މުހިންމު މަޝްރޫޢުއަކަށެވެ.
ކުޑަފަރީގެ ގޮނޑުދޮށް ޙިމާޔަތްކުރުމުގެ މަސައްކަތުގައި ހިމެނެނީ، ރަށުގެ އުތުރު ފަރާތުގައި 100 މީޓަރުގެ ޖިއޯ ބޭގް ރިވެޓްމަންޓް ޖެހުމާއި، އަދި ރަށުގެ ދެކުނު ފަރާތު ގޮނޑުދޮށް ޙިމާޔަތްކުރުމަށް 618 މީޓަރުގެ ޖިއޯ ބޭގް ރިވެޓްމެންޓް ޤާއިމުރުމުގެ މަސައްކަތެވެ. މި މަސައްކަތް ހަވާލުކޮށްފައިވަނީ 10 މަސްދުވަހުން ނިންމާގޮތަށް، 15 މިލިއަނަށްވުރެ ގިނަ ރުފިޔާއަށެވެ.