ރަމަޟާންމަހަށް މާލޭގެ މިސްކިތްތައް އާބާތުރަފިލުވުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.
މާލޭ ސިޓީގެ 42 މިސްކިތް ބަލަހައްޓަމުން އަންނަނީ ސިޓީ ކައުންސިލްގެ ބެލުމުގެދަށުންނެވެ. ކައުންސިލުން ވިދާޅުވީ މީގެތެރެއިން 32 މިސްކިތެއް، އަބާތުރަ ފިލުވައި މަރާމާތުކުރުމުގެ ކަންކަން ހުރުމުން އެކަންކަން ޙައްލުކުރުމުގެ މަސައްކަތްތައް ކައުންސިލުން ފަށާފައިވާކަމަށެވެ.
އެގޮތުން ބައެއް މިސްކިތަކުގައި ހުރި ފެން ވަޔަރުކުރުމާގުޅޭ މައްސަލަތައް ޙައްލުކުރުމާއި، ފަޚާނައާއި ވުޟޫކުރާ ސަރަޙައްދުތަކުގައި ހުރި މައްސަލަތައް ޙައްލުކުރުން ހިމެނެއެވެ. އަދި މިސްކިތްތަކުގައި ބާވެ ހަލާކުވެފައިވާ ތަންތަން އަލުން މަރާމާތުކޮށް ހެދުން ހިމެނެއެވެ. މީގެއިތުރުން ކޮންމެ އަހަރަކުވެސް ރަމަޟާން މަހާ ދިމާކޮށް މާލޭގެ މިސްކިތްތައް އިތުރަށް ސާފުކުރުމުގެ މަސައްކަތްތައްވެސް ކުރިއަށްގެންދެއެވެ.
ސިޓީ ކައުންސިލުން ވިދާޅުވީ މިސްކިތްތަކުގައި ހުރި އެކިއެކި މައްސަަލަތައް ޙައްލުކުރުމަށް 13.8 މިލިއަން ރުފިޔާ ހޭދަވާކަމަށެވެ.
ނަމަވެސް ކައުންސިލްގެ ބަޖެޓާއި، އަދި އަމިއްލަ އިސްނެގުމުގައި އެހީވާ ފަރާތްތަކުގެ އެހީތެރިކަމާއެކު މިސްކިތްތައް އާބާތުރަ ފިލުވުމުގެ މަސައްކަތްތައް ރޯދައިގެ ކުރިން ނިންމުމަށް މަސައްކަތް ކުރަމުންދާކަމަށްވެސް ކައުންސިލުން ވިދާޅުވިއެވެ.
ރަމަޟާން މަހަށް މާލެ ސިޓީގެ މިސްކިތްތައް އާބާތުރަ ފިލުމުގެ މަސައްކަތް ފެށިގެން ކުރިއަށްދަނީ. pic.twitter.com/HuxzL5j70Z
— Male' City Council (@MaleCitymv) February 8, 2022
މާލޭގެ މިސްކިތްތައް ބެލެހެއްޓުމަށް ކުރަމުންދާ މަސައްކަތުގެ ތެރެއިން މިސްކިތްތަކުގައި ސީސީޓީވީ ކެމެރާ ހަރުކޮށްދޭނެ ބަޔަކު ހޯދުމަށްވެސް ކައުންސިލުން އިޢުލާންކޮށްފައިވެއެވެ. ކެމެރާ ހަރުކުރުމަށް ނިންމާފައިވަނީ މިސްކިތުގެ ހުރުމަތް ކެނޑޭފަދަ ޢަމަލުތައް ހިންގަމުންދާކަން ފާހަގަކުރެވޭތީއާއި، އަދި މިސްކިތުގައި ހުންނަ ސަމާނު ވަގަށްނެގުންފަދަ ކަންކަން ބައެއް މީހުން ކުރަމުންދާތީއެވެ.
ސިޓީ ކައުންސިލުންވަނީ މާލޭގެ މިސްކިތްތައް ސާފުކޮށް ބެލެހެއްޓުމުގައި ބައިވެރިވާން ބޭނުންވާ އާއްމު ފަރާތްތަކަށް އެ ފުރުޟަތުވެސް ހުޅުވާލާފައެވެ. ކައުންސިލުން ވިދާޅުވީ މިސްކިތްތަކަށް މަރާމާތުކޮށް ބޭނުންވާ މަސައްކަތްތައް ކުރުމަށް ފައިސާ ހޯދުމަށް، ޓެލެތޯނެއްވެސް ކުރިއަށްގެންދިއުމަށް ރާވާކަމަށެވެ. ނަމަވެސް މި ޓެލެތޯން ބާއްވާނީ ކޯވިޑްގެ ޙާލަތަށް ބަލާ، ޙާލަތު ރަނގަޅުވުމުންކަމަށް ކައުންސިލުން ވިދާޅުވެއެވެ.