އީގަލް ހިލްސް މަޝްރޫޢުގައި ޤާނޫނާ ޚިލާފު އެއްވެސް ކަމެއް ސަރުކާރުން ނުކުރާނެ: އޭޖީ

ރަސްމާލޭގައި އީގަލް ހިލްސްއިން ކުރިއަށްގެންދާ މަޝްރޫޢުގައި ޤާނޫނާ ޚިލާފު އެއްވެސް ކަމެއް ނުކުރާނެ ކަމަށް ބަންޑާރަނައިބު އަލްއުސްތާޛް އަހުމަދު އުޝާމް ވިދާޅުވެއްޖެއެވެ.

ބަންޑާރަނައިބު މިހެން ވިދާޅުވީ ރަސްމާލެއިން ބައެއް ބޭރުގެ ފަރާތަކަށް ވިއްކާލީކަމަށް ސަރުކާރަށް ތުހުމަތުކޮށް ދެކެވޭ ވާހަކަތަކަށް ރައްދުދެއްވައި ސޯޝަލް މީޑިއާގައި ހިއްސާ ކުރެއްވި މެސެޖެއްގައެވެ.

ރަސްމާލޭގައި 20 ބިލިޔަން ޑޮލަރުގެ ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްޤީކުރުމަށް އަބޫދާބީގެ މަޝްހޫރު ޑިވެލޮޕަރ "އީގަލް ހިލްސް" އާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކުރީ މި މަހުގެ 21ވަނަ ދުވަހުއެވެ. މި އެއްބަސްވުމުގެ ދަށުން ރަސްމާލެއިން 500 ހެކްޓަރުގެ ބިމެއް 99 އަހަރަށް އެ ކުންފުންޏަށް ކުއްޔަށް ދިނުމަށް ނިންމާފައިވާއިރު އެއީ ބޭރުބަޔަކަށް ޤާނޫނާ ޚިލާފަށް ރާއްޖޭން ބިން ވިއްކާލުމުގެ އަމަލެއް ކަމަށް އިދިކޮޅު ބައެއް ފަރާތްތަކުން ދަނީ ތުހުމަތު ކުރަމުންނެވެ.

މިކަމާ ގުޅިގެން ސޯޝަލް މީޑިއާގައި ހިއްސާކުރެއްވި މެސެޖެއްގައި ބަންޑާރަނައިބު އަލްއުސްތާޛް އަހުމަދު އުޝާމް ވިދާޅުވީ ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރު ކަމަށާއި އޭރު ޤާނޫނުގެ ދަށުން ރިސޯޓުތައް ކުއްޔަށް ދެމުން އައީ ގިނަވެގެން 25 އަހަރު ދުވަހުގެ މުއްދަތަށް ކަމަށެވެ. ނަމަވެސް ޤާނޫނަށް ގެނެވުނު އިސްލާހަކުން އެމުއްދަތު 50 އަހަރަށް 2010 ވަނަ އަހަރު އިތުރުކުރި ކަމަށާއި އެއަށްފަހު އެމުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ކަމަށްވެސް ވިދާޅުވިއެވެ.

ރައީސް ޔާމީން މިއަދު ހަނދުމަފުޅުނެތީ ކަމަށް ވެދާނެ. އެހެންނަމަވެސް ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ރައީސް ޔާމީންގެ ވެރިކަމުގައި.

ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރު. އޭރު ޤާނޫނުގެ ދަށުން… https://t.co/8EsaBnfvul

— Ahmed Usham (@a_usham) September 29, 2026

ޓޫރިޒަމާބެހޭ ޤާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން ޓޫރިސްޓް ރިސޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެރަށެއްގައި ކޮށްފައިވާ އިންވެސްޓްމަންޓެއްގެ އަގުން ބަލަށް ކެނޑުމަށްފަހު ޖެހޭ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަންޖެހޭ ކަމަށްވެސް ބަންޑާރަނައިބު ވިދާޅުވިއެވެ.

ބަންޑާރަނައިބު ވިދާޅުވީ ރަސްމާލޭގައި ހިންގުމަށް ރާވާފައިވާ މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަަމައެކަނި ލެޓަރ އޮފް އިންޓެންޓް ނުވަތަ ކޮމާޝަލް ޓަރމްސް އެގްރީމެންޓެއްގައި ކަމަށާއި މަޝްރޫއު ފެށުމުގެ ކުރިން އެ އެގްރީމެންޓްގައިވާ ކަންކަމުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ އެއްބަސްވުމެއްގައި ސޮއިކުރެވޭނެ ކަމަށްވެސް ވިދާޅުވިއެވެ.

މީގެ އިތުރުން މިކަމާ ގުޅުންހުރި ޤާނޫނުތައް މަޖިލީހުން ފާސްކުރަންޖެހޭނެ ކަމަށްވެސް ވިދާޅުވިއެވެ.

ބަންޑާރަނައިބު ވިދާޅުވީ މި މަޝްރޫއު ކުރިއަށް ގެންދިއުމުގެ ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރައްވާނެ ކަމަށެވެ.