މޫސުމަށް އަންނަ ބަދަލުތަކުން އެންމެ ބޮޑު ގެއްލުމެއް ލިބޭ ޤައުމުތަކުގެ ދަރަނިތައް ރީ-ސްޓްރަކްޗަރ ކުރުމަކީ މިވަގުތަށް ވަރަށް މުހިންމުކަމެއްކަމަށް ގްލޯބަލް ސެންޓަރ އޮން އެޑަޕްޓޭޝަން ގެ ޗީފް އެގްޒެކެޓިވް އޮފިސަރ ޑރ.ޕެޓްރިކް ވާރކޫއިޖެން ވިދާޅުވެއްޖެއެވެ.
ގްލޯބަލް ސެންޓަރ އޮން އެޑަޕްޓޭޝަން (ޖީސީއޭ)އަކީ މޫސުމަށް އަންނަ ބަދަލުތަކުން ލިބޭ ގެއްލުންކުޑަކޮށް، އެކަމުން އަރައިގަތުމަށް ޤައުމުތަކުން ކުރާ މަސައްކަތްތަކަށް މާލީ އެހީތެރިކަން ފޯރުކޮށްދޭ ބައިނަލްއަޤްވާމީ ޖަމްޢިއްޔާއެކެވެ.
މޫސުމަށް އަންނަ ބަދަލުތަކުން އަރައިގަތުމަށް ރާއްޖެއިން ކުރާ މަސައްކަތަށް އެހީތެރިވެދިނުމުގެ ގޮތުން 200 މިލިއަން ޑޮލަރު ރާއްޖެއަށް ހޯދައިދިނުމަށް އެ ޖަމްޢިއްޔާއިން ވަނީ މިދިޔަ އަހަރު އެއްބަސްވެފައެވެ. ޖީސީއޭގެ ޗީފް އެގްޒެކެޓިވް އޮފިސަރ ޑރ.ޕެޓްރިކް ރާއްޖެ ވަޑައިގަތީ އެ މަސައްކަތް ފެށުމަށްޓަކައި ކަމާބެހޭ ފަރާތްތަކާއި މަޝްވަރާކުރެއްވުމަށެވެ.
މިގޮތުން މިއަދު ރައްޔިތުންގެ މަޖިލީހުގައި ތަޤްރީރްކުރައްވަމުން ޑރ.ޕެޓްރިކް ވިދާޅުވީ، މޫސުމަށް އަންނަ ބަދަލުތަކުގެ ސަބަބުން އެންމެ ބޮޑު ގެއްލުމެއް ކުރިމަތިވެފައިވާ ޤައުމުތަކުގެ ދަރަނީގެ މައްސަލަތައް ހައްލުކުރުމަށް ދަރަނި ރީ-ސްޓްރަކްޗަރ ކުރުމަކީ ވަރަށް މުހިންމު ކަމެއްކަމަށެވެ. ޑރ.ޕެޓްރިކް ވިދާޅުވީ ދަރަނި ރިސްޓްރަކްޗަރ ކޮށްފިނަމަ އިޤްތިޞާދީ ގޮތުން ގިނަ ފައިދާތަކެއް ކުރާނެކަމަށާއި، އެއީ ރާއްޖެފަދަ ތިމާވެށީގެ މައްސަލަތައް ބޮޑު ޤައުމަކުން ކުރުންވެސް ރަނގަޅުކަމެއްކަމަށެވެ.
ޑރ.ޕެރޓްރިކް ވަނީ ބައިނަލްއަޤްވާމީ މާލީ އިދފާރާ (އައިއެމްއެފް)އިން ޤާއިމްކުރުމަށް ނިންމާފައިވާ "888ޕީ" ޕްރޮގްރާމުގެ ތެރެއިން ރާއްޖެއަށް ފައިސާ ހޯދައިދިނުމަށް ޖީސޭއޭއިން މަސައްކަތްކުރާނެކަމަށެވެ.
މޫސުމީ ބަދަލުތަކަށް ހޭނުމަށާއި، މިކަމުން ލިބޭ ގެއްލުން ކުޑަކުރުމަށް ރާއްޖެއިން ކުރަމުން ގެންދާ މަސައްކަތްތަކަށް އެއްބާރުލުން ދިނުމަށް ދަ ގްލޯބަލް ސެންޓަރ އޮން އެޑަޕްޓޭޝަން (ޖީސީއޭ) އާއި ރާއްޖެއާ ދެމެދު އެއްބަސްވުމެއްގައި ސޮއިކުރީ ކޮޕް26 ސަމިޓްގެ ހަވާސާގައެވެ.
މި އެއްބަސްވުމުގެ ދަށުން ޖީސީއޭ އިން ރާއްޖެއަށް އެހީފޯރުކޮށްދިނުމަށް ހަމަޖެހިފައިވާ ދާއިރާތަކުގެ ތެރޭގައި މޫސުމަށް އަންނަ ބަދަލުތަކުގެ ސަބަބުން ދަނޑުވެރިކަމަށާއި، ފެނުގެ ވަސީލަތްތަކަށާއި، ރާއްޖޭގެ ރަށްރަށަށް ކުރާނެ ނޭދެވޭ އަސަރުތައް ކުޑަކުރުމާއި، މި ކަންކަމަށް ބޭނުންވާ މާލީ އެހީ ހޯދުން ހިމެނެއެވެ.