ގދ.ފަރެސްމާތޮޑާ އެއަރޕޯޓްގެ ޓަރމިނަލްގެ ޢަމަލީ މަސައްކަތްތައް ފަށައިފިއެވެ. ގދ.ފަރެސްމާތޮޑާ އެއަރޕޯޓް ތަރައްޤީކުރުމުގެ މަސައްކަތް ކުރިއަށްގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީންނެވެ.
ފަރެސްމާތޮޑާ އެއަރޕޯޓް ތަރައްޤީކުރުމަށް އެމްޓީސީސީއާ ހަވާލުކޮށް އެކަމުގެ ޢަމަލީ މަސައްކަތް ފެށީ، 2021ވަނަ އަހަރުގެ ޖެނުއަރީމަހުގައެވެ. މި ޕްރޮޖެކްޓް ކުރިއަށްގެންދަނީ ފަރެސްމާތޮޑާ ފަޅުގައި ހިމެނޭ ފަޅުރަށްތަކެއް ހިއްކައިގެން، ބިން އިތުރުކޮށްގެނނެވެ. ފަރެސްމާތޮޑާ ހިމެނޭ ސަރަޙައްދުގެ ކުދި ފަޅުރަށްތަކާއެކު ޖުމްލަ 19.9 ހެކްޓަރުގެ ބިން އެމްޓީސީސީން ވަނީ މިމަޝްރޫޢުއަށްޓަކައި ހިއްކާފައެވެ.
ފަރެސްމާތޮޑާ އެއަރޕޯޓްގެ މަސައްކަތްތަކުގެ ތެރެއިން ގިނަ މަސައްކަތްތަކެއް ކުރިއަށްގެންގޮސް ނިމިފައިވަނީ ރަންވޭގެ މަސައްކަތްތަކެވެ. އެގޮތުން ރަންވޭގައި ތާރުގެ ކުރިން އަޅާ ފަށާލަތައް ނިމި، ރަންވޭގައި ތާރުއެޅުމުގެ އެންމެ ފަހުގެ މަސައްކަތްތައްދަނީ ކުރިއަށެވެ.
އެމްޓީސީސީން މިހާރު މިވަނީ ފަރެސްމާތޮޑާ އެއަރޕޯޓްގެ ޓަަރމިނަލްގެ މަސައްކަތް ފަށާފައެވެ. އެމްޓީސީސީން ވިދާޅުވި، ޓަރމިނަލްގެ ސްޓްރަކްޗަރގެ މަސައްކަތްތައް މިހާރު ފަށާފައިވާކަމަށެވެ.
ފަރެސްމާތޮޑާ އެއަރޕޯޓަކީ، ފަރެސްމާތޮޑާގެ ރައްޔިތުންނައި އެ ސަރަޙައްދުގެ ރައްޔިތުން ވަރަށްބޮޑަށް އުންމީދުކުރަމުން އަންނަ މަޝްރުޢުއެކެވެ. އެއަރޕޯޓްގެ ޓަރމިނަލްގެ މަސައްކަތްތައް ފެށުމާގުޅިގެން، ފަރެސްމާތޮޑާގެ ރައްޔިތުންގެ ފަރާތުން، އެއަރޕޯޓް މަސައްކަތްކުރާ ފަރާތްތަކަށްވަނީ ދެކުމެއް ދީފައެވެ. މިކަމުގައި އިސްކޮށް ހަރަކާތްތެރިވީ ރަށުގެ ކަނބަލުންނެވެ.
ފަރެސްމާތޮޑާގެ އެއަރޕޯޓް ތަރައްޤީކުރަނީ އެތެރޭގެ އުދުހުންތަކަށް ޚާއްސަކޮށްގެންނެވެ. އެއަރޕޯޓްގެ ޓަރމިނަލްގެ މަސައްކަތްތައް ފަށާފައިވާއިރު، މި ޓަރމިނަލް ތަރައްޤީކުރާނީ ތަފާތު ހިތްގައިމު ފަރުމާއަކަށެވެ. މިއީ ރާއްޖޭގައި އެރެތޭގެ އުދުހުންތަކަށް ޚާއްސަކޮށް ހަދާ އެންމެ ތަފާތު ޓަރމިނަލެވެ.
ޓަރމިނަލްގެ ފަޔަރ ބިލްޑިންގެ މަސައްކަތްތައްވެސްދަނި ކުރިއަށެވެ.
އެމްޓީސީސީން ވިދާޅުވެފައިވަނީ ރަންވޭގެ މަސައްކަތްތައް މިއަހަރުގެ މެއިމަހަށް ނިންމާނެކަމަށެވެ. އަަދި އެއަރޕޯޓާ ފަރެސްމާތޮޑާ ގުޅާލުމަށްހަދާ ކޯޒްވޭގެ މަސައްކަތްތައް ޖޫންގެ ނިޔަލަށް ނިންމުމަށް މަސައްކަތް ކުރަމުންދާކަމަށެވެ. އެމްޓީސީސީން މިހާރު އަމާޒު ހިފާފައިވަނީ އެއަޕޯޓްގެ ހުރިހާ މަސައްކަތްތައް މިއަހަރުގެ ޖުލައި މަހުގެ 26ގެ ކުރިން ނިންމާ، ސަރުކާރާ ހަވާލުކުރުމަށެވެ.
200 މީޓަރުގެ ރަންވޭއަކާއެކު ތަރައްޤީކުރާ ފަރެސްމާތޮޑާ އެއަރޕޯޓަކީ އެތެރޭގެ އުދުހުންތަކަށް ޚާއްސަކޮށް ތަރައްޤީކުރާ އެއަރޕޯޓެކެވެ. ފަރެސްމާތޮޑަ އެއަރޕޯތް މަޝްރޫޢުއަށް ދަޢުލަތުގެ ބަޖެޓުން 144.8 މިލިއަން ރުފިޔާ ޚަރަދުކުރެއެވެ.
ސަރުކާރުން މަސައްކަތްކުރަނީ، ރާއްޖޭގެ ކޮންމެ ރަށަކުން ލޯންޗުގައި 30 މިނެޓުގެ ދަތުރެއްކޮށް ދެވޭހާ ކައިރީގައި އެއަރޕޯޓް ތަރައްޤީކުރުމަށެވެ.