ށ.މަތިކޮމަންޑޫގެ ބިން ހިއްކުމުގެ ޢަމަލީ މަސައްކަތް ފަށައިފިއެވެ.
މަތިކޮމަންޑޫ ހިއްކުމުގެ މަޝްރޫޢުއަކީ ކޮމަންޑުއަށް ދިމާވެފައިވާ ބިމުގެ ޖާގައިގެ ދަތިކަން ޙައްލުކޮށްދިނުމަށް ސަރުކާރުން ފަށާފައިވާ މަސައްކަތެކެވެ.
މި މަޝްރޫޢުގެ ދަށުން މަތިކޮމަންޑޫއިން 16.7 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.
ށ.މަތިކޮމަންޑޫ ހިއްކާ ކޮމަންޑުއާ ގުޅާލުމުގެ ޢަމަލީ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީއާއެވެ. މަތިކޮމަންޑޫ ހިއްކުމަށް އެރަށަށް އެމްޓީސީސީގެ ޑްރެޖަރ މަހާޖައްރާފް ދިޔައީ މިދިޔަ ހޮނިހިރުދުވަހުއެވެ. މަހާޖައްރާފަށް ކޮމަންޑޫގެ ރައްޔިތުން ވަނީ ވަރަށް ހޫނު މަރުޚަބާއެއް ކިޔާފައެވެ.
ރަށުގެ ބިމުގެ ޖާގަ އިތުރުވެ، ދިރިއުޅުމުގެ އާއްމު ޙާލަތު ރަނގަޅުވެގެން އައުމަކީ ކޮމަންޑޫގެ ރައްޔިތުންގެ އެންމެ ބޮޑު ހުވަފެނެވެ. ބިމުގެ ދަތިކަމުގެ ސަބަބުން ރަށުގެ ރައްޔިތުން ތިބީ، އަސާސީ އެރަށް ޚިދުމަތަކުން މަޚުރޫމުވެފައެވެ.
ގެދޮރު އެޅުމަށް އިތުރަށް ބިން ނެތުމާއި، އަދި ރަށަށް އިތުރު އާމްދަނީ ހޯދުމަށް ރަށުގައި އިޤްތިޞާދީ ހަރަކާތްތައް ހިންގޭނެ ގޮތެއް ނެތިފައެވެ.
ކޮަމަންޑޫއަކީ 9 ހެކްޓަރުގެ ބިމެކެވެ. ބިން އޮތީ މީހުން ދިރިއުޅުމަށް ގެ އަޅާ ފުރިފައެވެ. ބިން ނެތުމުގެ ސަބަބުން ރަށުގެ ރައްޔިތުން ތިބީ އިޤްތިޟާދީ އަދި އިޖްތިމާޢީ ހަރަކާތްތައް ރަށުގައި ހިންގެނޭ އެއްވެސް ގޮތެއްވެސް ނެތިފައެވެ.
ރަށުގެ ރެޖިސްޓަރޑް އާބާދީ 1900 އިން މަތިގައި ހުރިނަމަވެސް، ރަށުގައި ދިރިއުޅޭ އާބާދީއަކީ 600އެވެ. ރަށުގެ ގިނަ ރައްޔިތުންތަކެއް އެހެން ރަށްތަކަށް ހިޖުރަކުރަން ޖެހުނު އެންމެ ބޮޑު ސަބަބަކީވެސް މިއެވެ.
ދެ ކޮމަންޑޫ ގުޅާލުމަށް މަތިކޮމަންޑޫގެ ބިން ހިއްކުމަށް އެމްޓީސީސީއާ ހަވާލުކޮށްފައިވަނީ ޖެނުއަރީމަހުގެ 12 ވަނަ ދުވަހުއެވެ. އަދި ޖެނުއަރީ 14 ވަނަ ދުވަހުވަނީ އެކަމުގެ ޢަމަލީ މަސައްކަތަށް ބޭނުންވާ ސަމާނު ރަށަށް ގެންގޮސް، ސައިޓު މަސައްކަތްތައް ފަށާފައެވެ.
މަތިކޮމަންޑޫއިން 16.7 ހެކްޓަރުގެ ބިން ހިއްކުމުގެ އިތުރުން، މަޝްރޫޢުގައި ދެން ހިމެނެނީ، ކޮމަންޑޫގައި 1690 މީޓަރުގެ ޝޯރ ޕްރޮޓެކްޝަން ރެކްޓިފިކޭޝަން މަސައްކަތް ކުރުމާއި، މަތިކޮމަންޑޫގައި 1520 މީޓަރުގެ ބޮޑުހިލައިގެ ތޮށިލުމާއި ޖުމުލަ 353 މީޓަރުގެ ބޮޑުހިލައިގެ ފައިކަށި އަދި 112 މީޓަރުގެ ޖީއޯބޭގް ތޮށި މަތިކޮމަންޑޫގައި ޤާއިމްކުރުމުގެ މަސައްކަތެވެ.
ބިންހިއްކުމަށްފަހު ކޮމަންޑުއާއި މަތިކޮމަންޑޫ ގުޅާލުމަށް ހަމަޖެހިފައިވަނީ 200 މީޓަރުގެ ދިގުމިނުގެ ލިންކަކުންނެވެ. މި މަޝްރޫޢުއަށް ދައުލަތުގެ ބަޖެޓުން 249 މިލިޔަނަށްވުރެ ގިނަ ރުފިޔާ ޚަރަދުކުރާނެއެވެ. މަސައްކަތް ހަވާލުކޮށްފައިވަނީ ދެ އަހަރުގެ ތެރޭގައި ނިންމުމަށެވެ.