ސަރުކާރުގެ ޕީއެސްއެސްއައިޕީ ބަޖެޓުގެ އެންމެ ބޮޑު ހޭދައެއް ކުރަމުންދަނީ ރާއްޖޭގެ ރަށްރަށުގެ ލަފާފުރުމުގެ ދަތިކަން ޙައްލުކޮށްދިނުމަށެވެ. ބައެއް ރަށްތަކަކީ މިހާތަނަށް އައިއިރުވެސް ބަނދަރެއްގެ އުފާ ލިބިފައި ނެތް ރަށްތަކެވެ. އަނެއްބައި ރަށްތަކަކީ ބަނދަރެއް އޮވެ، އޭގެ އެއްވެސް ފަސޭހައެއް ރަށުގެ އޮޑިވެރިންނާ ރައްޔިތުންނަށް ލިބެމުން ނުދާ ރަށްތަކެވެ.
ށ.ފޯކައިދުއަކީ ރަށުގައި ބަނދަރެއް އޮވެ އޭގެ ފަސޭހަ ނުލިބި، ރަށުގެ ރަށްޔިތުންގެ ބޮޑު ކަންބޮޑުވުމަކަށް ވެފައިވާ މައްސަލައެވެ. 650 ފޫޓު ދިގު، 190 ފޫޓު ފުޅާ އެރަށު ބަނދަރުގައި، އުޅަނދުތަކަށް އެއްވެސް ރައްކާތެރިކަމެއް ނެތެވެ. 2003ވަނަ އަހަރު އެރަށުގައި އެޅި ބަނދަރަކީ ސިމެންތި ބަސްތާ ޖަހައިގެން އޭރު ހެދި ބަނދަރުތަކުން ބަނދަރެކެވެ.
ބޭރުން ޖަހާފައި އޮތް ތޮށި ވެއްޓީ، ރާޅާއި ބާނިތައް ބަނދަރުތެރެއަށް ވަދެ ރަށުގެ އުޅަނދުތަކަށް ބޮޑެތި ގެއްލުންތަކެއް ކުރިމަތިވެއެވެ. ރާޅު ބާނީގެ ސަބަބުން އުޅަނދުތައް ބަނދަރަށް ވަންނަން އުޅުމުގެ ތެރޭގައި މީހުންނާ މުދަލަށްވެސް ބޮޑެތި ގެއްލުންތައް ވެފައިވެއެވެ.
އެއްގަމު ތޮށީގެ ބޮޑުބައެއްވެސް ހަލާކުވެ، އުޅަނދުތައް ކައިރި ނުކުރެވޭވަރުވެފައި ވަނިކޮށް ސަރުކާރުން، ފޯކައިދޫގައި މުޅިން އާ ބަނދަރެއް ތަރައްޤީކުރުމަށް އެމްޓީސީސީއާ ހަވާލުކުރީ 2020ވަނަ އަހަރުގެ ފަހުކޮޅުއެވެ.
އެމްޓީސީސީން މިހާރުދަނީ ރަށުގެ ސައިޓުގައި މަސައްކަތް ފަށާ ކުރިއަށްގެންދަމުންނެވެ. މި މަޝްރޫޢު ސަރުކާރުން ހަވާލުކޮށްފައިވަނީ ރަށުގައި މިހާރު ބޭނުންކުރާ ބަނދަރުވެސް މުޅިން ނަގާ، ބަނދަރު ބޮޑުކޮށް ޒަމަނީ ބަނދަރަކަށް ބަދަލުކުރާގޮތަށެވެ. ރަށުގައި އަލަށް ތަރައްޤީކުރަން ފަށާފައިވާ ބަނދަރަކީ 1200 ފޫޓު ދިގު، 250 ފޫޓު ފުޅާ ބަނދަރެކެވެ. މިއީ ކުރީގެ ބަނދަރުގެ ދެ ގުނަ ބޮޑު ބަނދަރެކެވެ.
އެމްޓީސީސީން މިހާރު ކުރިއަށްގެންދަނީ ބަނދަރު ފުންކުރުމާއި، އަދި ބަނދަރުގެ ބޭރު ތޮށީގައި ހިލަ ޖެހުމުގެ މަސައްކަތެވެ.
ޕްރޮޖެކްޓްގެ މަސައަކަތްތައް ކުރިއަށްދާ ގޮތާއި ގުޅޭގޮތުން އެމްޓީސީސީގެ ސީއީއޯ ޢާދަމް އާޒިމް ވިދާޅުވީ، އެމްޓީސީސީން މަސައްކަތްކުރަނީ، ބަނދަރަށް އަލަށް އިތުރުކުރާ ބައިގެ މަސައްކަތް ފުރަތަމަ ނިންމާ، މިހާރު ބޭނުންކުރާ ބަނދަރު އަލުން ތަރައްޤީކުރަން ފެށުމަށްކަމަށެވެ. އާޒިމް ވިދާޅުވީ މަސައްކަތް ފެށި ދުވަސްވަރު ތަކެތި ލިބުމުގައި ދަތިތަކެއް ހުރިނަމަވެސް، މިހާރު ބޭނުންވާ ސާމާނު ލިބި މަސައްކަތް ބާރު އަލުން ފަށައިގަނެފައިވާކަމަށެވެ.
މި ބަނދަރު ބޮޑުކުރަނީ ރަށު ތެރެއަށް ބައެއް ކޮނެގެންނެވެ. އާޒިމް ވިދާޅުވީ ބަނދަރަށް އަލަށް އިތުރުކުރާ ބައިގެ އެއްގަމު ތޮށިލުމަށް ބޭނުންވާ ކީ ވޯލްތައްވެސް ރަށަށް ވަރަށް އަވަހަށް ގެންނާނެކަމަށެވެ.
"މިއަހަރުގެ ޖުލައި އޮގަސްޓަށް ހުރިހާ މަސައްކަތްތައް ނިންމާނަން. މިއީ މި ސަރަޙައްދުގައިވެސް އިޤްތިޞާދީ ހަރަކާތްތައް އެންމެ ގިނަ އެއް ރަށް. މިއީ ރަށަށް ބޭނުންވާވަރުގެ ބޮޑު ޒަމާނީ ބަނދަރެއް." އާޒިމް ވިދާޅުވިއެވެ.
ފޯކައިދޫ ބަނދަރު ތަރައްޤީކުރަނީ ޒަމާނީ ބަނދަރެއްގެ ގޮތުގައެވެ. އެގޮތުން ބަނދަރުގެ 2320 އަކަމީޓަރުގެ ސަރަޙައްދުގައި ޕޭވްމަންޓް ހެދުމާއި ނެރުބައްތިއާއި މަގުބައްތިޖެހުމުގެ މަސައްކަތް އެމްޓީސީސީން ކުރިއަށްގެންދާނެއެވެ. މި ޕްރޮޖެކްޓަކީ ސަރުކާރުން 55.97މިލިއަން ރުފިޔާ ޚަރަދުކޮށްގެ ކުރިއަށްގެންދާ މަޝްރޫޢުއެކެވެ.