އިނގިރޭސި ޕްރިމިއާ ލީގުގައި ރޭ ބްރައިޓަން ހޯލްވް އެންޑް އަލްބިއަން އާއި ޗެލްސީ ވާދަކުރި މެޗް އެއްވަރުވެ، ލީގް ޗެންޕިއަން ހޯދުމުގެ ރޭހުގައި އެޓީމް އަނެއްކާވެސް ފަހަތަށް ޖެހިއްޖެއެވެ. މިދެ ޓީމް ވާދަކުރި މެޗް ނިމުނީ 1 ލަނޑު 1 ލަނޑުން ދެ ޓީމް އެއްވަރުވެގެންނެވެ.
މިމެޗް އެއްވަރުވެފައިވާއިރު، ލީގްގައި ޗެލްސީއިން އެންމެ ފަހުން ކުޅުނު 4 މެޗުންވެސްވަނީ މޮޅެއް ލިބޭ ގޮތް ނުވެފައެވެ. މިމެޗުން މޮޅުވިނަމަ، ޗެލްސީއަށް ލީގު ތާވަލްގެ ދެވަނައަށް އެރުމުގެ ފުރުސަތު އޮތެވެ. ނަމަވެސް މެޗް އެއްވަރުވުމުން ޗެލްސީ އޮތީ ލީގް ތާވަލްގެ ތިންވަނައިގަ. ޕްރިމިއަރ ލީގް ތާވަލްގެ އެއްވަނައިގައި މިވަގުތު އޮތީ އެންމެ ފަހުގެ ޗެންޕިއަން މެންޗެސްޓަރ ސިޓީ، އެއީ 22 މެޗުން 56 ޕޮއިންޓް ހޯދައިގެން. ދެވަނައިގައިވާ ލިވަޕޫލަށް 21 މެޗުން ލިބިފައިވަނީ 45 ޕޮއިންޓެވެ. ތިންވަނައިގައި އޮތީ ޗެލްސީއެވެ.
ރަށުން ބޭރުގައި ކުޅުނު މިމެޗްގެ ކުރީކޮޅުގައި ބްރައިޓަންގެ ފަރާތުން މޮޅު ކުޅުމެއް ފެނިގެންދިޔައެވެ. ނަމަވެސް މެޗްގައި އެންމެ ފުރަތަމަ ލީޑް ނެގީ ޗެލްސީއިންނެވެ. މެޗްގެ 28ވަނަ މިނެޓްގައި މިލަނޑު ޗެލްސީއަށް ކާމިޔާބުކޮށްދިނީ ހަކީމް ޒިޔެޗްއެވެ. މިބޯޅަ ގޯލަށް ވަދެފައިވަނީ ބްރައިޓަންގެ ގޯލްކީޕަރު ރޮބާޓޯ ސަންޗޭޒް އަތުގައި ޖެހިފައެވެ. މެޗްގެ ފުރަތަމަ ހާފްގައި ބްރައިޓަންއަށް ނަތީޖާ ހަމަހަމަ ކުރުމަށް އެންމެ ރަގަނޅު ފުރުސަތެއް ލިބިގެންދިޔައީ އެޓީމްގެ ޑެނީ ވެލްބެކަށެވެ. ނަމަވެސް ވެލްބެކަށްވަނީ ގޯލާއި ދިމާލަށް ބޯޅަ ރަގަނޅަށް ފޮނުވާލެވޭ ގޮތް ނުވެފައެވެ.
މެޗްގެ ދެވަނަ ހާފްގެ ކުރީކޮޅުގައިވެސް ބްރައިޓަންއަށް ނަތީޖާ ހަމަހަމަކޮށްދިނުމަށް އެންމެ ރަގަނޅު ފުރުސަތެއް ލިބުނީ ވެލްބެކަށެވެ. ނަމަވެސް މިފަހަރުވެސް ވެލްބެކްގެ ހަމަލާ ކާމިޔާބުވާގޮތެއް ނުވިއެވެ. މެޗްގެ 60ވަނަ މިނެޓްގައި ބްރައިޓަންއިންވަނީ ލަނޑެއްޖަހާ މެޗްގެ ނަތީޖާ ހަމަހަމަކޮށްފައެވެ. މިލަނޑު ބްރައިޓަންއަށް ކާމިޔާބުކޮށްދިނީ އެޓީމުގެ ކެޕްޓަން އެޑަމް ވެބްސްޓާއެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި ބްރައިޓަންގެ ފޯވާޑް ނީލް މޯޕޭ އަށް ވަނީ އެ ޓީމު މޮޅުކޮށްދޭން ރަނގަޅު ފުރުސަތުތަކެއް ލިބިވަނީ ބޭކާރުވެގެން ގޮސްފައެވެ.