މިހާރު ކުރިމަތިވެފައިވާ ޢާލަމީ ވަބާގެ ކުރިންވެސް ހުމާއި ރޯގާގެ ބަލިމަޑުކަން އެކިދުވަސްވަރު ކުރިމަތިވެއެވެ. އެހެންނަމަވެސް ކޯވިޑުން ރައްކާތެރިވުމަށް އެޅި ފިޔަވަޅުތަކާއެކު ގައިންގަޔަށް އަރާބަލިތައް މިވޭތުވެދިޔަ 2 އަހަރުވެސް ވަރަށް ބޮޑަށްވަނީ ކޮންޓްރޯލް ކުރެވިފައެވެ.
އެހެންނަމަވެސް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ޢާއްމުކޮށްފައިވާ ތަފާސްހިސާބުތައް ދައްކާގޮތުން މިއަހަރުގެ ފުރަތަމަ ހަފްތާގެ ނަންބަރުތައް އެކަނިވެސް ވަނީ މިދިޔަ އަހަރާ އަޅާބަލާއިރު ދެގުނަ އިތުރުވެފައެވެ.
ރާއްޖޭގެ އެކި ހިސަބުތަކުގައި މިދުވަސްވަރު ކަންބޮޑުވާ މިންވަރަށް ބޭރަށް ހިނގާ ހޮޑުލުންވަނީ އިތުރުވެފައެވެ. ހެލްތު ޕްރޮޓެކްޝަން އޭޖެންސީ އެޗްޕީއޭއިން ހާމަކުރައްވާފައިވާ ތަފާސްހިސާބުތައް ދައްކާގޮތުން ވޭތުވެދިޔަ 3 އަހަރާ އަޅާބަލާއިރު ބޭރަށް ހިނގުމާއި ހޮޑުލުމުގެ ބަލި އެންމެ ގިނައީ މިއަހަރުގެ ފުރަތަމަ ހަފްތާގައެވެ. އެޗްޕީއޭގެ ޑޭޓާ ދައްކާގޮތުން ބަލީގެ ކޭސްތައް އިތުރުވާން ފަށާފައިވަނީ މިދިޔަ އަހަރުގެ ފަހު ހަފްތާއިން ފެށިގެންނެވެ. އަދި މިއަހަރުގެ ފުރަތަމަ ހަފްތާގައި އެކަނިވެސް ރާއްޖޭގެ އެކި ހިސާބުތަކުން 3491 ކޭސްވަނީ ރިޕޯޓުކޮށްފައިވާކަމަށް އެޗްޕީއޭއިން ވިދާޅުވެއެވެ. އަދި މިހާތަނަށް މާލެ ސަރަޙައްދުން ރިޕޯޓުކޮށްފައިވާ ޢަދަދުތައްވަނީ ވޭތުވެދިޔަ މުޅި އަހަރު ރިޕޯޓުކޮށްފައިވާ ޢަދަދަށްވުރެ އިތުރުވެފައެވެ.
އެޗްޕީއޭގެ ތަފާސްހިސާބުތައް ދައްކާގޮތުން މިދިޔަ އަހަރު މާލެ ސަރަޙައްދުން 1203 ކޭސް ރިޕޯޓުކޮށްފައިވެއެވެ. މިއަހަރުގެ ފުރަތަމަ ހަފްތާގައި އެކަނި މިސަރަޙައްދުންވަނީ 2935 ކޭސް ރިޕޯޓުކޮށްފައެވެ. ގްރޭޓަރ މާލެ ސަރަޙައްދު ފިޔަވައި ދެން އެންމެ ގިނަ މީހުންނަށް ބޭރަށްހިންގުމާއި ހޮޑުލުމުގެ ބަލިމަޑުކަން ކުރިމަތިވެގެން ރިޕޯޓުކުރަމުންދަނީ ކ.އަތޮޅުގެ އެހެން ރަށްތަކުންނެވެ. އެގޮތުން ފުރަތަމަ ހަފްތާގައި މާލެ އަތޮޅުގެ އެހެން ރަށްތަކުންވަނީ 198 ކޭސް ރިޕޯޓުކޮށްފައެވެ. އެހެން އަތޮޅުތަކުންވެސް ރިޕޯޓުކުރަމުންދާ ނިސްބަތް އިތުރުވަމުންދާއިރު މިޢަދަދުތައް ކުރިއަށް އޮތް ހަފްތާތަކުގައި އިތުރުވުމުގެ ފުރުސަތު ބޮޑުކަމަށް އެޗްޕީއޭއިން ވިދާޅުވެއެވެ.
އިތުރުވަމުންދާ ބަލިތަކާ ގުޅޭގޮތުން ނޫސްވެރިންނަށް މަޢުލޫމާތު ދެއްވަމުން އެޗްޕީއޭގެ އެޕިޑަމޮލޮޖިސްޓް ޑރ.އިބްރާހީމް އަފްޒަލް ވިދާޅުވީ މިހާރު ފެތުރެމުން އަންނަ ބޭރަށްހިންގުމުގެ ރޯގާއަކީ ނޯރޯ ވައިރަސްއެއްގެ ޒަރީއްޔާއިން ފެތުރެމުންދާ ބައްޔެއްކަމަށެވެ. އެހެންކަމުން އެކެއްގެ ގައިން އަނެކެއްގެ ގަޔަށް އެރުމުގެ ފުރުސަތު ވަރަށް ބޮޑު ކަމަށެވެ.
"ޖަރާސީމު ހަށިގަނޑަށް ވާސިލުވާތާ 12 ގަޑިއިރާއި 48 ގަޑިއިރާ ދެމެދުގެ މުއްދަތެއްގެ ތެރޭގައި ޢަލާމާތްތައް ފެންނާނެ. އަދި 24 ގަޑިއިރާއި 60 ގަޑިއިރާ ދެމެދުގެ މުއދަތެއްގެ ތެރޭގައި ބަލި ފަސޭހަވޭ ގިނަ ކޭސްތަކުގައި." ޑރ.އިބްރާހީމް އަފްޒަލް ވިދާޅުވިއެވެ.
ޑރ.އަފްޒަލް ވިދާޅުވީ ކުރު މުއްދަތަކަށް ބަލީގެ ޢަލާމާތްތައް ހުރިނަމަވެސް އެމުއްވަތުގެ ތެރޭގައި ބޮޑުވަރުވާކަމަށެވެ. ބޭރަށް ހިންގާ ހޮޑުލެވުމުގެ ސަބަބުން ހަށިގަނޑުން ވަރަށް ބޮޑަށް ފެންދަމާލާކަން ފާހަގަކުރައްވާ ޑރ.އަފްޒަލް ވިދާޅުވީ ބަލިވެ އުޅޭ މުއްދަތުގައި ވީހާވެސްގިނައިން ދިޔާ ތަކެތި ބޭނުންކުރަންޖެހޭކަމަށެވެ. އަދި ބަލިވެ އުޅޭ މީހުންނަށް އެހީތެރިވާ ފަރާތްތަކުންވެސް ރައްކާތެރުވުމަށް ޢާއްމު ސާފުތާހިރުކަމަށް އިސްކަންދިނުމަށްވަނީ އިލްތިމާސްކުރައްވާފައެވެ. އެގޮތުން ހޮޑުލެވޭ ތަންތަން ސާފުކުރުމާއި އެފަދަ ޢަންނައުނު ދޮވުމުގައިވެސް ޚާއްސަ ސަމާލުކަމެއް ދިނުމަށްވަނީ އިރުޝާދު ދެއްވާފައެވެ. އަދިބަލީގެ ނިޝާންތައް ފެނުމާއެކު ލޮނު ޕެކެޓް ބޭނުންކުރުމަށްވެސްވަނީ ނަސޭޙަތްތެރިވެފައެވެ.