ހައްދުންމަތީގެ އިތުރު 3 ރަށެއްގެ ކަރަންޓު ވިއުގަ، އެއް ވިއުގައަކަށް ބަދަލުކުރުމުގެ މަސައްކަތް ފެނަކަ ކޯޕަރޭޝަނުން ފަށައިފިއެވެ. މީގެތެރޭގައި ހިމެނެނީ އިސްދޫ، ކަލައިދޫ އަދި ދަނބިދޫގެ ކަރަންޓުގެ ވިއުގައެވެ.
ކަރަންޓުގެ ޚިދުމަތް ޒަމާނީ ވަސީލަތްތަކަށް ބަދަލުކޮށް، ޚިދުމަތް ދިނުމުގައިވެސް ފަސޭހަކުރުމުގެ ގޮތުން ގިނަގުނަ މަސައްކަތްތަކެއް ފެނަކައިން އަންނަނީ ކުރަމުންނެވެ. ފެނަކައިން ފަށާފައިވާ އެންމެ މުހިންމު އެއް މަސައްކަތަކީ ކަރަންޓުގެ ވިއުގަ ގުޅާލައިގެން ޚިދުމަތް ދެވެންހުރި ސަރަޙައްދުތަކުގެ ވިއުގަ ގުޅާލުމުގެ މަސައްކަތެވެ.
މިވަގުތުވެސް ފެނަކައިން ޚިދުމަތްދޭ 2 ސަރަޙައްދެއްގެ ކަރަންޓު އެއްވިއުގައަކުން ގުޅާލާ، އަންނަނީ ޚިދުމަތް ދެމުންނެވެ.
"ސެންޓްރަލް ޕަވަރހައުސް" ނުވަތަ މައި އެއް އިންޖީނުގެ މެދުވެރިކޮށް ހައްދުންމަތީގެ އިތުރު 3 ރަށުގެ ކަރަންޓު ވިއުގަ ގުޅާލުމުގެ މަސައްކަތް ފެނަކައިން މިވަނީ ފަށާފައެވެ. އެއީ ހައްދުންމަތީ އިސްދޫ، ކަލައިދޫ އަދި ދަނބިދޫގެ ކަރަންޓުގެ ވިއުގަ ގުޅާލުމެވެ. މިއީ "ސްޓޭޓް އޮފް ދި އަރޓް މޮޑަރން ޕަވަރ ޕްލާންޓް"އެކެވެ.
މަސައްކަތުގެ ޢަމަލީ މަސައްކަތް ފެށުމަށް ބޭއްވި ރަސްމިއްޔާތުގައި، އިމާރާތުގެ ބިންގާ އަޅުއްވައިދެއްވީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަޙުމަދު ސަޢީދުއާއި، ގަމު ދާއިރާގެ މެންބަރު މުޙައްމަދު ވިސާމްއާއި، ކަލައިދޫ ކައުންސިލްގެ ރައީސް އަޙުމަދު ޝިޔާމް އާއި ދަނބިދޫ ކައުންސިލްގެ ރައީސް އިބްރާޙިމް މިމްރާޙްއެވެ.
މި ޚިދުމަތަށް ބޭނުންވާ ސެންޓްރަލް ޕަވަރ ހައުސް ހުންނާނީ ކަލައިދޫގައެވެ. ޚިދުމަތް ގުޅާލަނީ 6 ސަބް ސްޓޭޝަންގައި ބަހައްޓާ ޓްރާންސްފޯމަރުތައް މެދުވެރިކޮށެވެ.
ސެންޓްރަލް ޕަވަރ ހައުސް މަސައްކަތުގައި ހިމެނެނީ، އޮފީސް އިމާރާތުގެ މަސައްކަތާއި، އިންޖީން ރޫމާއި ކޮންޓްރޯލް ރޫމާއި ބެޓެރި ރޫމްގެ މަސައްކަތެވެ. އިންޖީން ރޫމް ހަދަނީ 1.2 މެގަވޯޓްގެ އިންޖީން ބެހެއްޓޭ 5 ބޭޑް ހިމެނޭގޮތަށެވެ. މި ވިއުގައިގައި 15 ކިލޯ މީޓަރު މީޑިއަމް ވޯލްޓޭޖް އަދި 9.8 ކިލޯ މީޓަރުގެ ލޯ ވޯލްޓޭޖް ކޭބަލް ނެޓްވަރކެއް އަޅާނެއެވެ.
ފެނަކައިން ވަނީ ހައްދުންމަތީގެ ގުޅިފައިވާ އަވަށްތަކުގެ ކަރަންޓުވެސް "ސެންޓަރަލް ޕަވަރ ސްޓޭޝަން"އެއް މެދުވެރިކޮށް ގުޅާލާފައެވެ. އަދި އައްޑޫގެ ގުޅިފައިވާ ރަށްތަކުގެ އިންޖީނުގޭގެ ޚިދުމަތްވެސްވަނީ އެއް ވިއުގައަކުން ގުޅާލާފައެވެ.