އެމްޓީސީ އުފެދި، މިއަދު ކުންފުންޏަށް ފުރެނީ 41 އަހަރެވެ.
ދަތުރުފަތުރުގެ ދާއިރާގެ ކުންފުނީގެ ގޮތުގައި އޭރު އެނގުނު ކުންފުނި، މިހާރު ހުރިހާ ދިވެހިން ދަންނަނީ ކޮންމެވެސް ރަށެއްގެ އެއަރޕޯޓެއް، ބަނދަރެއް ނޫނީ މަގު ތަރައްޤީކުރަމުންދާ ކުންފުނީގެ ގޮތުގައެވެ. ރާއްޖެ ޒަމާނީ ތަރައްޤީއަށް ހުޅުވާލަދިން ކުންފުނީގެ ގޮތުގައެވެ.
ވޭތުވެ ދިޔަ ތިން އަހަރުތެރޭގައި ކުންފުނީގެ ދުވެލިވަނީ އެތައް ގުނައެއް ބާރުވެފައެވެ. 1200 މުޢައްޒަފުން ތިބި ކުންފުނީގައި މިހާރު 3000އަށްވުރެ ގިނަ މުވައްޒަފުންދަނީ މަސައްކަތްކުރަމުންނެވެ. ބޮޑު އިންސައްތައެއް ޙިއްސާކުރަނީ ދިވެހި ޒުވާނުންނެވެ.
ކުންފުނީގެ އެންމެ ބޮޑު ކާމިޔާބީއަކީ، ކުންފުނިން ކުރާ އުމްރާނީ މަސައްކަތްތައް އިތުރުވެގެންދިއުމެވެ. މަސައްކަތްތައްވަނީ 3ގުނަ އިތުރުކޮށްފައެވެ.
ކުރިން އެއްފަހަރާ 25 މަޝްރޫޢު ހިންގި ކުންފުނިން، މިހާރު އެއްފަރާ 60އަށްވުރެ ގިނަ މަޝްރޫޢުގެ ޢަމަލީ މަސައްކަތް އަންނަނީ ކުރަމުންނެވެ. ބަނދަރެއް އޭރު ނިންމީ 3 އަހަރުންނެވެ. މިހާރު އަހަރެއް ދޮޅުއަހަރުން، ޒަމާނީ ބޮޑެތި ބަނދަރުތައް ނިންމާލައެވެ.
ނިމުނު 3އަހަރު އެމްޓީސީސީއާ ސަރުކާރުގެ 159މަޝްރޫޢުގެ މަސައްކަތް ހަވާލުކޮށްފައިވާއިރު މީގެތެރެއިން 65 މަޝްރޫޢުގެ ޢަމަލީ މަސައްކަތްވަނީ މުޅިން ނިންމާ، އާއްމުންނަށް ބޭނުންކުރަން ހުޅުވާލާފައެވެ. އަދި މިހާރު 62 މަޝްރޫޢެއްގެ ޢަމަލީ މަސައްކަތް ފަށައިގެން ކުރިއަށްގެންދާއިރު، 32 މަޝްރޫޢުގެ ސަރވޭގެ މަސައްކަތްތައް އަންނަނީ ކުރަމުންނެވެ.
އެމްޓީސީސީން މިވަގުތު ކުރިއަށްގެންދާ މަޝްރޫޢުތައް:
- ބަނދަރުހެދުން - 34 މަޝްރޫޢު
- ގޮނޑުދޮށް ޙިމާޔަތްކުރުން - 17 މަޝްރޫޢު
- ބިން ހިއްކުން - 13 މަޝްރޫޢު
- މަގުހެދުން - 8 މަޝްރޫޢު
- އެއަރޕޯޓް ތަރައްޤީކުރުން - 3 މަޝްރޫޢު
- ޕޯޓް ތަރައްޤީކުރުން - 2 މަޝްރޫޢު
- މިނޫންވެސް ބޮޑެތި ގިނަ މަޝްރޫޢުތައް ހިމެނެއެވެ. މަޝްރޫޢުތަކުގެ ޖުމްލަ 7.2 ބިލިއަން ރުފިޔާއަށް އަރައެވެ.
އެމްޓީސީސީން އަގުގެ ގޮތުން އެންމެ ގިނަ މަޝްރޫޢުތައް ކުރިއަށް ގެންދަނީ އައްޑޫ ސިޓީގައެވެ. އެގޮތުން މަގުހެދުމާއި، ބަނދަރާއި ޕޯޓް ތަރައްޤީކުރުމުގެ މަސައްކަތް ހިމެނޭހެން 12 މަޝްރޫޢުގެ މަސައްކަތް ހިމެނެއެވެ.
އެމްޓީސީސީން އެންމެ ބޮޑު އިސްކަމެއްދެނީ ރާއްޖޭގެ ރަށްތަކަށް ބޭނުންވާ ޒަމާނީ ބަދަލުތައްގެނައުމަށެވެ. އެ ކުންފުނިންދަނީ ކުންފުނީގެ މުވައްޒަފުންނާއި ވަސީލަތްތައްވެސް އިތުރުކުރަމުންނެވެ.
ކުންފުނި އިތުރަށް ފުޅާކުރުމަށް ބޭރުގެ ކުންފުނިތަކުގެ މަސައްކަތްވެސް، އެމީޓީސީންދަނީ ނަގަމުންނެވެ. އެގޮތުން ބޭރުގެ ކުންފުންޏެއްގެ 26މިލިއަން ޑޮލަރުގެ ބިން ހިއްކުމުގެ މަޝްރޫޢެއްވެސް އެ ކުންފުނިންވަނީ ދާދިފަހުން ނިންމާފައެވެ. އެއީ ރިސޯޓެއް ހެދުމަށް ތަރައްޤީކުރި އަރޓިފިޝަލް 3 ރަށް ހިއްކުމުގެ މަސައްކަތެވެ.
މިކަމުން ހާމަކޮށްދެނީ ކުންފުނި ފުޅާވެ ކުރިއަރަމުންދާ މިންވަރެވެ. އެމްޓީސީސީން ޢަމާޒު ހިފާފައިވަނީ، އެ ކުންފުންޏަކީ ބޭރު ޤައުމުތަކަށްގޮސް، ޕްރޮޖެކްޓްތައް ހިންގޭ ފެންވަރުގެ ކުންފުންޏަކަށް ހެދުމެވެ.