ހުޅުމާލެއާ ގުޅޭގޮތުން ސިޓީކައުންސިލުން ނިންމި ނިންމުމަށް ޢަމަލުކުރުން ފަސްކުރަން ޢަމުރުކޮށްފި
ހުޅުމާލެއަކީ މާލޭ ސިޓީ ކައުންސިލްގެ ބެލުމުގެދަށުގައިވާ ތަނެއްކަމަށް، އެކައުންސިލުން ނިމިނިންމުމަށް ޢަމަލުކުރުން ފަސްކުރުމުގެ ވަގުތީއަމުރެއް ސިވިލް ކޯޓުން ނެރެފިއެވެ.
ހުޅުމާލޭގެ ރަޖިސްޓްރީ ބާޠިލްކޮށް، އެއީ ސިޓީ ކައުންސިލްގެ ތަނެއްގެގޮތުގައި ނިންމާފައިވަނީ މިމަހުގެ 8ވަނަ ދުވަހުއެވެ. މިކަން އެޗްޑީސީއަށް އެންގީ މާލެ ސިޓީ ކައުންސިލުން އެޗްޑީސީއަށް ފޮނުވި ސިޓީއަކުންނެވެ.
ބިމުގެ ރަޖިސްޓަރީ ބާޠިލްކުރަން ނިންމި ނިންމުމަކީ ޤާނޫނާ ޚިލާފު ނިންމުމެއްކަމަށް ކަނޑައަޅުއްވައި އެނިންމުން ބާޠިލުކޮށްދެއްވުމަށް އެދި ސިވިލް ކޯޓަށާއި އެލް.ޖީ.އޭއަށް އެޗްޑީސީން މައްސަލަ ހުށައެޅީ މިމަހުގެ 9ވަނަ ދުވަހުއެވެ. އެޗްޑީސީން ސިވިލް ކޯޓުގައި އެދިފައިވަނީ ސިޓީކައުންސިލްގެ ނިންމުމަކީ ޤާނޫނާ ޚިލާފު ނިންމެވުމެއްކަން ކަނޑައަޅައިދިނުމަށާއި ޤާނޫނީ އިމުގެ ތެރެއިން ކަންކަން ކުރިއަށްގެންދިއުމަށް ސިޓީކައުންސިލަށް އަންގައިދިނުމަށެވެ.
މިކަމާ ގުޅިގެން ސިވިލް ކޯޓުން ނެރެފައިވާ ވަގުތީ އަމުރުގައި އަންގާފައިވަނީ ސިޓީ ކައުންސިލްގެ ނިންމުމަށް ޢަމަލުކުރަން ފަސްކުރުމަށެވެ. އަދި ސިޓީ ކައުންސިލްގެ ނިންމުން ތަންފީޒްކުރުމަށް ދަޢުލަތުގެ އެއްވެސް އިދާރާއަކުން އެއްވެސް މަސައްކަތެއް ނުކުރުމަށެވެ.
ހުޅުމާލޭގެ ބިމުގެ މިލްކުވެރި ފަރާތުގެ ހައިސިއްޔަތުން އެޗްޑީސީއަށް ލިބޭ އެންމެހާ ޤާނޫނީ ޙާއްޤުތަކާ، ބިމާގުޅިގެން ކުރަމުންއައި އެންމެހައި ކަންކަމާއި، ހުޅުމާލެ ތަރައްޤީކުރުމާ ބެލެހެއްޓުމުގެގޮތުން އެޗްޑީސީން ކުރަމުންއައި ކަންކަމަށް ހުރަސްއެޅޭފަދަ އެއްވެސް ކަމެއް އެއްވެސް ފަރާތަކުން ނުކުރުމަށްވެސްވަނީ އަންގާފައެވެ.
އަދި އެފަދަ ޢަމަލެއް ކުރަމުންދާނަމަ އެކަން ހުއްޓުވާދިނުމަށް ދަޢުލަތުގެ ކަމާބެހޭ އެންމެހާ އިދާރާތަކާ، މޯލްޑިވްސް ޕޮލިސް ސަރވިސްގެ މައްޗަށްވެސް ސިވިލްކޯޓުން އަމުރުކޮށްފައިވެއެވެ.