މެމްބަރު ޙުސައިން ވަޙީދަކީ، ރާއްޖެ ޑިމޮކްރަސީއަށް ކުރި ދަތުރުގެ އިޚްލާސްތެރި ބައިވެރިއެއް - ނަޝީދު
މެންބަރު ޙުސައިން ވަޙީދަކީ، ރާއްޖެ ޑިމޮކްރަސީއަށްކުރި ދަތުރުގައި މުހިންމު ދައުރެއް އަދާކުރެއްވި އިޚްލާސްތެރި ބައިވެރިއެއްކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ކޮމަންޑޫ ދާއިރާގެ މެންބަރު ޙުސައިން ވަހީދު އަވަހާރަވުމާ ގުޅިހެން ތައުޒިޔާ ވިދާޅުވެ ކުރެއްވި ޓުވީޓެއްގައި ރައީސް ނަޝީދު ވިދާޅުވީ، ޙުސައިން ވަޙީދަކީ، ދިވެހިރާއްޖޭގައި ގިނަ ޕާޓީ އެކުލެވޭ ޑިމޮކްރަސީއަށް އަނބުރާލުމުގައި ބޮޑު ދައުރެއް އަދާކުރެއްވި އިޚްލާސްތެރި ބައިވެރިއެކަމަށާއި، އޭނާއަކީ އެމްޑީޕީގެ ވަރުގަދަ ތަނބެއް ކަމަށެވެ.
MP Hussain Waheed akee Dhivehi Raajjeyga gina party ekulevey democracy ah anburaalumuga bodu dhaureh adhaa kurevvi ihlaastheri baiverieh. MDP ge varugadha than’beh. Maaiy Allah marhoom ah suvaruge minvaru kuravva, aailaa ah kehtherikan dhevvashi. Aameen pic.twitter.com/WXLQAZs86c
— Mohamed Nasheed (@MohamedNasheed) December 14, 2021
ޙުސައިން ވަޙީދު އަވަހާރަވުމާއި ގުޅިގެން އެމަނިކުފާނުގެ ޢާއިލާގެ ބޭފުޅުންނަށް ރައްޔިތުންގެ މަޖިލީހުގެ ރައީސް، މުޙައްމަދު ނަޝީދުއާއި މަޖިލީހުގެ ހުރިހާ މެންބަރުން ވަނީ އިޚްލާސްތެރިކަމާއެކު ތަޢުޒިޔާ ދަންނަވާފައެވެ.
މަޖިލީހުގެ ޢިދާރާއިން ނެރުއްވި ބަޔާނެއްގައި ވިދާޅުވީ، ޙުސައިން ވަޙީދުއަކީ 19 ވަނަ ރައްޔިތުންގެ މަޖިލީހުގެ ވަރަށް ގިނަ މުހިންމު މަސައްކަތްތަކެއްގައި އުޅުއްވި ބޭފުޅެއްކަމަށާއި، އެގޮތުން، މާލިއްޔަތު ކޮމިޓީއާއި، އިމްތިޔާޒް އާއި ސުލޫކް ކޮމިޓީއާއި، ބަޖެޓު ދިރާސާކުރާ ކޮމިޓީއާއި މާލިއްޔަތު ކޮމިޓީއާއި ލާމަރުކަޒީ ކޮމިޓީގެ ޖޮއިންޓް ކޮމިޓީގައި މަސައްކަތް ކުރެއްވިކަމަށެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ އެމް.ޑީ.ޕީ މެމްބަރު ޙުސައިން ވަޙީދު އަވަހާރަވުމުގެ ހިތާމައިގައި އޭނާ ނިސްބަތްވާ އެމްޑީޕީންވެސް ވަނީ ތަޢުޒަިޔާ ފޮނުވާފައެވެ.
17ވަނަ ރައްޔިތުންގެ މަޖިލީހާއި، ހިނގަމުންދާމިދާ 19ވަނަ ރައްޔިތުންގެ މަޖިލީހުގައި، ޙުސައިން ވަޙީދު ވަނީ ދާއިރާއަށާއި ދިވެހިރާއްޖޭގެ ރައްޔިތުންނަށް އިޚްލާޞްތެރި ޚިދުމަތްތަކެއް ކުރައްވާފައިކަން އެމްޑީޕީން ފާހަގަކޮށްފައެވެ.
އަދި އެމް.ޑީ.ޕީއަށާއި ޕާރޓީގެ ޑިމޮކްރެސީގެ ޙަޔާތަށް ވަރަށް ހިތްވަރުފުޅާއެކު ގިނަގުނަ މަސައްކަތްތަކެއް ކޮށްދެއްވާފައިވާފައިވާކަމަށާ، އެމަނިކުފާނު ވަކިވެދިއުމަކީ އެ ޕާރޓީއަށާއި ރާއްޖެއަށްވެސް ލިބިގެންދިއަ ނުހަނު ބޮޑު ގެއްލުމެއްކަމަށް އެމްޑީޕީން ބުނެފައިވެއެވެ.