މަސައްކަތް ކުރަންވީ އަދި އަމާޒަކަށް ވާންވީވެސް ޒުވާނުންނަކީ ޤައުމަށް ޚިދުމަތްކޮށްދޭނެ ބަޔަކަށް ހެދުމަށް ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ. ނައިބު ރައީސް މިހެން ވިދާޅުވީ ފުވައްމުލައް ސިޓިގެ ދޫޑިގަން އަވަށުގައި ތަރައްޤީކުރާ މިސްކިތުގެ ބިންގާ އެޅުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ދޫޑިގަން އަވަށުގައި ތަރައްޤީކުރާ މިސްކިތުގެ ބިންގާ އަޅުއްވާ ޢަމަލީ މަސައްކަތް ފެށުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައިސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވީ ބަނދަރުގައި އަޅަން ނިންމި މިސްކިތް 18 އަހަރަށްފަހު މަސައްކަތް ފެށިގެންދާއިރު މިހާރު މިސްކިތްވެފައިވަނީ ބަނދަރާއި، އެއަރޕޓްގެ މިސްކިތެއްގެ ގޮތުގައި ކަމަށެވެ. ނައިބު ރައީސްގެ ވާހަކަފުޅުގައިވަނީ އަޅުކަމާއިގެން މިސްކިތް ޒީނާތްތެރިކުރުމަށް ގޮވާލައްވާފައެވެ. މިމޭރުމުން އިތުރަށް ވާހަކަފުޅު ދައްކަވަމުން ނައިބު ރައީސް ވިދާޅުވީ ތަރައްޤީގެ އެކިއެކި މަޝްރޫޢުތައް ރާއްޖޭގައި ހިނގަމުން މިދާއިރުވެސް ވިސްނަންޖެހޭ ވަރަށް މުހިންމު ކަމެއްކަމެއް ކުރިމަތީގައިވާ ކަމަށެވެ. އެއީ ރާއްޖޭގެ ޒުވާން އާބާދީއަށް ކުރިމަތިވެފައިވާ އެންމެ ބޮޑު ވަބާ ކަމަށްވާ މަސްތުވާތަކެތީގެ މައްސަލަ ކަން ފާހަގަކުރައްވަމުން މިމައްސަލަ މިހާ ބޮޑުވެފައިވަނީ އެކަށީގެންވާ ގޮތުގައި ފަރުވާގެ ނިޒާމު ނުހިންގޭތީ ކަމަށް ނައިބު ރައީސް ވިދާޅުވިއެވެ.
ފުވައްމުލަކު ބަނދަރު ސަރަޙައްދުގައި މިސްކިތް އެޅުމާއި ގުޅޭގޮތުން ވާހަކަފުޅުދައްކަވަމުން ނައިބު ރައީސް ވިދާޅުވީ މިމިސްކިތަކީ މީގެ 18 އަހަރުކުރިން ފެށިގެން އެޅުމަށް ފުވައްމުލަކު ރައްޔިތުން އެދިއެދި ތިބި މިސްކިތެއްކަމަށެވެ. އަދި މިމިސްކިތް އިމާރާތްކުރެވުމުން މިސްކިތް ވެގެންދާނީ ފުވައްމުލަކު ބަނދަރަށް އަންނަ މީހުންނާއި އެއަރޕޯޓު ބޭނުންކުރާ މީހުންނަށް ޚާއްސަ މިސްކިތަކަށް ކަމަށްވެސް ނައިބު ރައީސް ވިދާޅުވިއެވެ.
މިސްކިތުގެ ބިންގާ އެޅުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް އިސްލާމިކް އެފެއާޒް ޑރ.އަޙްމަދު ޒާހިރު ޢަލީ ވިދާޅުވީ މިސްކިތަކީ ހަމައެކަނި ޢިމާރާތެއް އެޅުން ނޫންކަމަށާއި މިސްކިތްތަކަކީ އިސްލާމް ދީނުގައި ވަރަށް ބޮޑު އަހަންމިއްޔަތުކަމެއް ދީފައިވާ މުހިއްމު ބިނާތަކެއް ކަމަށެވެ. އެގޮތުން ކީރިތި ރަސޫލާ މިސްކިތް ބިނާކުރެއްވުމަށް އިސްކަން ދެއްވި މިންވަރު ބަޔާންކުރައްވާ އިސްލާމިކް މިނިސްޓަރ ވިދާޅުވީ ސަރުކާރުގެ އަމާޒަކީ މިސްކިތަކީ ހަމައެކަނި ރީތިކޮށް ޢިމާރާތެއްގެ ގޮތުގައި ބެހެއްޓުމާއެކު މިއީ އަޅުކަމުން ޒީނަތްތެރިވާ ތަނަކަށް ހެދުންކަމަށެވެ.
ފުވައްމުލަކު ދޫޑިގަން އަވަށުގައި ޢިމާރާތްކުރަން ހަމަޖެހިފައިވަނީ 500 މީހުންގެ ޖާގައިގެ މިސްކިތެކެވެ. މިއީ ދައުލަތުގެ ބަޖެޓުން 11.9 މިލިއަން ރުފިޔާ ޚަރަދުކޮށްގެން ބިނާ ކުރާ މިސްކިތެކެވެ. މިމަޝްރޫޢު މިދިޔަ ނޮވެމްބަރު މަހު އަމޭން ކޮންސްޓްރަކްޝަނާ ޙަވާލުކޮށްފައިވަނީ 1 އަހަރު ދުވަހުގެ ތެރޭގައި މަސައްކަތް ނިންމާ ގޮތަށެވެ. މިމަޝްރޫޢުގެ އިތުރުން ފުވައްމުލަކުގައި ކީރިތި ޤުރުއާނާ ބެހޭ މަރުކަޒުގެ 2 ފަންގިފިލާގެ ޢިމާރާތް ތަރައްޤީކުރުމުގެ މަސައްކަތް ފެށިގެންދާނެ ކަމަށް އިސްލާމިކް މިނިސްޓްރީން ވިދާޅުވެއެވެ.
ފުވައްމުލަކު މިސްކިތުގެ ބިންގާ އެޅުމުގެ ރަސްމިއްޔާތުގައި ހައުސިންގ މިނިސްޓަރ މުޙައްމަދު އަސްލަމް ބައިވެރިވެވަޑައިގެންނެވިއެވެ. އަދި ފުވައްމުލައް ސިޓީގެ ކައުންސިލްގެ އިސްވެރިންނާއި ސަރުކާރު މުވައްސަސާތަކުގެ އިސްވެރިންވެސްވަނީ ބައިވެރިވެފައެވެ.