ހިޔާ ފްލެޓުގައި އަޅުވާފައި ހުރި ފެން މީޓަރުތަކަކީ އިމާރާތްކުރި ކޮންޓްރެކްޓަރުން އެތަނުގައި އަޅުވާފައި ހުރި މީޓަރުތަކެއް ކަމަށާއި، އެއީ އެމް.ޑަބްލިޔު.އެސް.ސީން ބޭނުންކުރާ ކަހަލަ މީޓަރެއް ނޫން ކަމަށް މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިޔުއެސްސީގެ މެނޭޖިންގ ޑިރެކްޓަރ ހަސަން ޝާޙް ވިދާޅުވެއްޖެއެވެ. ޝާހް މިހެން ވިދާޅުވީ ހިޔާ ފްލެޓްތަކުގެ ފެންބިލްގެ މައްސަލައާ ގުޅޭގޮތުން ހިޔާ ފްލެޓް ސަރަހައްދުގައި ނޫސްވެރިންނަށް މަޢުލޫމާތުދެއްވަމުންނެވެ.
ހިޔާ ފުލެޓުތަކުގެ ފެން މީޓަރަށް މައްސަލަތަކެއް ކުރިމަތިވެ ފެންބިލްތައް ބޮޑުވުމުގެ ޝަކުވާ އެތަނުގައި ދިރިއުޅޭ ފަރާތްތަކުން އަންނަނީ ކުރަމުންނެވެ. އެމްޑަބްލިޔުއެސްސީގެ މެނޭޖިންގ ޑިރެކްޓަރ ހަސަން ޝާޙް ވިދާޅުވީ ނިމިދިޔަ އޮގަސްޓް މަހުން ފެށިގެން މިހިނގަމުންދާ ނޮވެމްބަރު މަހާއި ހަމައަށް ބިލްތައް ނަގަމުންދާ އިރު އެއްމަހަށް ވުރެ އަނެއް މަހު އަގުތައް މައްޗަށް ގޮސްފައިވާކަން ފާހަގަކުރެވިފައިވާކަމަށެވެ.
ޝާޙް ވިދާޅުވީ ހިޔާ ފްލެޓުގައި ކޮންޓްރެކްޓަރ އަޅުވާފައި ހުރީ އެމް.ޑަބްލިޔު.އެސް.ސީގެ މީޓަރުތަކަށް ނުވާތީ އެމް.ޑަބްލިޔު.އެސް.ސީގެ ސްޓޭންޑަރޑާ އެއްގޮތަށް ސައްހަ ރީޑިންގއެއް ނެގިދާނެކަމާމެދު ޔަގީންކަމެއް ނެތުމުން، މިގޮންޖެހުންތައް ހައްލުކުރުމަށް މަސައްކަތް ކުރެވުމުންދާ ކަމަށެވެ. އަދި ކޮންޓްރެކްޓަރު އަޅުވާފައި ހުރި ފޯލްޓީ މީޓަރުތަކުގައި ކޮމަން ސީރިއަލް ނަންބަރު ހުރުމުގެ ސަބަބުން، އެމް.ޑަބްލިޔު.އެސް.ސީ ގެ ޑޭޓާބޭސްއަށް އެޅުމުގައިވެސް ދަތިތަކެއް ދިމާވާކަމަށާއި މިގޮތަށް ހުރި އެތައް މައްސަލައެއް ހައްލު ކުރުމަށް މަސައްކަތްތަކެއް ކުރުމަށް ފަހު، 3500 އާއި 4000 މީޓަރާ ދޭތެރޭގެ އަދަދަކަށް ސައްހަ މީޓަރު ހުރިކަން ފާހަގަ ކުރެވިފައިވާ ކަމަށް ޝާހް ވިދާޅުވިއެވެ. އަދި މިސައްހަ މީޓަރުތަކަށް ފެން ބިލް ހެދުމަށް އެކުންފުނިން ތައްޔާރުވެފައިވާ ކަމަށްވެސް އޭނާ ވިދާޅުވިއެވެ. އަދި ބިލް ކުރެވިގެންދާ މީޓަރުގެ ވެރިންނަށް ފެން ބިލް ލިބުމާއެކު، އެމްޑަބްލިޔުއެސްސީގެ ލީނިއަންސީ ޕޮލިސީގެ ދަށުން މަސް މަހަށް ބަހާލައިގެންވެސް ބިލް ދެއްކޭނެ އިންތިޒާމު ހަމަޖެހޭނެކަމަށް އެމް.ޑީ ވިދާޅުވިއެވެ. އަދި ކަސްޓަމަރާއެކު ވެފައިވާ އެއްބަސްވުމާ އެއްގޮތަށް ފައިސާ ދައްކަމުންދާނަމަ، ބިލް ނުދެއްކުމުން އަރާ ސާރޗާޖުތައްވެސް މަޢާފުވެގެންދާނެކަމަށްވެސް ވިދާޅުވިއެވެ.
ބިލް ކުރެވޭ މީޓަރުތަކުގެ އިތުރުން ބާކީ ހުރި ފޯލްޓީ މީޓަރުތަކާއި ހޮޅިލައިންގެ މައްސަލަތަކާ ގުޅޭ ގޮތުން އެޗް.ޑީ.ސީން ލަފާ ދީފައިވަނީ ކޮންޓްރެކްޓަރާ ގުޅުމަށްކަމަށާއި، ކޮންޓްރެކްޓަރުގެ އެއްބާރުލުން ނުލިބުނު ނަމަވެސް އެމް.ޑަބްލިޔު.އެސް.ސީގެ ޚަރަދުގައި ނަމަވެސް، ހިޔާ ފްލެޓްތަކުގެ އުޅޭ ފަރާތްތަކަށް ހައްލެއް ހޯދައިދޭން ބޭނުންވާ ކަމަށްވެސް އެމްޑަބްލިޔުއެސްސީގެ މެނޭޖިންގ ޑިރެކްޓަރ ވިދާޅުވިއެވެ. އެގޮތުން ފޯލްޓީ މީޓަރުގެ މައްސަލަތައް ހައްލު ނުކުރެވޭނަމަ، އައު މީޓަރ އެޅުވުމުގެ މަސައްކަތްތައް އެމް.ޑަބްލިޔު.އެސް.ސީގެ ޚަރަދުގައި ކުރިއަށް ގެންދާނެކަން އެމް.ޑަބްލިޔު.އެސްސީން އެޗް.ޑީ.ސީއަށް މިހާރު އަންގާފައިވާ ކަމަށްވެސް އޭނާ ވިދާޅުވިއެވެ.
ފެނުގެ ކަނެކްޝަންތަކުގެ މައްސަލަތަކާ ބެހޭ ގޮތުން އިތުރަށް ވާހަކަ ދައްކަވަމުން، އެމް.ޑީ ޝާހް ވިދާޅުވީ ފެނުގެ މައި ނެޓްވޯރކުން ފެށިގެން ފެން މީޓަރތަކާ ހަމައަށް އަޅާފައި އޮތީ، އެމް.ޑަބްލިޔު.އެސް.ސީން ބޭނުންކުރާ ކަހަލަ ހޮޅިއެއް ނުވާތީ އެހޮޅިއަށް ގެއްލުމެއް ލިބިއްޖެނަމަ، މަރާމާތު ކުރާނެ ޓޫލްސްވެސް އެމް.ޑަބްލިޔު.އެސް.ސީ ގައި ނެތުމުން، އެކަމަށް ހައްލު ހޯދުމުގެ މަސައްކަތްވެސް އެމް.ޑަބްލިޔު.އެސް.ސީން ކުރަން ޖެހިފައިވާކަމަށެވެ.
ހިޔާ ފުލެޓުތަކަށް ރައްކާތެރި ބޯފެން ފޯރުކޮށްދިނުމަށްޓަކައި، ފެން ތާންގީގައި، ވަކި ވަކި އެޕާޓްމަންޓްތަކަށް ފެން ފޯރުކޮށްދެމުންދާ ކަމަށްވެސް އެ ކުންފުނިން ވަނީ ހާމަކުރައްވާފައެވެ. މީގެ އިތުރުން ފޯރު ކޮށްދެވޭ ފެނުގެ މިންވަރު ބެލުމަށްޓަކައި ބަލްކް މީޓަރުތައް ވަނީ އެ ސަރަހައްދުގައި ބަހައްޓާފައެވެ.
މުކޮސް
އަޅެފަހެ ފެން ގުޅައިދިންއިރު ތި ސައްޙަ މީޓަރުތޯ ނުބެއްލެވީ ކިހިނެއް ވެގެގެންތޯ ސުވާލު އެބަ އުފެފޭ