ކ.މާފުށި ޕިކްނިކް އައިލެންޑްގެ ބިން ހިއްކުމުގެ މަސައްކަތް ފެށުމަށް ތައްޔާރުވެއްޖެއެވެ.
މި މަސައްކަތް ކުރިއަށްގެންދަނީ މޯލްޑީވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީންނެވެ.
ކ.މާފުށީ ޕިކްނިކް އައިލެންޑަކީ ރައްޔިތުން ދަތުރުގޮސްލާ، ހިތްހަމަޖެހޭ މާޙައުލެއް ހޯދައިދިނުމަށް ސަރުކާރުން ކުރިއަށްގެންދާ މަޝްރޫޢުއެކެވެ. އަރޓިފިޝަލް ރަށެއްގެ ގޮތުގައި ހަދާ ކ.މާފުށީ ޕިކްނިކް އައިލެންޑަކީ ރަށް ކައިރި ފަޅުތެރެއިން 2 ހެލްޓަރުގެ ބިން ހިއްކައިގެން ތަރައްޤީކުރާ ރަށެކެވެ.
މާފުށީ ޕިކްނިކް އައިލެންޑްގެ ބިން ހިއްކުމާ ގޮނޑުދޮށް ޙިމާޔަތްކުރުމުގެ މަޝްރޫޢުގެ ޢަމަލީ މަސައްކަތް ފެށުމަށް ބޭނުންވާ ސާމާނު މިހާރު ވަނީ ސައިޓަށް ގެންގޮސް، އެކަމުގެ ޢަމަލީ މަސައްކަތް ފެށުމަށް ތައްޔާރުވެފައެވެ. ޕްލޭނިންގ މިނިސްޓްރީން މިކަމުގެ ޢަމަލީ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީއާއެވެ.
އެމްޓީސީސީން ބުނީ 10.8 މިލިއަން ރުފިޔާގެ މިމަޝްރޫޢުގެ ދަށުން އެ ރަށް ތަރައްޤީކުރަނީ ވީހާވެސް ގުދުރަތީ ގޮތްތައް ސިފަވާގޮތަށްކަމަށެވެ.
ކ.މާފުށީގެ ބިން ހިއްކުމުގެ މަޝްރޫޢުގެ ޢަމަލީ މަސައްކަތްވެސް އެމްޓީސީސީއާ ހަވާލުކޮށް، އެ މަސައްކަތް މިދިޔަމަހުތެރޭގައި ވަނީ މުޅިން ނިންމާފައެވެ. މި މަޝްރޫޢުގައި އެރަށު ފަޅުން 25 ހެކްޓަރުގެ ބިން ވަނީ ހިއްކާފައެވެ. އަދި 1100 ހެކްޓަރުގެ ސަރަޙައްދު ވަނީ ޙިމާޔަތްކޮށްފައެވެ. މި ޕްރޮޖެކްޓް ކުރިއަށްގެންދިޔައީ، ހިއްކި ސަރަޙައްދު މާފުއްޓާ ކޯސްވޭއަކުން ގުޅާލާގޮތަށެވެ.
ޕިކްނިކް އައިލެންޑް ތަރައްޤީކުރުމުގެ 3 މަޝްރޫޢުއެއް ސަރުކާރުން އަންނަނީ ކުރިއަށްގެންދަމުންނެވެ. އޭގެތެރެއިން ކ.ގުރައިދޫ ޕިކްނިކް އައިލެންޑްގެ މަސައްކަތް ވަނީ ނިމިފައެވެ. މީގެއިތުރުން މާލޭ ސަރަޙައްދަށް ޚާއްސަކޮށްގެން ތަރައްޤީކުރާ ޕިކްނިކް އައިލެންޑް، ކ.ކުޑަގިރީގެ ޢަމަލީ މަސައްކަތް ވަނީ ފަށާފައެވެ. މިކަމުގެ ޢަމަލީ މަސައްކަތް ފެށީ މިމަހުގެ 6 ވަނަ ދުވަހުއެވެ.
ޕިކްނިކް އައިލެންޑް ތަރައްޤީކުރުމުގެ 3 މަޝްރޫޢުގެ މަސައްކަތްވެސް ހަވާލުކޮށް ކުރިއަށް ގެންދަނީ އެމްޓީސީސީންނެވެ.