ހދ.ކުމުންދޫ ބަނދަރު ޒަމާނީ ފެންވަރަށް ތަރައްޤީކުރުމުގެ މަސައްކަތް އެމްޓީސީސީއާ ޙަވާލުކޮށްފިއެވެ.
މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ހދ.ކުމުންދޫ ބަނދަރު ތަރައްޤީ ކުރުމަށް އެމްޓީސީސީއާ ޙަވާލުކޮށްފައިވަނީ 7 މަސްދުވަހުގެ ތެރޭގައި މަސައްކަތް ނިންމުމަށެވެ. މިމަޝްރޫޢުގެ ދަށުން ކުމުންދޫގައި 14301 ކިއުބިކް މީޓަރުގެ ސަރަޙައްދެއްގައި ބަނދަރު ފުންކޮށް، 242 މީޓަރުގެ ސަރަޙައްދެއްގައި ބޭރުތޮށިލައި 198 މީޓަރުގެ ސަރަޙައްދެއްގައި ރިވެޓްމަންޓް ޖެހުމަށްވަނީ ހަމަޖެހިފައެވެ.
މިމަޝްރޫޢު އެމްޓީސީސީއާއި ޙަވާލުކުރުމުގެ ރަސްމިއްޔާތުގެ އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ ޒީނިޔާ ޙަމީދެވެ. އެމްޓީސީސީގެ ފަރާތުން ސޮއިކުރެއްވީ އެކުންފުނީގެ ސީއޯއޯ ޝާހިދު ހުސެއިން މޫސާއެވެ.
ކުމުންދޫ ބަނދަރު ތަރައްޤީ ކުރުމުގެ މަޝްރޫއަކީ ދައުލަތުގެ ބަޖެޓުން 35.68 މިލިއަން ރުފިޔާ ޚަރަދުކޮށްގެން ކުރިއަށް ގެންދާ މަޝްރޫޢެކެވެ.
ދެހާހަށްވުރެ ބޮޑު އާބާދީއެއް ދިރިއުޅެމުން އަންނަ ހދ.ކުމުންދޫގައި ތަރައްޤީގެ އިތުރު މަޝްރޫޢުތަކެއް އަންނަނީ ހިންގަމުންނެވެ. އެގޮތުން ރަށުގައި ފެނާއި ނަރުދަމާ ޤާއިމުކުރުމުގެ މަސައްކަތް އަންނަނީ ކުރަމުންނެވެ. އަދި އެރަށު ސްކޫލްގެ އާޢިމާރާތުގެ މަސައްކަތް އޮތީ ޕްރީ ޓެންޑަރިންގ މަރުޙަލާގައެވެ. ކުމުންދޫއަށް ދާދިފަހުން ކުރެއްވި ރަސްމީ ދަތުރުފުޅެއްގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުވަނީ އެރަށުގައި ޕޮލިސް ޕޯސްޓެއް ޤާއިމުކުރައްވާނެކަމަށް ވިދާޅުވެފައެވެ.
ސަރުކާރުގެންދަވަނީ ރަށުގެ އާބާދީއަށް ބެލުމެއްނެތި ރާއްޖޭގެ ހުރިހާ ރަށެއްގައިވެސް ޒަމާނީ ތަރައްޤީއާއި ވަޞީލަތްތައް ޤާއިމުކުރުމުގެ މަސައްކަތް ކުރައްވަމުންނެވެ.