އެމްޑީޕީގެ ޤައުމީ މަޖިލީހުގެ އިންތިޚާބު 27 ނޮވެމްބަރުގައި

ދިވެހި ރައްޔިތުންގެ ޑިމޮކްރެޓިކް ޕާޓީ، އެމްޑީޕީއިން އެޕާޓީގެ ޤައުމީ މަޖިލީހުގެ އިންތިޚާބު 27 ނޮވެމްބަރުގައި ބާއްވާ ގޮތަށް ނިންމައިފިއެވެ.

އެކަން އިޢުލާންކުރީ މިރޭ އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދެވެ. ޤައުމީ މަޖިލީހުގެ އިންތިޚާބު ބާއްވާނެ ތާރީޚު އިޢުލާންކުރެއްވިނަމަވެސް އެކަމުގެ އިތުރު ތަފްސީލެއް އެ މަނިކުފާނު ހާމައެއް ނުކުރައްވައެވެ. އެމްޑީޕީގެ އެންމެ މުހިންމު ނިންމުންތައް ނިންމާ، ސިޔާސަތުތައް ކަނޑައަޅާ އަދި ކޮންގްރެސްގެ ދެމެދުގައި ޕާޓީ ހިންގުމާ ހަވާލުވެ ހުންނަ މައިގަނޑު މަޖިލީހަކީ ޤައުމީ މަޖިލީހެވެ. މިއީ، އެ ޕާޓީގެ ދާއިރާތަކުގެ އާއްމު މެމްބަރުންގެ ވޯޓާއެކު ހޮވާ މަންދޫބުން ހިމެނޭ މަޖިލީހެކެވެ.

ތިން ދުވަހުގެ މުއްދަތަކަށް ކުރިއަށްދިޔަ އެމްޑީޕީގެ 5ވަނަ ކޮންގްރެސް ބާއްވާފައިވަނީ އޮކްޓޯބަރ 1-3 އަށެވެ. މިރޭ އެ ކޮންގްރެސް ނިންމާލީ، އަސާސީ ޤަވާއިދަށް ބޮޑެތި އިސްލާޙުތަކެއް ގެނައުމަށްފަހުއެވެ.

މިއަދު ހަވީރު ބޭއްވި ސެޝަންގައި އެޕާޓީގެ އަސާސީ ޤަވާއިދަށް ހުށަހެޅި އިސްލާހުތަކަށް ވޯޓަށް އަހާފައިވެއެވެ. އަދި އަސާސީ ޤަވާއިދަށް އިސްލާހު ގެނެސްފައިވަނީ، 500އަށްވުރެ ގިނަ މެމްބަރުންގެ ވޯޓާއެކުގައެވެ.

އެމްޑީޕީގެ އަސާސީ ޤަވާއިދަށް ގެނައި މުހިންމު އިސްލާޙުތަކުގެ ތެރޭގައި ޕާޓީގެ ރައީސްގެ މަޤާމު އުވާލައި، ޗެއާޕަސަންއަކީ އެންމެ އިސް މަޤާމަށް ހެދުން ހިމެނެއެވެ. އަދި ޕާޓީގެ ނައިބު ރައީސުންގެ އަދަދު ތިނަކަށް އިތުރު ކުރުމާއި، އޭގެ ތެރެއިން އެކަކީ އަންހެން މެންބަރަކަށް ހެދުމަށް އަސާސީ ޤަވާއިދަށް އިސްލާޙު ގެނެސްފައިވެއެވެ.

އެ ކޮންގްރެސްއަށް ޕާޓީގެ ސިޔާސަތުތަކާއި ގުޅުންހުރި ޤަރާރެއް ހުށަހަޅާ ފާސްކޮށްފައިވެއެވެ. އަދި އެ ކޮންގްރެސްގެ ހަވާސާގައި، ކައުންސިލުތަކަށް ޚާއްސަ ކޮށްގެން އިންވެސްޓްމެންޓް ފޯރަމެއް ބާއްވާފައިވެއެވެ.