އެމްޕީއެލްގެ ފްލެޓު އަންނަ އަހަރުގެ ތެރޭގައި މުވައްޒަފުންނާ ޙަވާލުކުރަން ފަށާނެކަމަށް އެކުންފުނީގެ ސީއީއޯ ޝާހިދު ޢަލީ ވިދާޅުވެއްޖެއެވެ. ޝާހިދު މިހެން ވިދާޅުވީ އެމްޕީއެލްގެ 35ވަނަ އަހަރީ ދުވަހާއި ގުޅިގެން ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ހިޔާ ބޯހިޔާވަހިކަމުގެ މަޝްރޫޢުގެ ދަށުން ކުންފުނިތަކުގެ ކެޓަގަރީގައި މޯލްޑިވްސް ޕޯޓްސް ލިމިޓެޑުންވެސްވަނީ ބައިވެރިވެފައެވެ. އެގޮތުން އެކުންފުނީގެ ޓަވަރުތަކުގެ މަސައްކަތް ފަށާފައިވަނީ 2018 ވަނަ އަހަރުގައެވެ. 14 ފަންގިފިލާގެ 3 ޓަވަރު ތަރައްޤީކުރުމުގެ މަސައްކަތް އެކުންފުނިންވަނީ ކުރިއަށް ގެންދެއެވެ. މި ފްލެޓުތަކާ ގުޅޭގޮތުން ވާހަކަދައްކަވަމުން އެމްޕީއެލްގެ ސީއީއޯ ޝާހިދު ޢަލީ ވިދާޅުވީ ފްލެޓުތަކުގެ މަސައްކަތް ލަސްވެފައިވަނީ ކޯވިޑްގެ ސަބަބުން ދިމާވި އެކި ދަތިތަކާ ހެދިކަމަށެވެ. އެހެންނަމަވެސް މިހާރު މަސައްކަތް ފެށިގެން ކުރިއަށްދާއިރު އުއްމީދުކުރަނީ އަންނަ އަހަރުގެ ކުރީކޮޅު ފްލެޓުތަކުގެ މަސައްކަތް މުޅިން ނިމޭވަރުވާނެކަމަށް ކަމުގައި ޝާހިދު ވިދާޅުވެއެވެ.
"އެމްޕީއެލްގެ އެންމެ ބޮޑު އިންވެސްޓްމަންޓް ކަމަށްވާ ހިޔާ މަޝްރޫޢުގެ ފްލެޓުގެ މަސައްކަތް ކުރިއަށް އެބަދޭ. ކޯވިޑާއެކު ލަސްތަކެއް ވީނަމަވެސް އުއްމީދުކުރަނީ ފްލެޓުތަކުގެ މަސައްކަތް އަންނަ އަހަރުގެ ކުރީކޮޅު ނިމި ފްލެޓު މުވައްޒަފުންނާ ޙަވާލުކުރެވޭނެކަމަށް." ޝާހިދު ވިދާޅުވިއެވެ.
ހިޔާ މަޝްރޫޢުގެ ދަށުން އެމްޕީޢެލްއިން ތަރައްޤީކުރާ 14 ފަންގިފިލާގެ 3 ޓަވަރުގައި ހިމެނެނީ 3 ކޮޓަރީގެ އެޕާޓްމަންޓްތަކާއި 1 ކޮޓަރީގެ އެޕާޓްމަންޓްތަކެވެ.