2004ވަނަ އަހަރުގެ ސުނާމީ ކާރިޘާގައި ރާއްޖޭގެ ބައެއް ރަށްރަށަށް ބޮޑެތި ގެއްލުންތަކެއްވިއެވެ. ސުނާމީގެ ބިޔަ ރާޅާއެކު ވެލިގަނޑު ދަމައިގަނެ ރަށްރަށަށް އަރައި ފޭބުމަށް ބޭނުންކުރި ފާލަންތަކާއި ބަނދަރުތަކަށް ބޮޑެތި ގެއްލުންތަކެއްވިއެވެ.
މީގެތެރެއިން އެންމެބޮޑު ގެއްލުމަކާ ކުރިމަތިވި އެއް ރަށަކީ ށ.މަރޮއްޓެވެ. މަރޮށީގެ އާބާދީ 1000އާ ގާތްކުރެއެވެ. ލަފާފުރުމުގެ ނިޒާމު ރަނގަޅުކުރުމަށް އެރަށުގަ ހަދާފަވާ ބަނދަރަކީ އޭރުގެ ސަރުކާރުގެ އެހީއާއެކު، ރަށުގެ ރައްޔިތުންގެ މަސައްކަތުން ބޮޑުގަލުން ހަދާފައިވާ ބަނދަރެކެވެ. 1990ގައި ހަދާފަވާ އެބަނދަރަށް 2004ވަނަ އަހަރުގެ ސުނާމީގައި ބޮޑެތި ގެއްލުންތަކެއްވިއެވެ. ބަނދަރުގެ ބޮޑު ބައެއް ހަލާކުވެ ބަނދަރުގެ ރައްކާތެރިކަންވަނީ ކުޑައެވެފައެވެ. އަދި ބަނދަރުގެ ބައެއް ސަރަޙައްދުތައް ބޭނުންކުރަން ދަތިވެ ޖާގައިގެ ދަތިކަންވެސް އޮތީ ކުރިމަތިވެފައެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން މަރޮށީ ކައުންސިލްގެ ރައީސް ޢަލީ މުޙައްމަދު ވިދާޅުވީ ސުނާމީއަށްފަހު ބަނދަރަށް ލިބުނު ގެއްލުންތަކަށް ފޫބެއްދުމަށް މިހާތަނަށްވެސް އެއްވެސް މަރާމާތެއް ކުރެވިފަ ނެތްކަމަށެވެ. މި މަސައްކަތް އެކި އަހަރުތަކުގަ ބަޖެޓުގަ ހިމެނިނަމަވެސް، މިހާތަނަށް ޢަމަލީ ސިފައެއް ގެނެވިފައެއް ނެތެވެ.
"ސުނާމީގައި ބަނދަރު ހަލާކުވެފައި އޮތް ގޮތަށް މި އޮތީ. ބަނދަރު ތޮށިން ބައެއް ވެއްޓި ހަލާކުވެފައި އޮތީ. އެހެންވެ އެތަންތާ އޮޑިފަހަރު އަޅާފައި ބާއްވަން އޮޑިވެރިން ޖެހިލުންވޭ، ތޮށިން ބައެއް ވެއްޓި އުޅަނދަށް ގެއްލުންވެދާނެތީ." މަރޮށީ ކައުންސިލްގެ ރައީސް ވިދާޅުވިއެވެ.
މަރޮއްޓަކީ ކުދިކުދި ޑިންގީފަދަ އުޅަނދުތައް ގިނަ ރަށެކެވެ. އަލީ މުޙައްމަދު ވިދާޅުވީ 20-25އަކަށް ޑިންގީ ރަށުގައި ބޭނުންކުރާކަމަށެވެ. މީގެ ތެރޭގަ ސައިޒުން ބޮޑެތި ޑިންގީތަށް ގިނަވުމުގެ ސަބަބުން ބަނދަރުގައި ޖާގައިގެ ދަތިކަންވެސް ބޮޑެވެ. މަރޮށީ ބަނދަރަކީ އެކި މަސައްކަތްތަކާ ގުޅިގެން އޮޑި ދޯނިފަހަރު މަޑުކޮށްލުމަށްވެސް ބޭނުންކުރާ ބަނދަރެކެވެ. މަރޮށީގައި މިހާރު ބޭނުންކުރަމުންދާ ބަނދަރަކީ 600ފޫޓު ދިގު 250ފޫޓު ފުޅާ ބަނދަރެކެވެ.
އެރަށު ބަނދަރު އަލުން މަރާމާތުކޮށް ޖާގަ އިތުރުކުރުމަށް ސަރުކާރުން މިހާރު މިވަނީ ކުންފުންޏަކާ ހަވާލުކޮށްފައެވެ. ބަނދަރުގެ މަސައްކަތް ކުރިއަށްގެންދިއުމަށް ހަވާލުކޮށްފަވަނީ ހެވީ ފޯސް ޕްރައިވެޓް ލިމިޓެޑާއެވެ. ބަނދަރު މަރާމާތުކުރާއިރު އެއްގަމު ތޮށި 1300ފޫޓަށް ބޮޑުކުރުމަށްވަނީ ނިންމާގައެވެ.
މަރޮށީ ބަނދަރު ތަރައްޤީކުރާނީ ޒަމާނީ ބަނދަރެއްގެ ގޮތުގައެވެ. ބަނދަރުގެ ބޭރު ތޮށި ހަދަނީ މެދަށް ވެލިއަޅައި ހިތްހަމަޖައްސާލަން ތިބެވޭނެ ތަނެއްގެ ގޮތުގައި ބޭނުން ކުރެވޭގޮތަށެވެ. މިއީ 490މީޓަރުގެ ސޭންޑް-ފިލް ބްރޭކް ވޯޓަރއެކެވެ. އަދި އެއްގަމުތޮށިން ބޭރު ތޮއްޓަށް އެރުމަށް ބްރިޖެއްވެސް އަޅާނެއެވެ. މީގެއިތުރަށް ބާޖާ ކޮޅުވެއްޓިފަދަ އުޅަނދުތައް ކައިރިކުރުމަށް ރޭމްޕް ހެދުމާއި ޕޭމަންޓް ހެދުމާ އަދި ބަނދަރު ބައްތި ޖެހުމުގެ މަސައްކަތް ހިމެނެއެވެ.
މި މަސައްކަތް ހަވާލުކޮށްފަވަނީ 1 އަހަރާއި 2 މަސްދުވަހުން ނިންމާގޮތަށެވެ. މިއީ ސަރުކާރުން 43 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢުއެކެވެ.