ޖިންސީ ގޯނާގެ ދަޢުވާ އުފުލާފައިވާ ކުރީގެ ޓޫރިޒަމް މިނިސްޓަރު ޢަލީ ވަހީދުގެ ޕާސްޕޯޓް ހިފަހައްޓަން ދައުލަތުން ހުށައެޅީ، އޭނާ ވަޒީރުކަމުގައި ހުންނެވިއިރު ދޫކޮށްފައި އޮތް ޑިޕްލޮމެޓިކް ޕާސްޕޯޓް ކަމަށްވާތީ، އެއަމުރު ނުނެރެދޭން ހައިކޯޓުން ނިންމައިފިއެވެ.
ޖިންސީ ގޯނާގެ ދަޢުވާ އުފުލާފައިވަނިކޮށް ޢަލީ ވަހީދު ވަނީ ރާއްޖެ ދޫކުރައްވައި އިނގިރޭސިވިލާތަށް ވަޑައިގެންފައެވެ. އަދި އެނބުރި ރާއްޖެ ވަޑައިގެންފައިނުވާތީ ދައުލަތުން ވަނީ އޭނާގެ ޕާސްޕޯޓް ހިފަހައްޓަން ކުރިމިނަލް ކޯޓުގެ ޢަމުރަކަށް އެދިފައެވެ. ނަމަވެސް ކްރިމިނަލް ކޯޓުން ނިންމެވީ އެ ޢަމުރު ނެރެނުދިނުމަށެވެ. އަދި އެ މައްސަލަ ދައުލަތުން ވަނީ ހައިކޯޓްގައި އިސްތިއުނާފްކޮށްފައެވެ.
މި މައްސަލާގައި ހައިކޯޓުން ކުރި ޙުކުމުގައި ވަނީ، ޢަލީ ވަޙީދުގެ ޕާސްޕޯޓް ހިފަހައްޓަން ފުލުހުން ހުށައަޅަފައިވަނީ އޭނާ ވަޒީރަކަށް ހުންނެވިއިރު ދޫކޮށް އަދި ވަޒީރުކަމުން ދުރުކުރުމުން ބާޠިލްކޮށްފައިވާ ޕާސްޕޯޓެއްކަމަށެވެ. ޢަލީ ވަހީދު ރާއްޖެއިން ބޭރަށް ވަޑައިގަތީ އަމިއްލަ ޕާސްޕޯޓެއް ނުވަތަ އޯޑިނަރީ ޕާސްޕޯޓެއްގައިކަމަށާ، އެހެންކަމުން ބާޠިލްކޮށްފައިވާ ޕާސްޕޯޓެއް ހިފަހެއްޓުމަށް ނެރެދެވޭނެ އަމުރެއް ނެތްކަމަށް މި މައްސަލަ ބެއްލެވި ތިން ފަނޑިޔާރުންގެ ތެރެއިން ދެ ފަނޑިޔާރުންގެ ރަޢުޔުގައިވެއެވެ. އެ ފަނޑިޔާރުންގެ ޙުކުމުގައި ބާޠިލްކޮށްފައިވާ ޕާސްޕޯޓެއް ހިފެހެއްޓުމަށް އެދުނު އެދުމަކީ "ކަމަކަށް ކަމެއްކުރުން"ކަމަށް ވަނީ ސިފަކުރައްވާފައެވެ.
މިކަމުގައި ދައުލަތުން އެކަށީގެންވާގޮތެއްގައި ޒިންމާ އަދާކޮށްފައިނުވާކަމަށްވެސް މި މައްސަލާގައި ހައިކޯޓުންކޮށްފައިވާ ޙުކުމުގައިވެއެވެ. އަދި މިއީ ކޯޓުގެ މަސައްކަތަށް ހުރެސްއެޅޭ ކަމެއްކަމަށްވެސް ހައިކޯޓްގެ ޙުކުމުގައިވެއެވެ.
މީގެ އިތުރުން ޢަލީ ވަޙިދާއި ދެކޮޅަށް ދައުލަތުން އެކަށީގެންވާ ހެކި ހުށައަޅަފައިވާކަމަށާއި، އޭނާ ކުރިން އަދާކޮށްފައިވާ މަޤާމުތަކަށްބަލާއިރު ޝަރީއަތާއި ކުރިމަތިނުލައްވަން މަސައްކަތްކުރުމުގެ ފުރުޞަތު ބޮޑުކަމަށްވެސް ހުކުމުގައިވެއެވެ. އަދި އޭނާ އެނބުރި ރާއްޖެ ވަޑައިނުގަތުމުގެ ފުރުޞަތުވެސް ބޮޑުކަމަށް ޙުކުމުގައިވެއެވެ.
ހައިކޯޓްގެ ޙުކުމުގައި ރާއްޖެއިން ފުރައިގެން ބޭރަށް ދިއުމަށްފަހު ޝަރީއަތަށް ފިލައިގެން އުޅޭ މީހުންގެ ޕާސްޕޯޓާ މެދު ޤާނޫނީ ގޮތުން އެޅޭނެ އެހެން ފިޔަވަޅުތައް އެބަހުރިކަމަށާއި، އެހެންކަމުން ޕްރޮސިކިއުޝަނުން މިހާރު އެދިފައިވާ ގޮތަށް ޢަލީ ވަޙީދުގެ ޕާސްޕޯޓް ހިފެހެއްޓުމުގެ މައްސަލަ ކުރިއަށް ގެންދެވޭނެ ތަނެއް ނެތުމުން ކްރިމިނަލް ކޯޓުގެ ނިންމުން ބަދަލު ކުރަންޖެހޭ ތަނެއް ނެތްކަމަށްވެސް ހައިކޯޓްގެ ހުކުމުގައިވެއެވެ.
ޢަލީ ވަހިދުގެ މިމައްސަލަ ބެއްލެވި ފަނޑިޔާރުގެ ބެންޗުގައި އިންނެވީ ފަނޑިޔާރު ޢަބްދުﷲ ހަމީދާއު، ފަނޑިޔާރު މުޙައްމަދު ނިޔާޒް، އަދި ފަނޑިޔާރު ޢަލީ ސަމީރެވެ. މިމައްސަލާގައި ރަޢުޔު ތަފާތުވީ ފަނޑިޔާރު ޢަލީ ސަމީރުގެއެވެ.
ފަނޑިޔާރު ޢަލީ ސަމީރުގެ ރައުޔުގައިވަނީ، ޢަލީ ވަޙީދުގެ ޕާސްޕޯޓާއި ޓްރެވެލް ޑޮކިއުމަންޓް ހިފެހެއްޓުމުގެ ޢަމުރެއް ނެރެދިނުމުގެ ޖާގަ އޮތްކަމަށެވެ. އެފަދަ ޢަމުރެއް ކޯޓުން ނެރެންޖެހޭކަމަށްވެސް ފަނޑިޔާރު ސަމީރުގެ ރައުޔުގައިވެއެވެ.
ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތުގައި އަލީ ވަހީދުގެ މައްޗަށް 7 ދައުވާއެއް ވަނީ އުފުލާފައެވެ. އަދި އެމައްސަލަތަކުގެ އަޑުއެހުންތައްވެސް ވަނީ ފަށާފައެވެ.