ހއ. ތަކަންދޫގެ އާބާދީ ހާހަކާ ގާތްކުރި ނަމަވެސް ރަށުގަ ދިރިއުޅެމުންދާ އާބާދީ ކުޑައެވެ. ކައުންސިލުން ބުނާގޮތުގައި ރަށުގައި މިވަގުތު ދިރިއުޅޭ އާބާދީއަކީ ގާތްގަނޑަކަށް 300އެވެ.
ކުދި އާބާދީތައް ހިމެނޭ ރަށްތަކަކީވެސް، ރަށަށް ބޭނުންވާ އަސާސީ ޚިދުމަތްތައް ޤާއިމުވެފައިވާ ރަށްތަކަކަށް ހެދުމަށް ސަރުކާރުންވަނީ މުހިންމު މަސައްކަތްތަކެއް ފަށާފައެވެ. ރަށްރަށުގެ ލަފާފުރުމުގެ ނިޒާމު ރަނގަޅުކުރުމާއި، ތަޢުލީމީ، ސިއްޙީ އަދި ރައްކާތެރި ބޯފެނާއި ފަސޭޙަ ނަރުދަމާގެ ނިޒާމަކީ ކޮންމެ ރަށެއްގައި ޤާއިމުވެފައި ހުންނަންޖެހޭ އަސާސީ ޚިދުމަތްތައްކަން ސަރުކާރުންދަނީ ކަށަވަރުކުރަމުންނެވެ.
އާއްމު ޚިދުމަތްތަކުގެ ތެރެއިން ފެނާއި ނަރުދަމާގެ މައްސަލައަކީ ތަކަންދޫއަށް ބޮޑު މައްސަލައެކެވެ. ރަށުގެ އުތުރުކޮޅަކީ ކުޅިއެއް އޮންނަ ސަރަޙައްދަކަށް ވުމާއެކު އެސަރަހައްދުގެ ބިން އޮންނަނީ ޗަކަ ވެފައެވެ. ފެނާއި ނަރުދަމާގެ މައްސަލައާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ޙިއްސާކުރައްވަމުން ތަކަންދޫ ކައުންސިލްގެ ރައީސް ހުސައިން ނައީމް ވިދާޅުވީ ފެން ތަޣައްޔަރުވުމާއި ނަރުދަމާގެ މައްސަލައަކީ ތަކަންދުއަށް ޒަމާންތަކެއްވީ ބޮޑު މައްސަލައެއްކަމަށެވެ. އެރަށުގައި ފެނާ ނަރުދަމާ ނިޒާމު ޤާއިމުކުރުމުގެ މަސައްކަތް، 2009ވަނަ އަހަރުން ފެށިގެން ބަޖެޓުގަ އަންނަނީ ހިމަނަމުންނެވެ. ނަމަވެސް މިހާތަނަށްވެސްވަނީ ރައްޔިތުންނަށް ދިމާވަމުން އައި ދަތިތަކަށް ޙައްލެއް ނުލިބިއެވެ.
މައްސަލަ ޙައްލުކޮށްދިނުމަށް ސަރުކާރުން މިދިޔަ އަހަރުވަނީ ތަކަންދޫ ފެނާއި ނަރުދަމާގެ މަސައްކަތް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ އެމްޑަބްލިއުއެސްސީއާ ހަވާލުކޮށްފައެވެ. އެ ކުންފުނިން މިހާރުދަނީ އެރަށުގައި ޢަމަލީ މަސައްކަތް ފަށައިގެން ކުރިއަށްގެންދަމުންނެވެ. މި ޕްރޮޖެކްޓާއެކު ރައްޔިތުންނަށްވަނީ އުއްމީދު އާވެފައެވެ.
"ރަށުގެ އުތުރުކޮޅަކީ ޗަސްބިން ބޮޑު ސަރަޙައްދެއް. ވިއްސާރަ ދުވަސްވަރު ފެން ވަޅުތައް ފުރުމާއި، ޖަންގްޝަންތަކަށް އަސަރުކުރޭ. ފެން ވަރަށް ބޮޑަށް ތަޣައްޔަރުވޭ. އަދި މިހާރުދަނީ ފާހަގަވަމުން، ރަށުގެ ފެން ލޮނުވަމުންދާކަންވެސް." ކައުންސިލްގެ ރައީސް ވިދާޅުވިއެވެ.
ތަކަންދޫގެ ފެނާއި ނަރުދަމާގެ މަސައްކަތް އެމްޑަބްލިއުއެސްސީއިން ފެށީ މިއަހަރުއެވެ. މިވަގުތު ކުރިއަށްދަނީ ފެން ޕްލާންޓް ބަހައްޓާ އިމާރާތުގެ މަސައްކަތްތަކެވެ. އަދި ގޭގެއަށް ވިއުގަ އެޅުމުގެ ކުރިން ކުރަންޖެހޭ މަސައްކަތްތައްދަނީ ކުރަމުންނެވެ.
މި ޕްރޮޖެކްޓްގައި ހިމެނެނީ 8.37 ކިލޯމިޓަރުގެ ފެނުގެ ވިއުގައާއި، 6.33ކިލޯމީޓަރުގެ ނަރުދަމާ ވިއުގައާއި، އާރް.އޯ ޕްލާންޓް ބެހެންޓުމާއި، ފެން ރައްކާކުރާ ތާންގީ ބެހެއްޓުމާއި، ޕަމްޕް ސްޓޭޝަންތައް ޤާއިމުކުރުމާއި، ސީ އައުޓުފޯލްގެ މަސައްކަތެވެ. އެގޮތުން 2އާރްއޯ ޕްލާންޓާއި، ފެން ރައްކާކުރުމަށް 3ތާންގީއާއި، އަދި ނަރުދަމާއަށް 3 ޕަމްޕް ސްޓޭޝަން ބަހައްޓާނެއެވެ.
ކައުންސިލުން ވިދާޅުވީ ފެނާއި ނަރުދަމާގެ ޕްރޮޖެކްޓްގެ މަސައްކަތް މުޅިން ނިންމާ އަންނަ އަހަރުގެ ޖޫންމަހުގެ ނިޔަލަށް ބޭނުންކުރަން ފެށޭނެ ކަމަށް، ޕްރޮޖެކްޓްގެ ކޮންޓްރެކްޓަރ އެމްޑަބްލިއުއެސްސީން ޔަގީންކަންދޭކަމަށެވެ.
ތަކަންދޫ ފެނާ ނަރުދަމާ ޕްރޮޖެކްޓްގެ އަގަކީ 76.7 މިލިއަން ރުފިޔާއެވެ.