ހުވަދު އަތޮޅު އުތުރުބުރީ ދާންދޫގެ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަސައްކަތް ފެށުމަށް ތައްޔާރުވެއްޖެއެވެ. މިޕްރޮޖެކްޓްގެ މަސައްކަތް ކުރިއަށްގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީންނެވެ.
ދާންދޫގެ އިތުރުވަމުން އަންނަ އާބާދީއާއެކު، ރަށަށްވަނީ ބިމުގެ ޖާގައިގެ ދަތިކަން ވަރަށް ބޮޑަށް ކުރިމަތިވެފައެވެ. 2000މީހުންގެ އާބާދީއެއް އޮންނަ ދާންދޫން މީގެކުރިންވެސް ބިންހިއްކާ، ރަށަށް ޖާގަ އިތުރުކޮށްފައިވެއެވެ. އެސަރަޙައްދު ބޭނުންކުރަނީ އާއްމު އެކި ޚިދުމަތްތަކަށެވެ.
ދާންދޫ ބިންހިއްކުމާއި ގޮނޑުދޮށް ޙިމާޔަތްކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފައިވަނީ، މިދިޔަ އަހަރުގެ ފަހުކޮޅުއެވެ. ދާންދޫ ބިންހިއްކުމުގެ މަސައްކަތަށް ބޭނުންވާ ސާމާނު، މިދިޔަ އަންގާރަދުވަހު އެރަށަށްވަނީ ގެންގޮސްފައެވެ.
އެމްޓީސީސީއާ ހަވާލުކޮށްފައިވަނީ، އެރަށު ފަޅުން 25ހެކްޓަރުގެ ސަރަޙައްދެއް ހިއްކުމަށެވެ. އަދި ހިއްކާ ސަރަޙައްދު ޙިމާޔަތްކުރުމަށް 1238މީޓަރުގެ ސަރަޙައްދުގައި ބޮޑުހިލަ ޖެހުމުގެ މަސައްކަތް ހިމެނެއެވެ. މީގެ އިތުރަށް 240މީޓަރުގެ ސަރަޙައްދުގައި ހުރަސް ތޮށިލުމަށްވަނީ ހަވާލުކޮށްފައެވެ.
އެމްޓީސީސީން ބުނީ މަސައްކަތުގެ ޢަމަލީ މަސައްކަތް ރަށުގައި ވަރަށް އަވަހަށް ފަށާނެކަމަށެވެ.
މިމަޝްރޫޢަކީ ސަރުކާރުގެ ބަޖެޓުން 186.6 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢުއެކެވެ. މިޕްރޮޖެކްޓްގެ މަސައްކަތް ހަވާލުކުރީ 1އަހަރު ދުވަހުން މަސައްކަތް ނިންމާގޮތަށެވެ.
ބިން ހިއްކުމުގެ މަޝްރޫޢާއެކު ރަށަށް ދިމާވެފަވާ ބޯހިޔާވަހިކަމުގެ މައްސަލައަށް ބޮޑު ޙައްލެއް ލިބޭނެއެވެ.