ޓެކްސީ ޑްރައިވަރެއްގެ ފުރާނައަށް ނުރައްކާވާ ފަދަ ޢަމަލެއް ހިންގި މައްސަލައެއް ފުލުހުން ބަލަން ފަށައިފިއެވެ. ފުލުހުން ވިދާޅުވީ ހުޅުމާލޭގައި ޓެކްސީ ޑްރައިވަރަކަށް އަމާޒުކޮށް، ފުރާނައަށް ނުރައްކާވާފަދަ ޢަމަލެއް ހިންގި މައްސަލަ ފުލުހުންނަށް ހުށައަޅާފަވަނީ ރޭ 00:30ހާއިރުކަމަށެވެ.
ފުލުހުން ވިދާޅުވީ މި މައްސަލައާ ގުޅިގެން 25އަހަރުގެ އިންޑިއާ ފިރިހެނަކު ހައްޔަރުކޮށްފައިވާކަމަށެވެ. އެމީހާ ފުލުހުންގެ ބެލުމުގެދަށަށް ގެންދިޔައިރު ހުރީ މަސްތުގެ ޙާލަތުގައިކަން ފާހަގަކުރެވިފައިވާ ކަމަށް ފުލުހުން ވިދާޅުވިއެވެ.
މަޢުލޫމާތު ލިބޭގޮތުގައި މި ޙާދިސާ ހިންގީ ހުޅުލެއިން ހުޅުމާލެއަށް ކުރި ދަތުރެއްގައެވެ. މިހަމަލާ ދިން މީހާވަނީ ޑްރައިވަރަށް ހަމަލާދީ ޑްރައިވަރު ނޭވާ ހާސްކޮށްލުމަށް މަސައްކަތްކޮށްފައެވެ. މަޢުލޫމާތުލިބޭގޮތުގައި މި ޢަމަލު ހިންގާފަވަނީ ބިދޭސީ މިހާ ފައިސާ ފޭރުމަށެވެ.
ހުޅުމާލޭގައި މީގެކުރިންވެސްވަނީ ޓެކްސީ ޑްރައިވަރަކަށް ހަމަލާދީ މަރާލާފައެވެ. މި ޢަމަލު ހިންގާފައިވަނީވެސް މަސްތުގެ ޙާލަތުގައި ހުރެ، ފައިސާގެ ބޭނުމުގައެވެ.