ތިމާވެށީގެ ކަންކަމުގައި މިސަރުކާރުން މަސައްކަތް ކުރައްވާނީ ނަތީޖާ ނެރުމަށް ކަމަށާއި، ކުރައްވާނީ ނަތީޖާ ނެރެވޭނެ މަސައްކަތްތައް ކަމަށް އެންވަޔަރަންމަންޓް މިނިސްޓަރ ތާރިޤް އިބްރާހީމް ވިދާޅުވެއްޖެއެވެ.ޕެރިހުގައި މިހާރު ކުރިއަށްދާ ތިމާވެއްޓާބެހޭ ސަމިޓް، ކޮޕް 21 ގައި ބައިވެރިވެ ވަޑައިގަތުމަށް ފުރާވަޑައިގަތުމުގެ ކުރިން އެއަރޕޯޓުގައި ނޫސްވެރިންނަށް މަޢުލޫމާތުދެއްވަމުން މިނިސްޓަރ ވިދާޅުވީ، ރާއްޖެއިން މަސައްކަތްކުރައްވަމުންދަނީ ކަންކަމުގައި އިސްނަގައިގެން ކުރިއަށްދިއުމަށް ކަމަށާއި، މި ސަމިޓްގައިވެސް ރާއްޖެއިން ހާސިލްކުރަން ބޭނުންވާ ކަންކަން ހާސިލްކުރެވޭނެކަމުގެ ވަރަށް ބޮޑު ޔަޤީންކަމެއް އެބައޮތް ކަމަށެވެ.މިނިސްޓަރ ވިދާޅުވީ ކާރިސާތަކާއި ގުޅިގެން ކުއްލި ޙާލަތުގައި އެހީދޭނެ ފައިސާ ފަންޑުގައި ބަހައްޓަން ބޮޑެތި ޤައުމުތަކުން ކުރިން ފަސްޖެހުނު ނަމަވެސް މިހާރު އެކަމަށް އެއްބަސްވެފައިވާކަމަށެވެ.އަދި ކުދި ޖަޒީރާ ޤައުމުތަކަށް ކުރިމަތިވާ މައްސަލަތަކާއި ކުރިމަތިލާނެ ފަންނީ ޤާބިލު މީހުން އުފެއްދުމާއި ބޭނުންވާ ޓެކްނޮލޮޖީ ލިބުމަކީ ވެސް ވަރަށް މުހިންމު ކަމެއް ކަމަށެވެ. އެހެންކަމުން ކޮޕް 21 ގެ ތެރެއިން އެކުލަވައިލެވޭ އެއްބަސްވުމުގައި މިކަންކަން ހިމެނިގެންދާނެ ކަމަށް ޔަޤީންކުރައްވާ ކަމަށް މިނިސްޓަރ ވިދާޅުވިއެވެ.މިނިސްޓަރ ވިދާޅުވީ 2020 އަންނަ އިރު ކްލައިމެޓް ފަންޑަށް ޖަމާ ކުރަންޖެހޭ 100 ބިލިއަން ޑޮލަރު، ޖަމާކުރާ ޤައުމުތަކުގެ ތަފްސީލު ކުރިން ލިބެންޖެހޭނެ ކަމަށާއި 2020 އަންނައިރު އެކަން ހަމަޖެހިފައި އޮންނާނެ ކަމުގެ ޔަޤީންކަން ހޯއްދަވަންވެސް ބައްދަލުވުމުގެ ތެރެއިން މަސައްކަތް ކުރައްވާނެ ކަމަށެވެ.މިނިސްޓަރގެ ވާހަކަފުޅުގައި، ކުދި ޖަޒީރާ ޤައުމުތަކުން އެދޭ ކަންތައްތަކުގެ ޑްރާފްޓެއް އެކުލަވާލާފައިވާކަމަށާއި، އެ ޑްރާފްޓާއި އެއްގޮތަށް ކަންތައްތައް ފާސްކުރެވޭނެކަމުގެ އުންމީދު ވަރަށް ބޮޑު ކަމަށް ވިދާޅުވިއެވެ.މީގެ އިތުރުން ކްލައިމެޓް ފަންޑުން މިހާރުވެސް ރާއްޖެއަށް އެހީތެރިކަން ލިބެމުންދާކަން މިނިސްޓަރ ފާހަގަކުރެއްވިއެވެ.އެގޮތުން ދާދިފަހުންވެސް އެ ފަންޑުން 23 މިލިއަން ޑޮލަރު ރާއްޖެއަށް ލިބިފައިވާ ކަމަށް މިނިސްޓަރ ވިދާޅުވިއެވެ. އަދި އެފައިސާ ލިބުނީ އެކަމަށް ޚާއްޞަ ޕްރޮޕޯސަލްތައް ހުށައަޅައިގެން ކަމަށާއި އެކަމަށް ރައީސުލްޖުމްހޫރިއްޔާގެ ވަރަށް ބޮޑު އެއްބާރުލެއްވުމެއް ލިބިވަޑައިގެންނެވި ކަމަށް މިނިސްޓަރ ތާރިޤް ވިދާޅުވިއެވެ.