ޔޫރޯ 2020 ގްރޫޕް ބީ ގައި ފިންލަންޑާއި ރަޝިޔާ ރޭ ބައްދަލުކުރިމެޗުން މޮޅުވުން އެއީ މިމުބާރާތުގައި ކުރިއަށްދާން ބޭނުންކަމަށްވާނަމަ ވަރަށް މުހިންމު ކާމިޔާބީއެއް ކަމަށް ރަޝިޔާގެ ކޯޗް ސްޓަނިސްލާވް ޗެރްޗެސޯވް ބުނެފިއެވެ. އޭނާ މިހެން ބުނެފައިވަނީ ރޭގެ މެޗަށްފަހު ނޫސްވެރިންނާއި ވާހަކަ ދައްކަމުންނެވެ.
ފިންލަންޑާއި ރަޝިޔާ ބައްދަލުކުރިމެޗް ރަޝިޔާ ކާމިޔާބުކޮށްފައި ވަނީ އެއްލަނޑު ސުންލަނޑުންނެވެ. މިއީ މިފަހަރުގެ މުބާރާތުގައި ރަޝިޔާ އަށް ކާމިޔާބު ކުރެވުނު ފުރަތަމަ މެޗެވެ. އެޓީމް ކުޅުނު ފުރަތަމަ މެޗުން ވަނީ ބަލިވެފައެވެ. އެހެންކަމުން މިމެޗުން މޮޅުވުން ރަޝިޔާއަށް އޮތީ ވަރަށް މުހިންމުވެފައެވެ. ރަޝިޔާގެ ކޯޗް ޗެރްޗެސޯވް ބުނީ އޭނާގެ ކުޅުންތެރިން މިމެޗްގައި ޓީމެއްގެ ގޮތުގައި ކުޅެފައިވާކަމަށެވެ. އަދި އެކުޅުންތެރިން ވަނީ މިމެޗްގައި ޕްލޭނާއި އެއްގޮތަށް ކުޅެ ކާމިޔާބީ ހޯދާފައިކަމަށްވެސް އޭނާ ބުންޏެވެ. އަދި މިމެޗްގައި އޭނާ ބޭނުންކުރި ފޯމޭޝަން މަސައްކަތް ކުރީ ކަމަށާއި ފިންލަންޑް ކަހަލަ ޓީމަކާއި ދެކޮޅަށް ކުޅޭއިރު ދެފަރާތު އަރިމަތި ބޭނުން ކުރުން ވަރަށް މުހިންމު ކަމަށާއި އަދި އެކަމުގެ ފައިދާ މިމެޗްގައި ރަޝިޔާގެ ޓީމަށް ނެގުނުކަމަށް އެޓީމްގެ ކޯޗް ބުންޏެވެ.
ރޭގެމެޗްގައި ޖެހި ހަމައެކަނި ލަނޑު ކާމިޔާބުކޮށްދިން އެލެކްސީ މިރަންކުޗް ބުނީ މުހިންމީ އޭނާ ޖެހި ލަނޑު ނޫން ކަމަށާއި މުހިންމީ މިމެޗުން މޮޅުވުންކަމަށެވެ. އަދި އެކަން ރޭގެ މެޗްގައި ހާސިލް ކުރެވުމުން ހިތްހަމަ ޖެހޭ ކަމަށެވެ. އަދި ދެން އޮތީ ކުރިއަށް އޮތް މެޗަށް ފޯކަސް ކުރުން ކަމަށްވެސް އޭނާ ބުންޏެވެ.
ފިންލަންޑްގެ ކޯޗް މާކޫ ކެނާވާ ބުނީ މިމެޗްގައި ޑެންމާކާއެކު ކުޅުނު މެޗަށްވުރެ ރަނގަޅަށް ޑިފެންޑް ކޮށް އަދި ކުޅުންވެސް ރަނގަޅު ކުރެވުނު ކަމަށެވެ. ނަމަވެސް މިމެޗްގައި ލަނޑެއް ޖެހޭގޮތް ނުވީކަމަށާ، ނަމަވެސް ފުރުސަތު ތަނަވަސް ކުރެވުނު ކަމަށް އޭނާ ބުންޏެވެ. ފިންލަންޑް ޓީމުގެ ކެޕްޓަން ޕައުލަސް އަރަޔޫރީ ބުނީ މިމެޗުން ބަލިވި ނަމަވެސް ހުރިހާ ކުޅުންތެރިން ދެއްކި ކުޅުމާމެދު ފަހުރުވެރިވާކަށެވެ. ރަޝިޔާއަކީ ވަރުގަދަ ޓީމެއް ކަމަށާއި ނަމަވެސް ފިންލަންޑް ގެ ކުޅުންތެރިންވެސް މިމެޗްގައި ފުރުސަތު ތަނަވަސްކުރިކަމަށް އޭނާ ބުންޏެވެ.