ހއ.އުތީމުގައި ހުންނަ ބޮޑުތަކުރުފާނު ހަނދާނީ މަރުކަޒު ތަރައްޤީކުރުމުގެ މަސައްކަތުގައި ހިމެނޭ، އެކަމަޑޭޝަން ބްލޮކްގެ މަސައްކަތް ނިމިއްޖެއެވެ.
މި މަސައްކަތަކީ އަތޮޅުތަކުގައި ހުރި އާސާރީ ތަންތަނަކީ، އާމްދަނީ ލިބޭނެ ތަންތަނަށް ހެދުމަށް ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ކުރިއަށްގެންދާ މަސައްކަތުގެދަށުން ފެށި މިފަދަ އެންމެ ބޮޑު މަސައްކަތެވެ.
އުތީމުގައި ހުންނަ ބޮޑުތަކުރުފާނު ހަނދާނީ މަރުކަޒު މިހާރު ބޭނުންކުރަމުން އަންނަނީ ޖަލްސާތަކާ ހަފްލާތައް އަދި އެކިއެކި އިޖްތިމާޢީ ހަރަކާތްތައް ބާއްވާ ތަނެއްގެ ގޮތުގައެވެ. އަދި އެ އިމާރާތަކީ ކުރިން އުތީމުގައި ތަޢުލީމު ދިނުމަށްވެސް ބޭނުންކުރި އިމާރާތެވެ.
ރަށްރަށުގައި ހުރި އާސާރީ ބިނާތައް އާބާތުރަފިލުވާ ތަރައްޤީކުރުމުގެ މަސައްކަތުގެ ދަށުން ބޮޑުތަކުރުފާނު ހަދާނީ މަރުކަޒު ތަރައްޤީކުރަނީ ދެ ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގައި ހިމަނައިގެން ކުރިއަށްގެންދިޔައީ، ކުރިން ކިޔަވައިދިނުމަށް ބޭނުންކުރި ކްލާސްރޫމްތަކާއި އޮފީސް އިމާރާތަށް ބަދަލުގެނެސް އެތަނުގައި އެކަމަޑޭޝަން ބްލޮކެއް ހެދުމުގެ މަސައްކަތެވެ.
މި މަސައްކަތަކީ ރަށަށް ޒިޔާރަތްކުރާ މީހުންނަށް ފަސޭހައިން ރަށުގައި ވަގުތު ހޭދަކުރެވޭނެ މަގުފަހިކޮށްދިނުމާއި ރަށުގައި ހުރި އާސާރީ ތަންތަނުން ރަށަށް އާމްދަނީ ލިބޭނެ ގޮތް ފަހިކޮށްދިނުމަށް ކުރިއަށްގެންދާ މަސައްކަތެކެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ބޮޑުތަކުރުފާނު ހަނދާނީ މަރުކަޒުގެ އެސިސްޓެންޓް ޑިރެކްޓަރ އަލީ ސިފާމު ވިދާޅުވީ އެކަމަޑޭޝަން ބްލޮކްގެ ފުރަތަމަ ފިޔަވަހީގައި ހިމަނާފައިވާ ހުރިހާ މަސައްކަތް ނިމިފައިވާކަމަށެވެ. އެގޮތުން އިމަރާތަށް ގެންނަންޖެހޭ ބަދަލުތަކާ، އެކަމަޑޭޝަން ބްލޮކްގައި ހިމެނޭ 4 ކޮޓަރީގެ މަސައްކަތްވެސް ނިމިފައިވާކަމަށް އޭނާ ވިދާޅުވިއެވެ. މިހާރު ކުރިއަށްދާނީ ކޮޓަރިތަކަށް ބޭނުންވާ ފަރުނީޗަރާ ބައެއް އިލޮކްޓްރޯނިކްސް ސާމާނު ހޯދުމުގެ މަސައްކަތްކަމަށް އޭނާ ވިދާޅުވިއެވެ.
"1 ވަނަ ފިޔަވަހީގައި ކުރިއަށްގެންދިޔައީ ޒަމާނީ ފެންވަރުގެ އެކަމަޑޭޝަން ބްލޮކެއްގެ މަސައްކަތް. އެއީ ހަތަރު ކޮޓަރިއާ 5 ފާހަނައާ، ބަދިގެ އަދި ކޮރިޑޯ އޭރިއާއެއް ހިމެނޭ." އަލީ ސިފާމު ވިދާޅުވިއެވެ.
ސިފާމު ވިދާޅުވީ އިންޓިރީއާ މަސައްކަތާއެކު މުޅި އެކަމަޑޭޝަން ބްލޮކްގެ މަސައްކަތް 2-3މަސްތެރޭ ބޭނުންކުރަން ދޫކުރާވަރަށް މަސައްކަތްތައް ނިންމާލެވޭނެކަމަށެވެ. އަދި ކުއްޔަށް ދޫކުރުމުގެ އަގުތަކާ ގުޅޭގޮތުން ކަމަގުޅޭ ފަރާތްތަކާއެކު މަޝްވަރާކުރަމުންދާކަމަށް ސިފާމް ވިދާޅުވިއެވެ.
ސިފާމް ވިދާޅުވީ ފުރަތަމަ ފިޔަވަހީގެ މަސައްކަތްތަކަށް މިލިއަނަކަށްވުރެ ގިނަ ރުފިޔާ ވަނީ ހޭދަކޮށްފައިވާކަމަށެވެ.
ސިފާމް ވިދާޅުވީ ބޮޑުތަކުރުފާނު ހަނދާނީ މަރުކަޒުގައި ހުންނަ އާއްމު ފާހަނަބަރިވެސް ޒަމާނީ ފެންވަރަށް ތަރައްޤީކުރުމަށް ކުރަންޖެހޭ މަސައްކަތްތައް މިހާރު ދަނީ ކުރިއަށްކަމަށެވެ.
އުތީމު ބޮޑުތަކުރުފާނު ހަނދާނީ މަރުކަޒުގެ ދެވަނަ ފިޔަވަހީގެ މަސައްކަތުގައި ހިމެނެނީ ސްވެނިއަރ ފިހާރައެއް ހެދުމާ، ކެފޭއެއް ހެދުމުގެ މަސައްކަތެވެ. ވިޔަފާރީގެ ގޮތުގައި ކުރިއަށްގެންދާ މި މަސައްކަތުގެ ސަބަބުން ރަށަށް އިތުރު އާމްދަނީ ވަދެ، ރަށުގެ ރައްޔިތުންގެ އާއްމު ދިރުއުޅުމަށް ހެޔޮ ބަދަލެއް އަންނާނެއެވެ. ސްވެނިއަރ ފިހާރަޔާ ކެފޭގެ މަސައްކަތް ކުރިއަށްގެންދާނެ ބަޔަކު ހޯދުމަށްވެސް މިހާރުވަނީ އިޢުލާނުކޮށްފައެވެ.
އުތީމަކީ ރާއްޖޭގެ އެންމެ އާސާރީ އެއް ރަށެވެ. އުތީމު ގަނޑުވަރަކީ އެންމެ މަޝްހޫރު އެއް އާސާރީ ބިނާއެވެ. ގަނޑުވަރު ބަލާލުމަށް ކޮންމެ އަހަރަކުވެސް ގިނަ ބަޔަކު އެރަށަށް ޒިޔާރަތްކުރާއިރު މިއީ ފަތުރުވެރިންގެ މެދުގައިވެސް މަޤްބޫލު ބިނާއެކެވެ. ގަނޑުވަރަށް އެންމެ ގިނަ ބަމީހުން ޒިޔާރަތްކުރަނީ އެކި އެކި ބަންދުތަކުގައެވެ. އެގޮތުން ބަންދު ދުވަސްތަކުގައި އެވަރެޖްކޮށް ދުވާލަކަށް 300 މީހުން ގަނޑުވަރަށް ޒިޔާރަތްކުރާކަމަށް ހަނދާނީ މަރުކަޒުގެ އެސިސްޓެންޓް ޑިރެކްޓަރ ވިދާޅުވިއެވެ.
މިގޮތަށް ޒިޔާރަތްކުރާ މީހުންގެ ބޮޑު ޝަކުވާއަކަށްވެސް ވެފައި އޮންނަނީ އާއްމު ޚިދުމަތްތައް ދަތިވުމެވެ. ނަމަވެސް ބޮޑުތަކުރުފާނު ހަނދާނީ މަރުކަޒު ތަރައްޤީކުރުމުގެ މަސައްކަތް ނިމޭއިރު، އުތީމަށް ޒިޔާރަތްކުރާ މީހުންނަށް ބޮޑު ލުއިފަސޭހައެއް ލިބޭނެއެވެ.