މާލޭގެ ރައްޔިތުން ދަތުރު ދާން ހާއްސަ ރަށެއްގެ ގޮތުގައި ފަރުކޮޅުފުށި ހަމަޖެއްސުމަށް ނިންމާފައިވާކަމަށް މާލެ ސިޓީގެ މޭޔަރ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ކުރިން ރިސޯޓެއްގެ ގޮތުގައި ހިންގި ފަރުކޮޅުފުށި ވަނީ ހުޅުމާލޭގެ ދެވަނަ ފިޔަވައްސާއި ގުޅާލާފައެވެ.
މާލެ ސިޓީގެ މޭޔަރ މުޙައްމަދު މުޢިއްޒު ވިދާޅުވީ ހުޅުމާލެ ދެވަނަ ފިޔަވަހި ހިއްކިއިރު، ކުރިން ރިސޯޓެއްގެ ގޮތުގައި ހިންގި ފަރުކޮޅުފުށި މާލޭގެ އިޙުތިސާސުގެ ތެރޭގައި ހިމެނިގެން ގޮސްފައިވާކަމަށެވެ. އަދި ޤާނުނުގައި ބުނާގޮތުން އެރަށަކުން 700 މީޓަރު ދުރަށް އޮންނަ ސަރަޙައްދުގައި ހިމެނޭ ރިސޯޓާ އިންޑަސްޓްރިއަލް ރަށްތަށް ފިޔަވައި ދެން ހުންނަ ރަށްތަކަކީ އެރަށެއްގެ އިހުތިޞާސުގައި ހިމެނޭ ތަންތަންކަމަށް މުއިއްޒު ވިދާޅުވިއެވެ.
މާލޭގެ ލޭންޑް ޔޫސް ޕްލޭން އެކުލަވާލުމުގެ މަސައްކަތް ކުރިއަށްދާއިރު، ބިންތައް ބޭނުންކުރާނީ ރައްޔިތުންނަށް އެންމެ ފައިދާ ބޮޑުވާނެހެންކަމަށް މުޢިއްޒު ވިދާޅުވިއެވެ.
"ކައުންސިލްގެ އިއްތިފާގުން ފާސްވީ ފަރުކޮޅުފުއްޓަކީ އިވެންޓްތައް ބޭއްވުމާ މާލޭގެ ރައްޔިތުން ދަތުރުދާ ތަނެއްގެ ގޮތުގައި ހެދުމަށް." މުޢިއްޒު ވިދާޅުވިއެވެ.
ފަރުކޮޅުފުއްޓަކީ ކުރިން ރިސޯޓެއްގެ ގޮތުގައި ހިންގި ރަށެކެވެ. އެރަށް މިހާރު އޮންނަނީ ފަޅުރަށެއްގެ ގޮތުގައެވެ. ހުޅުމާލޭގެ ފަޅުތެރެއަށްވާ ގޮތަށް އޮންނަ ފަރުކޮޅުފުށި ވަނީ، ހުޅުމާލޭގެ ދެވަނަ ފިޔަވަހި ހިއްކިއިރު ދެވަނަ ފިޔަވައްސާއި ގުޅާލާފައެވެ. އަދި ރަސްމީ ލިޔެކިޔުންތަކުގައިވެސް ފަރުކޮޅުފުއްޓަކީ ހުޅުމާލޭ ދެވަނަ ފިޔަވަހީގެ ބައެއްގެ ގޮތުގައި ހިމަނާފައިވާކަމަށް މުޢިއްޒު ވިދާޅުވިއެވެ.
އެޗްޑީސީގެ ބެލުމުގެދަށުގައި ފަރުކޮޅުފުށި އޮތްނަމަވެސް، ޤާނޫނު ބުނާގޮތުން ހުޅުމާލޭގައި ބިމުގައި ކުރާ ކަންކަމުގައި ކައުންސިލްގެ ޙިއްސާ އޮންނަންޖެހެއެވެ.
2016 ވަނަ އަހަރު ދެވަނަ ފިޔަވަހި ހިއްކާ ފަރުކޮޅުފުއްޓާ ގުޅުވާލުމުން، އެތަން އެކިއެކި ހަފްލާތައް ބޭއްވުމަށް ދޫކުރަމުން އައިސްފައިވެއެވެ. އަދި މިހާރު އެތަން ބޭނުންކުރަމުން އަންނަނީ ކޮވިޑް އައިސޮލޭޝަން ފެސިލިޓީއެއްގެ ގޮތުގައެވެ. އެތަން ވަގުތީގޮތުން ޑްރަގް ޑިޓޮކްސް ސެންޓަރެއްގެ ގޮތުގައިވެސް ބޭނުންކޮށްފައިވެއެވެ. ނަމަވެސް ދުރުރާސްތާގައި ފަރުކޮޅު ބޭނުންކުރުމަށް ސިޓީ ކައުންސިލުން ނިންމާފައިވަނީ ދަތުރުދާ ރަށެއްގެ ގޮތުގައިއާއި އިވެންޓްތައް ބާއްވާ ތަނެއްގެ ގޮތުގައެވެ.
މާލޭ ސަރަޙައްދުގައި ދަތުރުދާ ރަށެއް ނެތުމަކީ މަލޭގެ ރައްޔިތުންގެ ބޮޑު ޝަކުވާއެކެވެ. ޒަމާންތަކެއް ވަންދެން މި ސަރަޙައްދުގެ ރައްޔިތުން ދަތުރު ދިއުމަށް ބޭނުންކުރީ ކުޑަބަނޑޮހެވެ. ނަމަވެސް އެތަން މިހާރުވަނީ ރިސޯޓެއްގެ ގޮތުގައި ތަރައްޤީކޮށްފައެވެ.
ނާހިދު
ފަރުކޮޅުފުށި މިހާރު ހުޅުމާލެ އާ ގުޅާލެވިފަ އޮތުމުން އެތަނަށް ރަށެކޭ ނުކިޔޭނެ. އެތަނެކޭ ރަސްފަންނެކޭ، ވިލިނގިއްޔެކޭ އަދި އާrޓިފިޝިއަލް ބީޗެކޭ ތަފާތެއް ނެތް.