ޔޫރޯ 2020 އަށް ތައްޔާރު ވުމުގެ ގޮތުން އިޓަލީވިލާތާއި ޗެކް ރިޕަބްލިކްގެ މެދުގައި ކުޅުނު ރަހްމަތްތެރިކަމުގެ މެޗް އިޓަލީވިލާތް ކާމިޔާބުކޮށްފިއެވެ. އިޓަލީވިލާތުގެ ބޮލޯނިއާގައި ކުޅުނު މިމެޗް ރަށު ޓީމް ކާމިޔާބުކުރީ 4 ލަނޑު ސުންލަނޑުންނެވެ.
މިއީ މިއަންނަ ހުކުރު ދުވަހުގެ ރޭ ފެށުމަށް ހަމަޖެހިފައިވާ ޔޫރޯ 2020 ގެ ކުރިން އިޓަލީވިލާތުން ކުޅުނު ރަހްމަތްތެރިކަމުގެ ފަހު މެޗެވެ. އިޓަލީވިލާތުގެ ޓީމުގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި ގިނަ އިރު ބޯޅަ ގެންގުޅެ ގިނަ ހަމަލާ އުފައްދާފައިވަނީވެސް އިޓަލީއެވެ. މިގޮތުން މެޗްގެ ފުރަތަމަ ލަނޑު މެޗްގެ 23 ވަނަ މިނެޓްގައި ޖަހައިދިނީ ސީރޯ އިމޮބިލޭއެވެ. އަދި ދެވަނަ ލަނޑު ފުރަތަމަ ހާފް ނިމެން ތިން މިނެޓަށް ވެފައިވަނިކޮށް ޖަހައިދިނީ ނިކޮލާ ބެރެއްލާއެވެ. އަދި ތިންވަނަ ލަނޑު މެޗްގެ 66 ވަނަ މިނެޓްގައި ޖަހައިދިނީ އިއްޔެ 30 ވަނަ އުފަން ދުވަސް ފާހަގަ ކުރަމުންދިޔަ ލޮރެންޒޯ އިންސިގްނޭއެވެ. އަދި ފަހު ލަނޑު މެޗްގެ 73 ވަނަ މިނެޓްގައި ޖަހައިދިނީ ޑޮމެނިކޯ ބެރާޑީއެވެ. މިމެޗްގައި ޗެކް ރިޕަބްލިކުން ކޮންމެވެސް ވަރަކަށް އިޓަލީގެ ގޯލަށް ނުރައްކާ ކުރި ނަމަވެސް މުޅި މެޗަށް ބަލާއިރު އެޓީމްގެ ފަރާތުން މާއެދެވޭ ރަނގަޅު ކުޅުމެއް ފެނިގެން ގޮސްފައެއް ނުވެއެވެ.
މިއީ އިޓަލީއިން ބައިކޮޅަށް ލަނޑެއް ވަނަ ނުދީ ޖެހިޖެހިގެން ނިންމާލި 8 ވަނަ މެޗެވެ. އަދި 2018 ވަނަ އަހަރަށްފަހު އިޓާލީވިލާތް މެޗަކުން ބަލިވެފައެއް ނުވެއެވެ.
ޔޫރޯ 2020 ގެ ފުރަތަމަ މެޗްގައި އިޓަލީވިލާތް ނިކުންނާނީ ތުރުކީވިލާތާއި ދެކޮޅަށެވެ. އިޓަލީވިލާތް ހިމެނެނީ ތުރުކީވިލާތާއި ވޭލްސް އާއި ސްވިޓްޒަލަންޑާއެކު ގްރޫޕް އޭ ގައެވެ. އަދި ޗެކް ރިޕަބްލިކް ހިމެނެނީ އިންގްލަންޑާއި ސްކޮޓްލަންޑް އަދި ކްރޮއޭޝިއާ އާއެކު ގްރޫޕް ޑީ ގައެވެ.