ހދ. ކުޅުދުއްފުށީގައި އެއަރޕޯޓެއް އެޅުމަށް ސަރުކާރުން ވެވަޑައިގެންނެވި ވަޢުދު ފުއްދަވާނެ ކަމަށް ހޯމް މިނިސްޓަރ އުމަރު ނަޞީރު ވިދާޅުވެއްޖެއެވެ.ތިލަދެކުނު ޝަރަފްވެރިކަމުގެ އިނާމްދިނުމަށް ރޭ ކުޅުދުއްފުށީގައި ބޭއްވި ހަފްލާ ޝަރަފްވެރިކޮށްދެއްވާ ވާހަކަފުޅު ދައްކަވަމުން ހޯމް މިނިސްޓަރ އުމަރު ނަޞީދު ވިދާޅުވީ، ކުޅުދުއްފުށީގައި އަޅާ އެއަރޕޯޓަކީ ސަރުކާރުގެ ބަޖެޓުން ޚަރަދުކޮށްގެން އަޅާ އެއަރޕޯޓެއް ނޫންކަމަށާއި، އެއީ ޕަބްލިކް ޕްރައިވެޓް ޕާޓްނަރޝިފްގެ ދަށުން އަޅާނެ އެއަރޕޯޓެއްކަމަށެވެ. އަދި އެ މަޝްރޫޢު ފެށުމަށްޓަކާ ކުރައްވަންޖެހޭ މަސައްކަތްތައް ސަރުކާރުން ކުރައްވަމުންގެންދަވާ ކަމަށްވެސް މިނިސްޓަރ ވިދާޅުވިއެވެ.މި ހަފްލާގައި ހދ އަތޮޅަށް އެކިރޮނގު ރޮނގުން ޝަރަފްވެރި މަޤާމުތަކާއި ވަނަތައް ހޯދާދީފައިވާ ފަރާތްތަކުގެ އަގުވަޒަންކޮށް އެފާރަތްތަކަށް އިނާމްދީފައިވެއެވެ. މިގޮތުން އާންމު ޚިދުމަތުގެ ހިތްވަރު ދިނުމުގެ އިނާމް ޖުމްލަ 7 ދާއިރާއަކުން 6 ފަރާތަކަށް ދީފައިވެއެވެ.މީގެ އިތުރުން ރަންތަރިއާއި، އުޖާލާތަރި ހިތްމަތްތެރިތަރިޔާއި، ތޫނުފިލި ތަރި، އަދި ކާމިޔާބު އެދުރުގެ އިނާމް ޖުމްލަ 50 ފަރާތަކަށް ދީފައިވާއިރު، އުއްމީދީ މަދަރުސާ، އަދި ޝަރަފްވެރި މަދަރުސާގެ އިނާމު ޖުމްލަ 6 ސްކޫލަކުން ހާޞިލްކޮށްފައިވެއެވެ.މީގެ އިތުރުން މިހަފްލާގައި ހދ އަތޮޅުގައި ލޭ ހަދިޔާ ކުރާ ފަރާތްތަކުގެ ދަފްތަރެއްވެސް އަތޮޅު ކައުންސިލުން ތައާރަފްކޮށްދެއްވާފައިވެއެވެ.