ކައުންސިލަރުންނާއި ކޮމިޓީ މެންބަރުން މަޤާމަށް އަހުލުވެރިކުރުމަށް ކުރިއަށްގެންދިޔަ ޕްރޮގްރާމް ނިންމާލައިފި
ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް އަލަށް އިންތިޚާބުވި މެންބަރުން، މަޤާމަށް އަހުލުވެރިކުރުމަށް ކުރިއަށްގެންދިޔަ ޕްރޮގްރާމް ނިންމާލައިފިއެވެ. ހަފްތާއެއްގެ މުއްދަތަށް ކުރިއަށްގެންދިޔަ އޮރިއެންޓޭޝަން ޕްރޮގްރާމްގައި ކައުންސިލަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުން 1000އަށްވުރެ ގިނަ މެންބަރުންވަނީ ބައިވެރިވެފައެވެ.
ލޯކަލް ގަވަރމަންޓް އޮތޯރިޓީ އެލްޖީއޭއިން މިމަހުގެ 23އިން 27އަށް ކުރިއަށްގެންދިޔަ ޕްރޮގްރާމްއަކީ ލާމަރުކަޒީ ޤާނޫނާއި، ކައުންސިލާއި ކޮމިޓީގެ ޒިންމާތަކާ މަސްޢޫލިއްޔަތުތަކާ ގުޅޭ މަޢުލޫމާތު ޙިއްސާކުރުމަށް ކުރިއަށްގެންދިޔަ ޕްރޮގްރާމެކެވެ. މި ޕްރޮގްރާމްގެ އެންމެ ބޮޑު މަޤްޞަދަކީ ކައުންސިލްގެ އިދާރީ މަސައްކަތްތައް ކުރިއަށްގެންދާނެގޮތުގެ އިތުރުން، ކައުންސިލްތަކާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ދައުރާ ގުޅޭގޮތުން މަޢުލޫމާތުދިނުމެވެ.
އޮރިއަންޓޭޝަން ޕްރޮގްރާމްގެ ނިމުން ފާހަގަކުރުމަށް އޮންލައިންކޮށް ކުރިއަށްގެންދިޔަ ބައްދަލުވުމުގައި އެލްޖީއޭގެ ސީއީއޯ އަފްޝަން ލަތީފް ވިދާޅުވީ ރަށުގެ ތަރައްޤީގެ ޕްލޭންތައް ހެދުމާއި މުޖުތަމަޢުގެ ބައިވެރިވުމާއެކު ނިންމުންތައް ނިންމުމާއި، އިޖުތިމާޢީ ދުޅަހެޔޮކަން ހާސިލްކުރުމަށާއި ވިލުންވެރި ތަރައްޤީއަށް މަސައްކަތްކުރާނެ ގޮތްތަކާ ގުޅޭގޮތުން މި އޮރިއަންޓޭޝަންގައި ކައުންސިލަރުންނާ ކޮމިޓީ މެންބަރުން ތަމްރީންކޮށްފައިވާކަމަށެވެ. އަދި ރަށުގެ ތަރައްޤީއަށް، ސަރުކާރުގެ އެކި އިދާރާތަކާ ގުޅިގެން މަސައްކަތް ކުރިއަށްގެންދެވޭނެ ގޮތްތަކާ ގުޅޭ މަޢުލޫމާތުވެސް ޙިއްސާކޮށްފައިވާކަމަށެވެ.
"ރަށުގެ އިޤްތިޞާދީ އަދި އިޖުތިމާޢީ ކަންކަމަށް ފައިދާވާގޮތަށް މަސައްކަތް ގެންދެވޭނެ ގޮތްތަކާ އަދި ދެފުށްފެންނަ ހެޔޮވެރިކަމުގެ އަސާސްތަކާއެކު މަސައްކަތް ގެންދެވޭނެ ގޮތުގެ މަޢުލޫމާތުވެސް ދެވިއްޖެ." އަފްޝަން ވިދާޅުވިއެވެ.
އަފްޝަން ވިދާޅުވީ ލާމަރުކަޒީ ޤާނޫނާއެކު އަންނަ އިންޤިލާބީ ބޮޑު ބަދަލު ތަންފީޒުކުރުމުގައި ކައުންސިލާއެއްކޮށް އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ދަޢުރު ބޮޑުކަމަށެވެ. އަދި މި ލިބުނު ފުރުޞަތަކީ ރައްޔިތުންނަށް ޚިދުމަތްކޮށްދިނުމަށް ލިބޭ ރަނުގެ ފުރުޞަތެއްކަމަށާއި، ކޮންމެ މަސައްކަތެއްވެސް ބައްޓަންކުރަންވާނީ ރައްޔިތުންގެ ލާބައާ މަންފާއަށްކަމަށެވެ.
އަފްޝަން ވިދާޅުވީ އެލްޖީއޭ އަބަދުވެސްވާނީ ކައުންސިލްތަކާ އެންމެ ގާތްކޮށް މަސައްކަތްކުރާ އިދާރާއަށް ކަމަށާއި، އޮތޯރިޓީން އެންމެ ބޮޑު އިސްކަމެއް ދޭނީ ލާމަރުކަޒީ ނިޒާމް ފުރިހަމަކުރުމަށް ކުރަންޖެހޭ އެންމެހާ މަސައްކަތްކުރުމަށާއި، މިނިޒާމާ މެދު ރައްޔިތުންގެ އިތުބާރު އުފެއްދުމާ ނިޒާމުގެ ސަބަބުން ސީދާ ރައްޔިތު މީހާއަށް ފައިދާ ލިބޭކަން ކަށަވަރުކުރުމަށްކަމަށެވެ. މިކަން ކުރެވޭނީ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ އޮތޯރިޓީއާ އޮންނަ ގުޅުން ވަރުގަދަވެ ހަރުދަނާވެގެންކަމަށް އަފްޝަން ވިދާޅުވިއެވެ. މިމަސައްކަތަށް ބޭނުންވާ ތަމްރީނާއި މަޢުލޫމާތުތައް އެލްޖީއޭއިން ކައުންސިލްތަކަށް ފޯރުކޮށްދެމުންދާނެކަމުގެ ޔަގީންކަން އަފްޝަންވަނީ ދެއްވާފައެވެ.
މިޕްރޮގްރާމްގެ ސެޝަންތައް ކުރިއަށްގެންދިއުމުގަ ރިޕަބްލިކަން އިންސްޓިޓިއުޓް މޯލްޑިވްސް އައިއާރުއައިގެ އިތުރުން، ރައީސުލްޖުމްހޫރިއްޔާގެ އޮފީހާއި، ސަރުކާރުގެ 6 ވުޒާރާއަކާއި 2 މުއައްސަސާއަކާއި، ޔޫއެންޑީޕީއާއި ޓްރާންސްޕޭރަންސީ މޯލްޑިވްސްއިންވަނީ ބައިވެރިވެފައެވެ.