ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން ފުވައްމުލައް ސިޓީގެ މަގުތަކުގައި ފެންބޮޑުވެފައިވާތީ، ފެން ހިންދުމުގެ މަސައްކަތުގައި ބޭނުންކުރުމަށް އިތުރު 6 ޕަމްޕް ފޮނުވުމުގެ މަސައްކަތް ފަށައިފިއެވެ. ހުޅަނގު މޫސުމުގެ ވިއްސާރައިގެ ސަބަބުން ފުވައްމުލައް ސިޓީއަށްވެސް ވަނީ އެކި ވަރުގެ ގެއްލުންތައް ލިބިފައެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން ވިދާޅުވީ، ވާރޭވެހި ފެންބޮޑުވުމުގެ ސަބަބުން މިހާތަނަށް އެންމެ ބޮޑު ގެއްލުމެއް ވެފައިވަނީ ފުވައްމުލައް ސިޓީއަށްކަމަށެވެ. އެގޮތުން 291 ގެއަކަށް ފެންވަދެގެން ރިޕޯޓުކޮށްފައިވާކަމަށް އެ އޮތޯރިޓީން ވިދާޅުވެއެވެ. މީގެތެރެއިން 119 ގެއެއްގައި 392 ވެލިބަސްތާ ޖަހާފައިވާކަމަށާއި، 4 ގެއެއްގެ މުދާތައް ރައްކާތެރި ހިސާބުތަކަށް ގެންގޮސްފައިވާ ކަމަށް އެއޮތޯރިޓީން ވިދާޅުވެއެވެ. އަދި އެސިޓީގައި ފެން ހިންދުމުގެ މަސައްކަތް މިހާރުވެސް ކުރިއަށްދާކަމަށް އެން.ޑީ.އެމް.އޭއިން މަޢުލޫމާތުދެއްވައެވެ.
މިހާރު ކުރަމުންދާ ވިއްސާރައިގެ ސަބަބުން ފުވައްމުލަކުގެ އެކި ސަރަޙައްދުތަކުގައި ފެންބޮޑުވެފައިވާއިރު، ބައެއް ސަރަޙައްދުތަކުގައި 18 އިންޗިއާހަމައަށްވެސް ފެންބޮޑުވެފައިވާކަމަށް ފުވައްމުލައް ސިޓީ ކައުންސިލުން ވިދާޅުވެފައިވެއެވެ. ބޯކޮށް ވާރޭވެހި ފެންބޮޑުވުމުގެ ސަބަބުން ގޭގޭގައި ހިފާގެންގުޅޭ ސާމާނާއި ފަރުނީޗަރުތަކަށްވެސް އެކިވަރުގެ ގެއްލުން ލިބިގެން ރިޕޯޓްކޮށްފައިވެއެވެ. އަދި ބައެއް ގޭބިސީތަކުގައި ދިރިއުޅޭ މީހުން އަމިއްލައަށް އެހެން ތަންތަނަށް ބަދަލުވެފައިވާއިރު، 3 ޢާއިލާއެއް ވަގުތީ ބޯހިޔާވަހިތަކަށް ބަދަލުވުމަށް ކައުންސިލުންވެސް އެހީތެރިކަން ފޯރުކޮށްދީފައިވާ ކަމަށް ފުވައްމުލައް ސިޓީ ކައުންސިލުން ވިދާޅުވެފައިވެއެވެ.
ފުވައްމުލައް ސިޓީގެ މަގުތަކުގައި ފެން ހިންދުމަށް ކުރާ މަސައްކަތް މިހާރަށްވުރެ ހަލުވިކުރުމުގެ ގޮތުން އެން.ޑީ.އެމް.އޭގެ ފަރާތުން 5 ޕަމްޕަކާއި، އެމް.ޑަބްލިޔު.އެސް.ސީގެ ފަރާތުން ޕަމްޕެއް އެސިޓީއަށް ފޮނުވުމުގެ މަސައްކަތް ކުރަމުންދާ ކަން ސަރުކާރުން ވަނީ ހާމަކުރައްވާފައެވެ. ފެން ހިންދުމުގެ މަސައްކަތް ކުރުމަށް ބޭނުންވާ 4 ޕަމްޕެއް މިދިޔަ އަހަރުވެސް ސަރުކާރުން ވަނީ އެ ސިޓީއަށް ފޯރުކޮށްދީފައެވެ.
ވިއްސާރައިގެ ސަބަބުން މަގުތަކުގައި ފެންބޮޑުވުމުގެ އިތުރުން، ކާނުތައް ފުރިގެން ނަޖިސް ބޭރުވާކަމުގެ ކަންބޮޑުވުމާއި ޝަކުވާ އެ ސިޓީގެ ރައްޔިތުން ދަނީ ކުރަމުންނެވެ. ފުވައްމުލައް ސިޓީގެ ނަރުދަމާ ނިޒާމުގެ މައްސަލަތައް ޙައްލުކޮށް މަރާމާތުކުރުމުގެ މަސައްކަތް ފެނަކަ ކޯޕަރޭޝަނާ ޙަވާލުކޮށްގެން ސަރުކާރުން މިވަގުތުވެސް ދަނީ ކުރަމުންނެވެ. ސަރުކާރުން ވިދާޅުވެފައިވަނީ ވިއްސާރަ ދުވަސްވަރު އެ ސިޓީގެ މަގުތަކުގައި ފަސޭހައިން ފެންބޮޑުވާ މައްސަލައަށް ދާއިމީ ހައްލެއް ލިބިގެންދާނީ، މަގުހެދުމަށް ކުރިއަށްގެންދާ މަޝްރޫޢުގެ އެއްކޮށް ފުރިހަމަވުމުންކަމަށެވެ.
މި މަޝްރޫޢު ޑިޒައިންކޮށްފައިވަނީ ފުވައްމުލަކުގެ މައިމަގުތައް ޒަމާނީ ފެންވަރަށް ތަރައްޤީކުރުމާއެކު، ފެން ހިންދާ ނިޒާމުވެސް ޤާއިމުކުރާގޮތަށެވެ. މި މަސައްކަތް އެމް.ޓީ.ސީ.ސީއާއި ޙަވާލުކޮށްގެން ކުރަމުންދާއިރު، މިހާރު މަސައްކަތް ގޮސްފައިވާ ހިސާބަށް ބަލާނަމަ، މިއަހަރުގެ ނޮވެމްބަރަށް މި މަޝްރޫޢުގެ މަސައްކަތްތައް އެއްކޮށް ނިންމާލެވޭނެކަމަށް ލަފާކުރެވޭކަމަށް ސަރުކާރުން ވިދާޅުވެއެވެ.